1 Judah gwangpei Josiah napei Zedekiah hegwang tei kerai dau, sam aide RAMPAUBE dade Jeremiah da gwang. 2 RAMPAUBE acu ainzwa rangbeu lie, "Nang heria teilu delwe ngwanggai ge n ziemne tei lulo. Cidung n ngwang gage kailu. 3 Pecai Edom hegwangpei, Moab hegwangpei, Ammonme hegwangpei, Tyre hegwangpei, nah Sidon hegwangpei, Jerusalem ga Judah hegwangpei Zedekiah de redau kera kegwang hegwangpei samgwamedung ba gage aipau sam de langgai beulo. 4 Cipau samgwamedung dage penui kedime ziemne aja kaibeu eh ranglo, ‘Tinggim reugwame reu RAMPAUBE, Israel Tinggwang, ainzwa rangbeu: nang n kedime de ainzwa rangbeu bi maisia, 5 "Ih akatei a kengkieng kedi le nah a ba hwa kecu gade kideu teilu. Ih kideu ga minadung nah makaunedung de tei gai, nah keheibe de a miak dwa gade petau kecume de cide pwa peu zie.* 6 Cine cu, Ih akatei aipau deudung pelane Babylon hegwangpei Nebuchadnezzar a kilabe ba gage ha beu dida. Nah Ih luhdung ga kering kaunedung pecu habeu dida pe gwa tei kerane. 7 Kedanemene heleuh pelane pe gwa tei zie, pe napei, nah pe capei pe leuhbe kaudi kera ting gwangcang kemaktane. Pecai pa heleuhdung kekiee ge nah hegwang kedidung gwa tei dizie. 8 Cine heleuh nah hegwangram, Babylon gwangpei Nebuchadnezzar gwa tei kemakme, nah penui Babylon gwangpei kangga nlütlu kemakme, Ih cipau heleuhbe de kingtie, herakum, nah mateei le saja peu zie, aide RAMPAUBE ndukegai, Ih cidungde de pe ba le ngkapdi kemaktane. 9 Cine nnui gu caihakecimedung, mangnei kecumedung, gwang kera teilung ha kerangmedung, reka eh gwang kera teilung ha kerangmedung nah kerekame de kingnei so, nnuide kempau kebamme nah, ‘Babylon hegwangpei gwa tei so,’ de eh kerangme de. 10 Kedanemene penui cairasam rang eh nnuide cwa eh nnui deudung gade kemdei le ge nnuide langgi di kerane, kedanemene Ih nnuide gwagi dizie, nah nnui tsai zie. 11 Dede heleuh ge Babylon gwangpei kangga nlütlu nah pegwa tei lucai, Ih penuide peu cipau deu ga mtak luzie, aide RAMPAUBE ndukegai, nah penui cika tatyei nah penui ki tei luzie."’"

12 Cine Ih Judah hegwangpei Zedekiah de resiu nah pecu samlia aide pau gaibeu, "Nnui Babylon hegwangpei kangga nlütlu nah pecu nah pe mina gwa teilu, iciulude nang ring luzie. 13 Nang nah n minadung, kingtie, herakum nah mateei le, daitei tsai lai, Babylon gwangpei gwa tei laklie kecu heleuh de ha Ih rang ndukegai de nzwa eh? 14 Caihakecime samdung kingnei so, cau nnuide ainzwa rangbeu bi, ‘Babylon gwangpei gwa tei so,’ kedanemene penui nnui dage kenret cairasam rangbeu bam. 15 ‘Kedanemene Ih penuide lang mpet ma, aide RAMPAUBE ndukegai, kedanemene penui a zi gade cairasam rang eh cwa la ciulude Ih ncu gwa mpet dizie nah nang kap gah dizie, nang nah caihakecime n dage cairasam rang kebammedung.’"

16 Ih aide cingkumedung nah mina pelane dage rang ndu gaila, "RAMPAUBE ainzwa rangzeu: Nnui gu caihakecimedung ainzwa rang eh cairasam kerangme samdung kingnei so, ‘Pielo! RAMPAUBE ki niadung Babylon gade cu au keu cailigwang dai bam dida!’ Penui nnui dage kenret cairasam rang liabam. 17 Penui kwa kingnei so. Nnui Babylon gwangpei gwa tei eh lunghlu maisia. Daitei peu Jerusalem namdi aide kekap ge teidi laino? 18 Magade penui caihakecime lie cai, nah RAMPAUBE sam penui da gwang kesang lie cai, peu penuide Tinggim reugwame reu RAMPAUBE dade maniadung pe ki ga, Judah gwangpei kiga nah Jerusalem ga kebamdung de Babylon gage langgai dilak kerane nggia kie lulo. 19 Reugwame reu RAMPAUBE hetsiadung, "Jaaidi" lie qu kela duibung kedide nah pe pakdung, nah namdi ga kebam kedaniadung ha ainzwa ranggai, 20 Babylon gwangpei Nebuchadnezzar Judah gwangpei Jehoiakim napei Jehoiachin de tui keludau Judah nah Jerusalem ga kedime pelane de ngngwa lwe Jerusalem gade Babylon gage tet kegaidau aipau niadung de keu ma. 21 Tinggim reugwame reu RAMPAUBE, Israel Tinggwang, ainzwa rangbeu maniadung RAMPAUBE ki ga kai nzeu kebamdung, Judah hegwangpei ki de, nah Jerusalem ziemne ainzwa ranggai, 22 ‘Kerecaki mabamdung de Babylon ga keugwang luzie, nah penuide keugwang dai kera tingba riet beu kemakta cika ge kai nzeu zie, aide RAMPAUBE ne ndukegai, pecai Ih penuide teu cuh luzie nah aipau bam ga teu cailigwang dai luzie.’"