1 RAMPAUBE sam aide caihakecibe Jeremiah da gwang Philistinme ziemne. Egypt gwangpei Gaza nam gwaketang kecu dwa sam aide peda gwang.

2 "RAMPAUBE ainzwa rangzeu: Pielo, tingtünle bie duidung sung cuh zeuda. Cidungde hereuki duidi nzwa lwa hung zie!

Cide hangdeu be nah pereu ga kebam maleune gumpwa dizie, pe namdidung nah cika kelungh minadung de! Cine mileune kengha kie eh sah dizie,

nah kideu ga kelunghme pelane hap dizie.

3 Philistinme hekwendung nginglwak kwa ciisüt eh siu kegai dau,

hekwen bagi nah peta kwa siu kegai dau

mipeidung penui name de ngha lak, penuikatei penui kemnei ziemne.

4 Philistinme pelane de ngkapdi kera tingba cide gwangla dida, Tyre nah Sidon namdidung gade

penuide ngha neu kebammedung de kaam dizie. Kedanemene RAMPAUBE au Philistinme de ngkapdi zeu delu,

duigwadeu Caphtor deu ga bangh kebamme de. 5 Gaza reuga kwakliak kecu gwang zie. Ashkelon namdi, penui kideu langkam gage minadung de gi kedime de peu zing de dizie.

Daitiee ge nnuikatei nnuide teikeherei eh hap zie no?

6 Co, RAMPAUBE kingtie! Nang zing dedi kemak daitiee ge zie reu no?

N kingtie cum ga cailigwang dilu! Mtaklu nah zing de dilu.

7 Dainzwa RAMPAUBE aja kai kebeu dau cide mtaklu lai,

pa Ashkelon nah jaaidi kung deudung ga kelunghme de gwaketang lo eh aja kaibeu dau?"