1 RAMPAUBE Jerusalemme dage rangzeu, "Jerusalem lampuikidung ga pak mie culo; pebamdung de pie twagwa gailo. Pecai pielu nah aide cet gailo:

Nnui migede petaube tei bam eh nah masang eh bam kecu ngau lucai,

iciu cai Ih Jerusalem mau gidi beuzie.

2 Penui, ‘RAMPAUBE lunghbam,’ de eh rang liede dede penui au kenret rang."

3 RAMPAUBO, nang makesang peeila meni? Nang minadung de dapgai, dede penui teei ma.

Nang penuide ngam cangsiak dida, dede penui keledeu kegaide luulu meidi. Penui penui zu tsura swa teitak dida, nah penui penui maudung pet rau dida.

4 Cine Ih rangdi, "Aidungde au kegahme rünne kesang.

Penui au kemieme, kedanemene penui RAMPAUBE lampuidung cima, nah penui Tinggwang zaidung de.

5 Ih mina kengking teu kelame da mie zie, nah penui da Tinggwang samdung rang ndu lia zie, kedanemene penui au RAMPAUBE lampuidung, Tinggwang zaidung ci kebamne."

Dede penui pelane RAMPAUBE hezaidung mlai di; penui pelane Tinggwang dage ngngwa riangkeu kebam hegeuria de teicak di.

6 Cine hegung gade hingho ge penuide gwaketang zie. Arabah gade heneu ge ne penuide tei ngkap dizie.

Kaudauna ge penui namdidung de renia eh gwang zie. Migede penui namdi be gade hegwa le petcai penuide teurak dizie.

Kedanemene penui maudung au kiee zu kedine. Penui kenlum kegah tah keteidung de au penli gah.

7 RAMPAUBE Judahme dage keteu, Ih daitei mina aidungde mau gibeu laino?

N namedung acu püt dida nah kesang kemak rabedung de sampet teidi.

Ih penui pok tei nggei beu, dede penui kemmha tah teidi nah penui kekiee ge helipuidung kiga tet nlüt.

8 Penui au ha neu kela hekündung. Penui pumteih hengim pung eh rwala. Pe kidabe nau rip de hengim bam.

9 Cine Ih penuide saja peu lak ni—aide RAMPAUBE ne ndugai—

nah heleuh ai kenzwabe dade akatei a hekum peei kerabe meni?

10 Pe kubeluhdung ga mie lu nah cide tei msia di. Dede cidungde ngkap zing diso.

Pe kiakdung su di, kedanemene cipau kiakdung de RAMPAUBE dade gwang melu.

11 Kedanemene Israel nah Judah ga minadung acu cwasüt di delu—aide RAMPAUBE ne ndugai.

12 Judah nah Israel ga minadung RAMPAUBE ha kenretpe rangdi nah penui ranggai, "Pa au magede teilak;

keherei ting gede anui reuga gwang lak, nah anui kingtie nah herakum ngau lak.

13 Caihakecimedung tingkai dizie, sam be penui da gah, cine peu penui rang kegaibe penui da teicang lu."

14 Cine RAMPAUBE, reugwame reu Tinggwang aide ranggai, "Nang sam aide rang kedine, pielo,

Ih a sam n mui gage miheu nzwa teigai beuzie, nah mina aidungde hetsing nzwa zie! Kedanemene cide ne penuide ngkap dizie.✝

15 Israelme! Ih heleuh gede peu nnuide gwaketang kerane kemdei gade ngngwa gwang zie da, Israel leuhme—aide RAMPAUBE ne ndugai—

cide au kengking heleuh ge, heleuh kecing ge! Cide au nnui pe led cikemak leuh ge,

mede penui kerangbe nnui cilak.

16 Pe lakpitsi bung au ngkei pwa kebam herau nzwa da. Penui pelane reugwamedung.

17 Cine penui nnui tsiudung nah ketyeipokdung tyei luzie, penui nnui napeidung nah napuidung de de teitset dizie.

Penui nnui meurün haudung, nnui tum haudung de daptset dizie; penui nnui kubebangdung nah tangzütbangdung gade petsi tyei zie.

Rie pwa kebam nah nnui nlum kebam namdidung de tei kingtie le ngkap dizie. 18 Dede cipau tingdau liede—aide RAMPAUBE ne ndugai—Ih nnuide ngkap cangsiak di kera a lungning ma. 19 Israel nah Judah, ‘Daitei RAMPAUBE anui Tinggwang ma aidungde anui dage teigai no?’ de rang kegaidau nang, Jeremiah penui dage rang zie, ‘Nnui a dade nreu tetdi delwe nnui deu gade sangme rabedung gwa tei kecu nzwa, nnui nnui deu kemak gade cikemakme gwa tei zie.’

20 Jacob leuhme dage reci gai beulo nah cide peu Judah ga siulu. Aide rangbeu lu,

21 ‘Aide kingneilu, nnui kecikecet kegah kemiemedung;

nnui miak bam dede ngau gailak, nah nnui kwen bam dede nnui ma siu gailak.*

22 Nnui acu hing meni—aide RAMPAUBE ne ndugai—mede a dwa gade mbeu di meni?

Ih heciang le pwa jaaidi deurai kai kelu nzwa, cide lwakah petgai kelak herai bam teilu kera kaibeu,

jaaidi mlai pet lubui, dede cide gwa le kahpet gailak. Dui nswakdung mrung lubui dede cidung kahpet gailak.

23 Dede mina aidungde au penui lung tak. Penui acu renia eh nreu tet dida.

24 Penui penui mlung gade aide rang lama, "RAMPAUBE anui Tinggwang de herüt peu go, tingrui teugwang beu kelabe—

kezi tingrui nah keri tingruidung—peting siak dau, anui ziemne riet pwa kela luhlüt mtakkak ting teibeu mui kelabe."✝

25 Nnui kemaudung ne aidungde tei gwang kera ka mzeu dida. Nnui maudung ne makeyi nnui da gwang kera tei mtak dida.

26 Kesiame a minadung kakga lungh bam. Penui nruinedung de keulu kera kwa kebamme nzwa piebam;

penui baih ge mtei gai nah mina de tuila.

27 Nruine perak lungga puiting kebam nzwa, penui kidung au cwa kelu niadung de le puibam.

Cine penui au ngking nah hei lula.

28 Penui lui yi dida; penui pumteih yi eh reba ha bam. Penui kesia ketei penli gah. Penui minadung kie be kiebeu lama

mede nggianadung kie. Penui keherei kelame de kemzuibe peu meliede penui ma hei lula.

29 Ih aidungde ziemne penuide saja peu lak ni—aide RAMPAUBE ne ndugai—

nah Ih akatei a ziemne heleuh aikenzwa ge dade hekum peei lak ni?

30 Ma kehing nah miswakegah ge Israel deu ga tei dida.

31 Caihakecime kecwa samdung rang, nah cingkume penuikatei penui kengking le kedi tei bam.

A minadung aikenzwa be penui sui yila, dede kekam benai daipai tei di zieno?’"