1 RAMPAUBE sam a da gwang eh, rang,

2 "Sam aide Jerusalem ga mina leune dage sah gai lulo. ‘RAMPAUBE aide rangla:

Nang hena dau ncu ngngwa samkakkelu samsang de Ih nsung bam, anai kenautak keludau nang dai kenzwa gede acu hung bi,

nang hetaideu ga a caisui mie keladau, ling gai kemak deu ga kahgwang.

3 Israel de au RAMPAUBE ziemne keu ntsam pwabam, Israel nang agu rünne lie!

Caugamme luhlüt tsi raitube tyei bi penuide mmaula; kengkap penui reuga gwangla—aide RAMPAUBE ne ndu kegai.’"

4 RAMPAUBE sam kingnei lulo, nnui Jacob pautsame, nnui Israel leuhme.

5 RAMPAUBE rangla, "Nnui paume acu kemmau sam daidung teugwang no, penui a dade tet nreu dino?

Penui mamie kemtadung reca gwang nah penui kemta kaudung ge tei kedi?

6 Penui aide keteu ma, ‘Egypt deu gade anuide de ngngwa mpet kebeu RAMPAUBE si no?

RAMPAUBE daiga lano, anuide hetaideu gade ngngwa mpet kebeube, Arabah* nah hekwaki deudung ga,

kecangh nah kemui kecok le pui kebam deu ga,

migede tetkah kemak nah migede lungh la kemak deu ga?’

7 Ih nnuide Carmel* deu ga ngngwa gwanglu, luhlüt nah makeyi kedadung tyei kehega lu kera.

Dede nnui gwang luge, nnui a deu tei heradi nah Ih nnuide kepeu nam de nnui kemneu teidi.

8 Cingkume aide keteu ma, ‘RAMPAUBE daiga lano?’ nah hezaidung kecime acu malie tadi!

Cingkume acu renia di. Caihakecime Baal tinggwang zi gade marang di nah kemta miedung reca di.

9 Cine Ih cude nnui dage kemmau samdung teugwang zie—aide RAMPAUBE ne ndu kegai—nah Ih nnui leuhme dage kemmau samdung teugwang zie.

10 Kittimme duigwadeu* ga miecu nah pielo. Samgwamedung de Kedar deu gage langgailo nah

madaude pedwa le aikenzwa tei mi mebi pielo.

11 Heleuh keda ge de madaude pe rabedung rehiak ni, penui kesang kemak rabedung liede?

Dede a minadung, Tinggwang penuide herüt teugwang kebeube de penui ziemne magede teigai kelak rabedung ge le acu teu rehiakdi.✝

12 Cine Ih tingde ngaukehing mlai gailo aja kai, miswakegah nah ngaukehing tei kera—aide RAMPAUBE ne ndu kegai.

13 Kedanemene a minadung a dage kemau kena tei kedine: Penui keringdui rwak gade a dade nreu tetdi,

nah penuikatei penui ziemne duibung kuilu,

duibung kerekak be dui kette bam gai kelak be.✝

14 Israel hebaangme ge ni? Pe mpaube ki gade pecu mna ni? Daitei eh sui pe ngauraume pecu tei kaumie dino?

15 Hinghonadung pe dage mrung gai. Penui kwa cisüt eh pe deu ngaukehing ge teidi.

Pe namdidung de tei ngkap di eh migede lungh kemak deu ge teidi.

16 Delwe Memphis nah Tahpanhes namdi ga minadung ne pe peura teipang dizie.

17 Nang aide nkatei nreu gage teugwang gai meni

nang RAMPAUBE n Tinggwang de pütdi, pa ncu n lampui saugwang keladau?

18 Cine, daitei eh Egypt ga kemie lampui ga tet lano nah Shihor* dui sak no?

Daitei eh Assyria ga kemie lampui ga tet lano nah Euphrate reuki dui sak no?

19 Nkatei n kesia ne ncu saja peu zie, nah nang a dade n kenlum gah kedine ncu mmau zie. Cide au dai kenzwa gede ka bi nah mau bi nang ci luzie

nang RAMPAUBE n Tinggwang de mlai kedi dau, nah a mie hing ta kedi dau—aide reugwame reu RAMPAUBE Tinggwang ne ndu kegai.

20 Nang ndaa gede n ngwanggai pung kelade Ih ne lwak beu; Ncu kang pwa kebam ria de Ih ne hiakbeu. Dede cu de nang ainzwa rangla,

‘Ih n ta teilak!’ kideu kehu leune nah tsingbang kemdiak kangga kebam leune da nang keumie, nang kemmhabo.

21 Ih ncu kubebang kedetkelu ge nzwa petsi yitube gade linggai.

Dainzwa eh nang nkatei ncu tei msia lu dino, kubebang kemtabo?

22 Nang hereuki gade nkatei ncu tei mcilu liede mede sabu ngkiengtube teu pia de,

n kemaudung au a dwa gade kehera ge—aide RAMPAUBE Tinggwang ne ndu kegai.

23 Nang dainzwa eh, ‘Ih hera ma! de eh ranglu lai. Ih Baal cai suima de kecu’?

Langkamdung* ga nang tei kegai de pielo! Nang daipai teibi pielo—nang au ut ge luga aika pak kela ge,

24 nang au renaam gadha ge nzwa, lum keludau tingkai nghui lala!

Pa lum kedidau cau pecu kezeu lulai? Peseu pecu neu kedibe magede keherei kera gah; kereha kera tingdau pecu ngau mui lula.

25 N pi de tei nnei diso mede n rwak de peu hereu diso!

Dede nang ranggai, ‘Aide ga keregui gah! Ma, Ih sangme rabedung de a sui la nah penui cai sui zie!’

26 Kerega gede tui luge ngngam di kela nzwa eh, Israelme pelane de ngngam dizie—

penui, penui hegwangmedung, penui hegwangme napeidung, nah penui cingkumedung nah caihakecimedung!

27 Aidungde ne tsingbang dage rangla ‘Nang a pei da,’ nah tangtsu dage, ‘Nang ne acu mna beuda.’

Penui penui zu mene penui cai lebie le a tai lebie nreu gaila. Iciuliede, keherei dau keludau penui rangla, ‘Cuhlwe anuide kelibeu lo!’

28 Nnuikatei nnui ziemne tei kelu rabedung de daiga lano? Nnui keherei dau keludau, penuide peu nnuide kelilu penui tei lubui cai,

kedanemene n namdidung kebam kieege n rabedung de ci kieege bam kecune, Judah!

29 Cine daitei Ih kemau tei lie de eh acu mmau lano? Nnui pelane a dage kemau teigai da—aide RAMPAUBE ne rang ndu kegai.

30 Ih nnui minadung de kemta gage saja peu. Ih penuide ledeu kebeu de luuneu ma.

Hingho pe rata kebam ge nzwa nnui caihakecime de daptset dida!

31 Nnui aipau ceheu ga lungh kebamme! Ih rang kebam de kingnei lulo, RAMPAUBE sam! Israel dade Ih hetaideu ge dini?

mede kemui kecok deu ge ni? Daitei eh a minadung a dage, ‘Anui tet zang digo, anui n da madaude cailigwang dai lakta?’ de eh rangzie no.

32 Mipui hena kebam ge pe heteiheta de nsung tadi lani, lakciupui ge pe peuzui pai de?

Dede a minadung peikap gai kelak tingbaziedung acu nsungta dida!

33 Nnui dainzwa nnui mraime de zui zie bi kecu ci kesang lie.

Nnui mipui siatume de nnui lampui ga ledeu beu.

34 Nnui painidung au kegame nah mau kemakme jaidung le keniak teula.

Mina aidungde marega la eh tui luma.

35 Dede nang rangla, ‘Ih mau ma; RAMPAUBE rata au a dade nreu tet bi dizie.’

Dede pielo! Ih nnui dage saja teugwang beu zie kedanemene nnui, ‘Ih kemau tei ma,’ de eh rang kelane.

36 Nnui zai lidi kecu aide daitei teu mlasüt bamno?

Assyria suisiet tei kegai nzwa nnui Egypt suisiet bai tei dizie.

37 Nnui cikade ngngam eh nnui peu taksu eh mpet dizie,

kedanemene RAMPAUBE nnui nlum kelame de mlai kedine, iciu eh nnui penui dade kengha ngau melu kerane."