1 Hegwangpei Zedekiah Malkijah napei Pashhur nah cingkube Maaseiah napei Zephaniah de peda langkegai dau sambe RAMPAUBE dade Jeremiah da gwang, nah penui ranggai, 2 "Anui mding gade RAMPAUBE dade ma keteu lo, kedanemene Babylon gwangpei Nebuchadnezzar anui da hereu tei bam kedine. RAMPAUBE anui ziemne mimakecang batadung tei beuzie, gwang kedi le dung tei kegai nzwa eh, nah pecu peu anui dade tetdi lubui."

3 Cine Jeremiah penui dage rang, "Ma aide nang Zedekiah dage rang beu maisia, 4 ‘RAMPAUBE, Israel Tinggwang, aide rangzeu: Pielo, nnui Babylon gwangpei nah nnui tai ga kiriedung gwale de gwang nna kebam Chaldeanme de renia kebam nnui reunetdung kemtadung tei dizie nah Ih teu caili dai lai eh bam dida! Kedanemene Ih penuide aipau namdi sum gage hekwa gai zie. 5 Pecai Ih de aba hwa cuh pwa nnuide renia zie nah a ba kengkieng ge le, nah lunghop, lungka nah rata süt kecu gele. 6 Kedanemene Ih aipau namdi ga kelunghmedung de ketang zie, mina nah makaune dede. Penui mateei kehung gade tsai zie. 7 Aide RAMPAUBE ne nduga—aipau de cai, Zedekiah Judah gwangpei, pe kilamedung, minadung, and caugame mateei de cai aipau namdi ga bang lu di bi, kingtie, nah herakum cai de, Ih ne penui pelane de Babylon gwangpei Nebuchadnezzar ba gage kai beuzie, nah penui ngauraumedung ba gage kai beu zie, nah penuide teitset kera peei kelamedung ba gage kai beuzie. Pecai pa penuide kingtie mui le teitset dizie. Pa penuide nggia lak, bang beu lak, mede penui da ngaugia keulia lak.’✝

8 Pecai nang minadung dage rang lialo, ‘RAMPAUBE aide rangzeu: Pielo, Ih nnuide kering lampui lambie gwanglu kera nah ketsai lampui lambie gwanglu kera peu gai lai bam. 9 Keheibede aipau namdi ga bam kecume kingtie, herakum, nah mateei gade tsai zie; dede keheibede tet pet delwe nnui de renia kera nna eh kebam Chaldeamedung dwa ga koktung mie kelume ring luzie. Pa au pe teilung de keli luzie. 10 Aide RAMPAUBE ne ndugai—Ih au aipau namdi de kengkap teu gwang gai kerane ncwa bam dida nah keyi ge de teu gwang beu lak. Cide au Babylon gwangpei ba gage peu dida nah pa ne cide ru dizie.’

11 Judah gwangpei leuhme ziemne, RAMPAUBE sam kingnei gai lo.

12 David leuhme, RAMPAUBE ranggai, ‘Tingcang dau ge kemzeube teu gwanglu.

Mige pe mabam süt teu di kecube de pecu tei keherei kecume ba gade keli beulo,

iciu melie cai a lungka mi nzwa pet zie nah ru zie,

nah migede cide tei mmüt kera bam lak, n kesia batadung leune ziemne.

13 Aide RAMPAUBE ne ndugai—pielo, nnui, Jerusalem kelunghmedung langkam nreu ga lungh kelamedung! Ih nnui langkam tsudung de renia la,

"Cau hung delwe anuide gwaketang zie no?" mede "Cau anui kidung ga lüt zie no?" de eh rang kelame de Ih renia zie.

14 Aide RAMPAUBE ne ndugai—nang tei keladung petsi peu Ih n da gwang eh ncu mmau kera teigai dida,

nah Ih n hegwangki mi ntau gaizie, nah cika kebam leune de ru kap dizie.’"