1 RAMPAUBE dade Jeremiah da sam gwang eh rang, 2 "Cuhlu delwe li keteibe ki ga mielo, kedanemene Ih ncu peu cikade a sam kingnei zie," debeu. 3 Cine Ih li keteibe kiga mie nah ainie! Li keteibe kemruita teu matah teibam. 4 Dede pa lidei gade li tei kebam de li keteibe ba gade siadi, cine pa cide lidei tei dailu delwe li kedage tei dailu, nah pa li cide teipwa mania pe miakngau gade keyi ge teilu.

5 Pecai RAMPAUBE sam a da gwang eh rang, 6 "Ih nnui Israelme dage aipau li keteibe de nzwa teigai lakni?—aide RAMPAUBE ne ndugai. Ainie! Li keteibe ba ga lidei kebam nzwa eh, nnui Israelme a ba ga bam.✝ 7 Peting ge ga, Ih heleuh ge mede hegwangram ge ha rang mci lia lubui, cide Ih gwa gi dizie, cide tei msia dizie, mede tei ngkap dizie. 8 Dede Ih heleuh ha rang mci kegaide kemau gade nreu lucai, Ih kengkap de cika teugwang gai zie lie cet kelude mtak dizie.

9 Keda tingdau, Ih heleuh ge mede hegwangram ge ha madungge rang mci lia lubui, cide Ih tei ncuh beu kera mede linggai kera. 10 Dede cide a kwa kingnei mene a miak dwa gade kesiabe teicai, iciucai Ih penui dage makeyi teigai zie lie rang kebeude mtak dizie. 11 Cine cu, Judah ga minadung dage nah Jerusalem ga kelunghme dage ranglo, ‘RAMPAUBE aide rangla: Pielo, Ih nnui dage kengkap ge teigai lai zeu da. Ih nnuide renia keraciem mariem ge teigai zie da. Mi hangge ge kecu kemau lampui gade kemau petlu iciude nnui lampui nah nnui tei kelade ne nnuide makeyi teugwang beuzie.’ 12 Dede penui keli zie, ‘Aide pe keyi gah. Anuikatei mariemdung de nzwa eh teizie. Anui hangge ge kecu kesiabe tei zie, ketak mlungbe teineu kelade.’

13 Ciziemne RAMPAUBE aide rangla, ‘Heleuhdung de keteulo cauge ma aikenzwa siu lano?

Kemci Israel ngaukehing ge tei dida.

14 Lebanon ga buising madauge tsura deutudung pütdi ni?

Lamlwatu reuceudung kemdei gade lwa gwang kelade sia di lani, kengkung reuceudung de?

15 Dede a minadung acu nsungta dida. Penui penui mapeu pwa kemta rabemiedung de peu nah penui penui lampui gade kaumie;

penui ndaa lampui de gi dida lampui ketsam ge ga tet kerane.

16 Penui deu de kehing ge dizie kelungta luu gai kelak ge.

Tetkah kegwang leune mbeu dizie nah penui suiga eh penui peungum zie.

17 Naimiak kepetle kaigui nzwa eh Ih penui ngauraume dwa gade penuide teizang dizie. Penuide kengkap tingba benai Ih penuide a zu pung lialak dede a caile punglia zie.’"

18 Cine minadung hangge ge de rangla, "Gwanglu, anui heciem riem eh Jeremiah de mmau go, kedanemene hezaibe cingkume dade madaude gah di laklu, mede makecime ne rang kebeude, mede caihakecime samdung de. Gwanglu, anui au anui samdung teu pecu ketang go nah pa rang ndu kegaidung gage anui lung kai ta go."

19 A ma pie eh acu ngha lo, RAMPAUBO, a ngauraumedung a ha rang kebam de siu gailo.

20 Penui dage yi kegaide ziemne kengkap de le a ziehi kesang zie deni? Kedanemene penui a ziemne makoiki ge kuilu.

Ih n dwa ga sap eh penui ziuyi ziemne kerangde nsung gailo, n rata de penui dade caili di kerane.

21 Cine penui namedung de pwa herakum gage kailo nah penuide pwa kingtie teu kelame ba gage kai dilo.

Ciu eh peu penui mipuidung de kap kedi nah hemipuidung tei dilu, nah mipeidung de teitsetdi nah rehangmedung de peu hereu gade kingtie le teitsetdi lu.

22 Peu penui kidung gade kengngi kwa siulu nang zette eh penuide renia kera ketuime de ngngwa kegwang dau.

Kedanemene penui acu tuilu kera makoiki ge kui luda nah a pi ziemne hetakdung hebai pwabam.

23 Dede nang, RAMPAUBO, penui mariem leune cibam acu renia eh teitset kera.

Penui kesiadung nah kemaudung gibeu so. Penui maudung n dade kemai diso.

Iciu meliene, penuide n dwa gade kelien gi dilu. Nang n rata kebam dau penui dage n ta tei gailo.