1 Sam aidungde kehezui laisiu ga kebam, caihakecibe Jeremiah ne Jerusalem gade lang mpet bangh kebam hecingmedung nah cingkumedung, caihakecimedung nah Nebuchadnezzar ne Jerusalem gade Babylon gage tuigai kedi mina pelane dage. 2 Aide hegwangpei Jehoiachin, hegwangpui pui, nah kedimedung, Judah nah Jerusalem gu muiteumedung, nah heciemta keteimedung de Jerusalem gade lang gidi caine. 3 Pa kehezui laisiu de Judah gwangpei Zedekiah ne Shapan napei Elasah nah Hilkiah napei Gemariah ba gage Babylon gwangpei Nebuchadnezzar dage langgai. 4 Kehezui laisiu ga ainzwa rang, "Tinggim reugwame reu RAMPAUBE, Israel Tinggwang, Ih Jerusalem gade Babylon gage gwa gai kedi hebaang tuiteu kela pelane dage ainzwa rang, 5 ‘Kidung teilu delwe cika lunghlu. Hegurie teilu nah cipau tsi de tyeilu. 6 Henau teilu delwe nnui mipeinadung nah mipuinadung de mnalu. Pecai nnui napeidung nau tei beulu, nah nnui napuidung de pe nahpeidung de ha beulu. Peu penuide mipeinadung nah mipuinadung mnalu nah nnui luilung kieelu ciu eh Babylonia ga nnui cam zu di kelakne. 7 Ih nnuide gwa mie gai kedi namdidung ziemne kezuyi peeilu, nah penui keleu gade a dade kielu kedanemene penui da kezuyi bam cai nnui dade kezuyi bam zielu.’ 8 Kedanemene Tinggim reugwame reu RAMPAUBE, Israel Tinggwang, ainzwa rangzeu, ‘Peu nnui kakga kebam nnui gu caihakecimedung mede caiha rang lubui lie kelame de peu nnuide cwadi helo, mede nang nkatei n mangdung mmi kebam de de kingnei so. 9 Kedanemene penui a zi gade nnui dage cairasam kenret rang bam. Ih penuide langgai ma, aide RAMPAUBE ne ndukegai.’

10 Kedanemene RAMPAUBE ainzwa rang, ‘Babylon ne nnuide mmi riakhena nnui reu teu kegwang dau, Ih nnuide ngha beuzie nah nnuide aipau heni ga nzang gwang dai beu zielie kecu a sam keyi de teicang beuzie. 11 Aide RAMPAUBE ne ndukegai, kedanemene Ih rünne nnui ziemne riem pwa kela de ci, mariem cide kezuyi ziemne nah kengkap ziemne ma, nnuide gwang kera teilung nah keregui peu kerane. 12 Pecai nnui acu qu gai zie nah gwang a dade kekie tei zie, nah Ih nnuide kingnei luzie. 13 Kedanemene nnui acu peei zie nah acu ngau luzie, kedanemene nnui nnui nlung pelane le acu peei zielu. 14 Pecai nang ne acu ngau luzie, aide RAMPAUBE ne ndugai, nah Ih nnui mabamdung de pung cailigwang dai beuzie; Ih nnuide heleuhdung nah henidung pelane tei zang gai kedi gade hekwa dai luzie, aide RAMPAUBE ne ndugai, Ih nnuide gwagi kegaidung gade ngngwa gwang dai luzie.’

15 Kedanemene RAMPAUBE ne nnui ziemne Babylon ga caihakecime de teu cuh beu lie nnui rang, 16 David hegwangbam ga kebam hegwangpei de nah namdi ga kebam mina pelane dage RAMPAUBE ainzwa rangzeu, nnui sinabepeidung ncu ngngwa hebaang tuiteu kela ga tet kemakme, 17 Tinggim reugwame reu RAMPAUBE ainzwa rang, ‘Pielo, Ih kingtie, herakum nah mateei penui dage langgai lauda. Kedanemene Ih mzai kemakme de tangzüttsidung tim eh tyei gai kelakbe nzwa tei dizie. 18 Pecai Ih penuide kingtie, herakum nah rapiadung le gwazui zie nah kideu ga hegwangramdung pelane miak ngau gade ngauhing cang siak kecu ge tei dizie. Kekeheu ge, reset kedi nah luu ta kedi kwa nah hengam ge dizie Ih penuide teizang kegai heleuhdung pelane ga. 19 Ainzwa teigai kecu au a kila caihakecimedung dade penui dage Ih sam lang kegaide penui kingnei ta kedine, aide RAMPAUBE ne ndugai. Ih penuide lang lwe lang daigai dede penui kingnei raudi, aide RAMPAUBE ne ndugai.’ 20 Cine nnui nnuikatei RAMPAUBE sam kingneilu, pane Jerusalem gade gwa mpet Babylon gage kai kedime pelane.

21 ‘Tinggim reugwame reu RAMPAUBE, Israel Tinggwang, Kolaiah napei Ahab nah Maaseiah napei Zedekiah, a zi gade cairasam kenret rang kebambe ha ainzwa rangzeu: Pielo, Ih penuide Babylon gwangpei Nebuchadnezzar ba gage kai di lauda. Pa nnui miak dwa gade penuide teitset dizie. 22 Pecai Babylon ga Judahme de tuiteu kelame mina aidung ha rang eh reset zie. Reset eh ainzwa rang zie: Peu RAMPAUBE de ncu Zedekiah nah Ahab nzwa tei dilu, Babylon gwangpei ne penaide mi gage nring ru kedi nzwa. 23 Aide teicang luzie kedanemene penui Israel ga hengam ta tei eh penui kidame nau de ngngwa kemmha ta tei nah Ih penuide madaude aja peugai kemak samdung teu a zi gade kenret sam rang kegaine. Kedanemene Ih penui daipai tei zie bi cibam; Ih zierang ketei be, aide RAMPAUBE ne ndugai.’"

24 "Nehelam namceu gade kegwangbe Shemaiah ha ainzwa rang: 25 ‘Tinggim reugwame reu RAMPAUBE, Israel Tinggwang, ainzwa rangzeu: Nang Jerusalem ga mina pelane dage, Maaseiah cingkube napei Zephaniah de nah cingkumedung pelane de nkatei n zi gade laisiudung lang mpet eh ainzwa rang, 26 "RAMPAUBE ncu Jehoiada cingkube nding gade peu cingkupei tei luda, peu RAMPAUBE ki pie rengei kerane. Nang mina pelane caudungge penui katei penuide caihakecime tei pwabam bi cipaume reu pie kera n ta da. Nang penuide penui ngwang gage hegeukang nah hegeuria le kang dilu. 27 Cine cu, nang daitei Anathoth namceu gade kegwangbe Jeremiah de kesiu meno, pekatei pecu caihakecibe tei lu n lam sap kemakbe de? 28 Kedanemene pa anuide Babylon ga langgai nah ainzwa rang, ‘Cide peting ketie ge zie. Ki tei lwe cika lungh lu, nah hegurie tei lu nah pe tsidung de tyeilu."’" 29 Cingkube Zephaniah cipau laisiu de pei gai, Caihakecibe Jeremiah kingneilu kebui gade. 30 Pecai RAMPAUBE sam Jeremiah da sam ainzwa rang gwang, 31 "Langgi kedimedung pelane dage sam ainzwa langgai beulo, ‘RAMPAUBE Nehelamme pei Shemaiah ha ainzwa ranggai: Ih pecu langgai ma dede Shemaiah nnui dage cairasam rang, nah pa nnuide kenret samdung nlum kera puisau tei gaibeu, 32 ciziemne RAMPAUBE ainzwa ranggai: Pielo, Ih Nehelamme Shemaiah de nah pe leuhmedung de saja peu zie da. Mina aidung kak gade migede pelam sap ta dizie. Ih a minadung ziemne ma keyi tei kegai de pa ngau lak, aide RAMPAUBE ne ndugai, kedanemene pa RAMPAUBE de mlai kedine.’"