1 Laisiukwak aide au Benjamin leuhme deu ga Anathoth nam ga Rampaube kerecaki cingkume ge Hilkiah napei Jeremiah ne rang kegai ha laisiukwak. 2 RAMPAUBE Judah gwangpei Amon napei Josiah Judah deu ga hegwang tei kelu mmi kereiehkecum bekum Jeremiah dage marang gai. 3 Judah gwangpei Josiah napei Jehoiakim hegwang keteidau pe da marang dai, Judah gwangpei Josiah napei Zedekiah hegwang tei kelu mmi kereiehket bekum kecang. Cipau kum kei mengei bekei Babylonia reugwame ne Jerusalem me de hebaang tei kera ngngwa tetdi.

4 RAMPAUBE sam a da gwang eh rang,

5 "Ih ncu npui henabam gage damgai kemak dwa ncu kedetlu da;

ncu mna lu kemak dwa Ih ncu teu ntsam luda; Ih ncu heleuhdung dage caihakecibe teigai beu dida."✝

6 "Ah, RAMPAUBE Tinggwang!" Ih ranggai, "Ih dainzwa marang zie bi cima, Ih henazu reu kecune."

7 Dede RAMPAUBE a dage ranggai,

"Aide rangso, ‘Ih henazu reu.’ Ih ncu lang kegai leune ga nang mie bi maisia,

nah Ih ncu ranglo kebeu leune rang beulu!

8 Penuide hingso, kedanemene ncu kelibeu kerane Ih ncu ngngwa la zielu—aide RAMPAUBE ne ndu kegai."*

9 Pecai RAMPAUBE pe ba hetwa pet, a mui tung eh a dage rang, "Cu au, nang rang maikesiabe Ih a samdung ncu peula.

10 Henai Ih ncu heleuhdung nah hegwangramdung de

pai mpet nah teu ngkaulu kera, teimsia nah keliengi lu kera, tei ncuh nah linglu kebui cidung reu kengkieng peula."✝

11 Pecai RAMPAUBE sam a da gwang eh, rang, "Jeremiah, nang daipai ngau no?" Ih keli gai, "Almond bang kiak ge." 12 RAMPAUBE a dage ranggai, "Nang ngau dauda, kedanemene Ih a samdung teicang kerane kwa eh bam."

13 Pecai RAMPAUBE sam a dage keteu, "Nang daipai ngau no?" Ih keligai, "Ih tingtünle bie lige nswak bam eh ngau lie, nah cide au ailam bie lwa gwang lai eh bam dida." 14 RAMPAUBE a dage ranggai, "Hangdeu aika lungh kebam pelane reu ga kekap tingtünle de nswak gwang zie da. 15 Kedanemene Ih tingtünle kebam heleuh pelane de gwang lulo qu kebamne. Penui gwang delwe Jerusalem rieki kimuiki gage penui hegwangbam nah herie twagwa kebam teicuh luzie nah Judah namceu kedadung pelane. 16 Ih a minadung de saja peu zie kedanemene penui kemau tei kedine, penui acu püt dida, hera kedadung dage kehengui rugai di, nah mamiedung penui ba le teilwe reca dida. 17 Nkatei ncu mteilu! Cuhlu nah penui dage Ih ncu ranglo kebeu leune rang beulo. Cu penuide hing tadi, mecaige Ih penui dwade ncu tei ngngi gai beuzie!✝ 18 Pielo! Henai Ih ncu hangdeu leune ga rie kelu namdi, hegeu tsiage, nah hetageu herie ge Judah gwangpeidung, kedime, cingkume, nah hangdeu minadung de renia kera teibeu dida. 19 Penui ncu gwaketang, dede penui ncu ngam di gailak, kedanemene Ih ncu kelibeu kera n da la zielu—aide RAMPAUBE ne ndu kegai."