1 RAMPAUBE ainzwa ranggai,

"Tinggim au a hegwangbam, nah kideu au a pidau bam. Ciu eh nnui daiga ge a ki teibeu laino? Ih mtak kera ni de daiga no?*

2 Ma aidungde a ba ne teilu; aidung de ainzwa teigwang lu, aide RAMPAUBE ne ndugai.

Ih ne petau delie kecu mina aide da, rabe lambie mnei nah lungrei kelame, nah a sam de hing eh mbeu kelame.*

3 Mige hetumseu ge de gitset kelame mina de liede daptset la; mige meurünna ge teu ratak teikelame heteu ngwang de teicum dila;

mige meibui reca pwapeu kelame hebak jai peu la; mige kensungbam kehengui rim ge pwapeu kelame kesiame de liede samlam beula.

Penuikatei penui lampuidung kedet luda, nah penui mide ngaungkau kecu penui suila.

4 Cide siakte penuikatei penui gu saja Ih ne kedet zie; penui hing kela de Ih penui da teugwang zie,

kedanemene Ih qu kegai dau, migede keli beu ma; Ih rang kegai dau, migede kingnei ma.

Penui a miakngau gade kesiabe tei di, nah a suiyi la kemakpe kedet dila."

5 RAMPAUBE sam de kingneilu, nnui pe sam de hing kelame,

"N siname a zi ziemne ncu ngau nghet nah masipei la kemakme ranggai,

‘RAMPAUBE de peu kendube tei lulo, ciu eh anui n suiyi ngau zie,’

dede penui de hengam gage kai dizie.*

6 Maadi keregi kwa ge namdi gade gwang, kerecaki gade makwa ge,

RAMPAUBE pe ngauraume de hekum peei kecu kwa.✝

7 A kemci namdi de mipui ge, pe mna tetteei mene,

zette pe na mnakelu nzwa lie.*

8 Cau aikenzwa ge siu no? Cau aikenzwa dung ngau no?

Hangdeu ge tingnaige gage nna lubui ni? Heleuh ge tingkak nage gage tei ncuh lubui ni?

Ciuliede Zion kenna tetteei teicuh herizi, pa pe name de nna beula. 9 Ih ngiena mna kera ngkei gaibeu nah hena cide depeu mna lakni?, RAMPAUBE keteu.

10 Jerusalem de ngngwa suiyi lu nah pe ziemne nnui suiyi lu, nnui pelane pecu keku me;

pecu ngngwa suiyi lu, nnui pelane pe ziemne hap kelame!

11 Kedanemene nnui ngkwet zie nah mnung luzie; pe tung dungne ncu teirelui beuzie;

kedanemene nnui cide sak pui luzie nah pe kendu ne nnui suiyi kepui tei zie.

12 RAMPAUBE ainzwa ranggai,

"Ih pe da hereukidung nzwa lungh keyi mzi gai lai eh bam dida,

nah heleuhdung mabam reuceunadung pui eh lwakebam nzwa.

Pe lambie gade ncu ngkwet zie, pe badung ne pwa zie, nah pe ngkokpuidung ga kelui zie.

13 Mipui ge pe na de teirelui beu kelanzwa, ciu eh Ih ncu teirelui beuzie, nah nang Jerusalem ga relui bam luzie."

14 Nang aide ngau zie, nah n mlung suiyi luzie, nah cehei kehenabe nzwa n radung pwakcuh zie.

Pe kilame dage RAMPAUBE ba de peu ci zie, dede pa pe ngauraume dage pe rata keulia zie.✝

15 Cine pielo, RAMPAUBE au mi teu eh gwangla, nah pe bagidung au heratingkai nzwa gwangla

pe rata cui de keugwang kera nah pe rata de miheu cui le keugwang lu kera.✝

16 Kedanemene RAMPAUBE minadung de mi le saja peula nah pe kingtie le. RAMPAUBE ne teitset kedime kekieege zie.

17 RAMPAUBE rangzeu, "Nlumkemakme reca ziemne penuikatei penuide tei ntsam lu nah penuikatei penuide tei mcilu, ciu eh penui guriedung ga nlüt lu kerane, sumbe ga kelabe caisui eh caugame

hebak teih tyei labi nah heza nzwa mcikemakpe.

"Penui kekam ga gwang dizie, aide RAMPAUBE ne ndugai.

18 Kedanemene Ih penui tadung nah penui kecetdung cibam. Ih heleuhdung nah heletdung keu hekwa kera ting gwang mna la dida. Penui gwang zie nah a kendu ngau zie. 19 Ih penui kakga marehi ge teigai zie. Ciu eh Ih heleuhdung dage bangkelume de langgai beu zie: Tarshish namdi, Put deudi, nah Lud deudi dage, lakpi pwa kecume, Tubal deudi, Javan nah kemdei jaaidikung deudung ga penui a ha siu kemakme mede a kendu ngau kemakme dage. Penui heleuhdung kakgade a kendu rang zie. 20 Penui heleuhdung leune gade n siname pelane de ngngwa cailigwang beu zie, RAMPAUBE de reca peu kecu nzwa. Penui hekwendung gade gwang zie, nah bagidung gade, mania kepung garidung gade, gadanadung gade, nah utdung gade, a kemci lamlwa Jerusalem ga, RAMPAUBE ne ranggai. Kedanemene Israel minadung hekwak kenci gage meibui reca RAMPAUBE kiga pwa gwang zie.

21 Aidung kesa gade cingkudung nah Levime liede Ih kedet zie, RAMPAUBE ne ranggai.

22 Kedanemene tinggimdung keheci nah hangdeu keheci Ih teigai kera de

cide a dwa ga bamlu kera nzwa, aide RAMPAUBE ne ndugai, ciu eh n leuhme bamlu zie, nah n zi bamlu zie.*

23 Kei ge cia kei ge, nah Sabbath ge gade peciabe,

mina leune keu mie a da gwang zie, RAMPAUBE ne ranggai.

24 Penui tet pet zie nah acu regi eh renia kela minadung gu ketsai paaudung ngau zie,

kedanemene penuide tyei kelu tangseudung tsai lak, nah penuide ngkap kedi mi de tei mmütti lak;

nah pumteih leune ziemne cide kengkau ge zie."✝