1 Hegwangpei Hezekiah penui pau kegaidung de siu kelu dau, pa pelung sia eh peniadung hietti, rosopai bahlu, nah RAMPAUBE ki ga miedi. 2 Pa Eliakim, hegwangki ga kedibe, nah Shebna keraube, nah cingku hangkiamedung de, pelane rosopai bahlwe, Amoz napei Isaiah, caihakecibe da langgai. 3 Penui peda rang eh, "Hezekiah rangla, ‘Henai aide lungrei, rata, nah kengngam tingbazie ge, hena nage mna kera kwa kebam nzwa, dede mipui be pena mna kera kengkieng gah kebam nzwa. 4 RAMPAUBE nnui Tinggwang reugwamaa muibe samdung kingneilu de cilak, pe mpaube Assyria gwangpei ne langgai eh ringkela Tinggwang de kii kera lang kegaibede, nah RAMPAUBE nnui Tinggwang ngking kelu samdungde mmau dizie. Cu nnui kekie teigai gailu cika bang kebamme ziemne.’"

5 Cine Hegwangpei Hezekiah kilamedung Isaiah da gwang, 6 nah Isaiah penuide dade ranggai, "Nnui mpaube da ranglo: ‘RAMPAUBE rangla, "Nnui samdung siu kelu dene ngngi di helo, Assyria gwangpei kilame acu kemneu sam kerangdung de. 7 Pielo, Ih rabe pedage kaigai zie, nah pa sam pau kegai dungge siulu zie nah pa pekatei pedeu ga cailigwang dizie. Ih pecu peu pekatei pedeu gade kingtie le tsaidi zie."’"

8 Pecai reugwame muibe ditube caili gwanglu, nah Assyria gwangpei Libnah namdi de ngngwa keregi bam eh ngaulu, kedanemene pa hegwangpei Lachish gade tetdi delie siu kelune. 9 Pecai Sennacherib Cush nah Egypt gwangpei Tirhakah pecu ngngwa regi kera mtei kebam siulu, cine pa samge teu eh sam teu kelamede Hezekiah dage langgai dai: 10 "Judahme gwangpei Hezekiah da ranglo, ‘Nnui nlum kela nnui Tinggwang de peu nnuide cwa diso, rang eh, "Jerusalem de Assyria gwangpei ba gage peu di lak." 11 Pielo, nang Assyria gwangpeidung hangdeu pelanedung da daipai teigai dibi siulu da penuide ngkap zing kedi. Cine ncu kelilu zieni? 12 Namdidung rabedung ne penuide kelilu dini, a paumedung ne ngkap kedi heleuhdung: Gozan, Haran, Rezeph namdidung, nah Tel Assar ga Edenmedung? 13 Daiga Hamath gwangpei, Arpad gwangpei, Sepharvaim, Hena, nah Ivvah namdidung gwangpei lano?’"

14 Hezekiah samgwame ba gade laisiu aide sam teu kelame ba gade keulu nah cide peigai. Pecai pa RAMPAUBE ki ga hanglu nah cide pe dwa gage kailu. 15 Hezekiah RAMPAUBE dage kekie teigai: 16 "Reugwame reu RAMPAUBE, Israel Tinggwang, cherubim* reu kebambe, nang rünne kideu gwangram pelane reu Tinggwang. Nang tinggimdung nah kideu teigai. 17 N kwen nreugai, RAMPAUBO, nah kingnei gailo. N miak nkeigai, RAMPAUBO, nah piegailo, nah Sennacherib samdung siu gailo, ringkela Tinggwang de teu henui tei kera pa lang kegai samdung de. 18 Cide kesanglie, RAMPAUBO, Assyria gwangpeidung ne namdidung pelane nah penui deudung de ngkap dida. 19 Penui penui rabedung de mi gage kai dida, kedanemene penui au rabedung ma dede mina ba le teikelu tahge, tsing nah tangtsu rünne. Cine Assyriame ne penuide ngkapti.* 20 Cine cu, RAMPAUBE anui Tinggwang, pe kengking gade anuide kelibeu lo, cinzwa eh kideu gwangramdung pelane de nang rünne RAMPAUBE lie kecu cilu kerane."

21 Ge Amoz napei Isaiah samge Hezekiah dage langgai, rangzeu, "RAMPAUBE, Israel Tinggwang rang la, ‘Kedanemene nnui Assyria gwangpei Sennacherib ziemne a da kie kegaine, 22 sam aide RAMPAUBE pe ziemne ranggai:

"Kemci Zion napui ncu ngau nghet bam nah ncu mlai eh nui bam;

Jerusalem napui ncu pepeu kengak bam.

23 Nang caude kii nah rang msia no? Caude nang ngkwa kecehu le renia no

nah hegie eh n miak pwacu no? Israel Tinggwang Kemcibe de de.

24 Nang n kilamedung dade Rampaube de kii nah ranggai, ‘A bagidung kekiee ge teu eh

Ih lamlwatu cehutu ga hang, Lebanon deutu hutubedung ga.

Ih cedarbang hutu bedung nah cypress bang yitu bedung bikau dizie,

nah Ih heni kecehu deutu gadung mie zie, petsi kepui hegung ga.

25 Ih tekwadung kui lu nah dui saklu;

Ih a pi kangga kebam Egypt reuki pelane tei cangh dida.’

26 Ih ndaa gede cide riempwa kela nang ci meni

nah ndaa gede tei kedi ci meni? Cu Ih cide teicang gwang zeuda.

Nang aika namdi kengkieng dungde de teimsia pwa ralie teidi kera bam.

27 Cika kelunghme, kengking cam, nnei nah ngngam dida.

Penui au luhga ceheidung, cehei kemdiakdung, cehei ki reuga mede luh ga,

naimiak kepetle tingkai dwa kebam nzwa da.

28 Dede Ih nnui bam kecu, nnui mie kecu, nnui gwang kecu, nah nnui rata a da kebam de cibam.

29 Acu n rata kela, nah nang ngang kela a kwen ga gwang cang bam kecu ziemne,

Ih n ngkie gage kagwak kailu zie, nah n mui gage kekang ria kailu zie;

Ih nang kegwang lampui gade ncu ngngwa cailigwang dai dizie."

30 Pecai Isaiah hegwangpei Hezekiah dage rang, "Aide n ziemne ma rehi ge zie:

Hekum nang hegung ga lungkela be tyei zie, nah mmi pekena bekum de nang cika lung kela be tyei zie.

Dede mmi pekecum bekum nang mabang ling zie nah luhlüt zie, kubetsibangdung lingzie nah petsi tyei zie.

31 Judah leu bang kebam ringkelumedung penui mah him dai luzie nah petsi bui zie.

32 Kedanemene Jerusalem gade bang kebamme ge pet zie; Zion Deutu gade ring kelume gwang zie.

Reugwame reu RAMPAUBE lungning de ne aide teigai zie."

33 Ciziemne RAMPAUBE Assyria gwangpei ziemne aide ranggai:

"Pa namdi aika lütlak nah pa aika lakpitsi gede kap lak.

Pa hegeu punglwe cipau dwa ga gwanglak mede cika ge heni kecehu gede kwa cuh lak.

34 Pa kegwang lampui gade pa tet dai dizie; pa namdi cika nlüt lak, aide RAMPAUBE ne ndugai.

35 Kedanemene Ih namdi aide de kwa lu zie nah keli beu zie, a ziemne nah a kilabe David ziemne." 36 Pecai RAMPAUBE gwame ge tetpet nah Assyriame ramzeuki gwa ketang eh reugwame 185,000 gede teitsetdi. Minadung tingcang nuge cuge, ketsaipaaudung zeu nlakie bam. 37 Cine Assyria gwangpei Sennacherib Judah de püt eh tetdi nah kilung gwang di nah Nineveh* namdi ga bam di. 38 Pecai, pa Nisrok ki ga pe rabe de reca kebam dau, pe napeime Adrammelek nah Sharezer kingtie le pecu teitset di. Delwe Ararat deu gage pak gaidi. Pecai pe napei Esarhaddon pe bam leu eh hegwang teidi.