1 Amoz napei Isaiah Judah nah Jerusalem ha marengei gade kengau de.

2 Tingbaziedung kekam lebie ainzwa dizie

RAMPAUBE ki kebam lamlwa de

lamlwatudung hutube tei zie,

nah cide kideutudung peureu zie,

nah heleuhdung pelane cikage lwa gaizie.

3 Mina kekiee ge gwang eh hangge gede rangzie,

"Gwanglu, RAMPAUBE lamlwa ga nghang golie, Jacob Tinggwang ki ga,

iciu eh pe lampuidung anuide ledeu beulu kerane, nah anui pe lampui ga tetlu kerane."

Kedanemene hezaibe Zion gade pet zie, nah RAMPAUBE sambe Jerusalem gade pet zie.✝

4 Pa heleuhdung kakga hetu tiak zie nah mina kekiee ge ziemne ma cet riem beuzie;

penui kingtiedung pwa kepu hepei reki luzie, nah penui ngeidung pwa tangkanedung tei luzie;

heleuh ge heleuh keda ge de mmau eh kiengtie keu cuh lak, mede penui hereu teikera ziemne keteu silak da.

5 Jacob kilungme, gwanglu, nah RAMPAUBE kebaa ga anui tet lugo.

6 Nang n minadung de püt kedi ziemne, Jacob kilungme,

kedanemene penui tingnaimiak kepetle de paupai zai kepui tei kedine nah penui Philistinme nzwa reka zai reli,

nah penui sangme napeidung de ngngwa bateu.

7 Israel deudi au rangkanggeu nah kecak le pui bam, nah cika penui mahei penli gah;

penui kideu de hekwendung le pui, mede cika penui bagidung au penli gah.

8 Dede penui kideu ga kerecamiedung le pui;

penuikatei penui badung le tei kelu mamie, penui katei zurangdung le teikeludung de reca la.

9 Minadung keumie zie, nah mina hangge ge kecu kau dizie; ciziemne RAMPAUBE penui mau gibeu ma.

10 Tsupop bamdung ga miecu nah hangdeu kangga mbailu

RAMPAUBE rata gade nah pekedi kendu gade mbailu.*

11 Mina ngangpie kelame de teu henah dizie, nah hegie kelame de teu ngkei dizie,

nah cipau tutiak benai RAMPAUBE de rünne twa dizie.✝

12 Kedanemene reugwame reu RAMPAUBE tingba ge bam zie,

cidau hegie nah ngang cu kela leune de mmau dizie, nah ngangdang kela leune de mmau dizie, nah pecu teu nghung dizie,

13 nah Lebanon ga Cedar bangdung tie nah cehu kebamdung pelane de mmau zie,

nah Bashan ga mhu bangdung pelane de mmau zie.

14 Cipau reugwame reu RAMPAUBE gu tingba de lamlwatu kehudung pelane de mmau zie, nah hangdeutu cehu kebam pelane de mmau zie,

15 nah reketbam kehu leude mmau zie, nah ntipbing kebam herie leude mmau zie,

16 Tarshish ga liemdung pelane de mmau zie, nah hezu keyi liemdung pelane de mmau dizie.

17 Hegie kelame de teu henah mie dizie, nah ngangdang kelame kau dizie;

cipau nai RAMPAUBE de rünne twa dizie.

18 Mamiedung gahzing dizie.

19 Minadung tsupopdung tangtsu koiki ga nah kideu tsupopdung ga mie zie,

RAMPAUBE rata gade, nah pekedi kendu gade, pa kideube de teikeheu cu kegai dau.

20 Cipau nai minadung rangkanggeu nah kecak le tei kelu mamiedung kelien gi dizie

reca kerane penuikatei penui ziemne tei kelu, penui cidung kelien gi pwa takleidung nah takladung dage kai dizie.

21 Minadung hetiadung ga nah tsupop koikidung ga mie zie,

RAMPAUBE rata gade nah pekedi kendu gade, pa kideube de tei keheu cu kegai dau.

22 Minadung de nlum ta dilu, pe ngkie koiki ga pe teilungh ngngi de bam kelabe de,

penui keyi dai bam no?