1 Amoz napei Isaiah marengei kengau, Judah nah Jerusalem ziemne, Uzziah*, Jotham, Ahaz, nah Hezekiah hegwang ketei tingdau, Judah gwangmedung.

2 Kingneilu, tinggimdung, nah kingnei gailo, kideubo; kedanemene RAMPAUBE rangzeu:

"Ih henamedung pok tei eh teucuh lu, dede penui acu renia dida.

3 Hetumseu pempaube de cila, nah gada de pecu kemruime pepok kaibeu kela kwak de cila,

dede Israelme au cimeda, a minadung au cet ci meda."

4 Co! Heleuhbo, kemaumedung, kesia ketei gade kaukedi minadung,

kenlien ta ketei namedung, petautei mene matei kela napeimedung!

Penui RAMPAUBE de gidi da, penui Israel Kemcibe de mlai dida,

penuikatei pe dade nreu tet dida.

5 Daitei nnuide peu dap bam reu no? Daitei nnui renia reureu la no?

N peu mateei bam dida, n mlung pelane mnei dida.

6 N pideu gade n peu kecang rezam kemak sau gede gah;

rejam jamdung rünne, nah majamdung, nah majam keheci;

cidungde hejai kaam dima, teimci ma, kang dema mede lamlui eh maca de keniak gai ma.

7 Nnui deudi au mta mrwa dida; nnui namdidung au ru dida;

nnui luhdung, nnui dwade, sangmedung ne cidungde ngkap dida,

sangme dungne gwadi, ngkap mcidi eh peu tetdi.

8 Kubeluh ga ha ki ge nzwa Zion napui de gigai,

tanggainedung gurie ga kensiu bam ge nzwa, tui kera twagwapung kebam namdi nzwa.

9 Magade reugwame reu RAMPAUBE bangkebeume de anui dage kaibeu meliecai,

anuide Sodom nah Gomorrah nzwa tei ngkap dizie.

10 RAMPAUBE sam kingnei lulo, nnui Sodom ga kedimedung;

anui Tinggwang zai de kingnei lulo, nnui Gomorrah minadung:*

11 "N reca kekiee ge a dage tei kegai de dai no?" RAMPAUBE rang la.

"Meurünseu keru ratakdung, nah makaune pelui keyi be ca ada kiee nzu bam dida;

nah hetumseu jai, meurünnadung jai, mede hemeu jai Ih a sui meda.

12 Nnui a dwaga kegwang dau,

cau nnui dade aide teumai sia lie beu no, a kigu ga tet kera?

13 Pekie kegah recadung teugwang sita di lu; kehengui ru kegai de au Ih ngkau dida;

nnui gu hekei keheci nah Sabbath ngkwadung, kenlien ngkwadung aidungde Ih liasi gai lakta.

14 Nnui keici ngyidung nah nnui gu keda ngyidung Ih ngkau dida;

cidungde a pwet kerüt ge lie; Ih cidungde tei mzai leu dida.

15 Cine nnui ba hwa mpet eh kekie tei kegaidau, Ih nnui dade a miak pung mbai dizie;

nnui kekiedung tei kieesüt gai liede, Ih au kingnei lak;

nnui badung au hejai le pui lalu.

16 Hui dilu, nnuikatei nnuide teimci dilu;

nnui bata kesiadung a miakngau dwa gade keudi lu;

kesia tei mtak dilu;

17 keyi tei kera heteu lu;

kemzuibe peeilu, mine mneu kelame de lungmpet beulu,

pe pei kegahme kemzuibe peulu, hemipui ma pielu."

18 "Cu gwanglu, nah anui ngngwa mpau ncidi go," RAMPAUBE rang la;

"Nnui maudung gierei kecu nzwa bam liede, cidungde ha pwa buising nzwa dizie;

penui giebei bam liede, penui au mamai nzwa dizie.

19 Magade nnui neungga eh samzai teilucai, nnui kideu gu ma keyibe tyei zie,

20 dede magade nnui mlai nah renia cai, kiengtie le nnuide ngkap dizie,"

RAMPAUBE mui gade cide rang pet kedi ziemne.

21 Dainzwa makesang namdibe gwang helipui ge di no!

Pa au makesang le pui, pa au kemzuibe le puipung,

dede pa cu au dapketset medung le puipung dida.

22 Nnui gu rangkanggeu nci ta dida, nnui zau au dui ncüt dida,

23 Nnui hegwangnadung mide renia nah keregame zangna tei dida.

Mileunede hetau henim pesui dida, nah ziehi kepeu cai pakla dida.

Penui pepei kegahme de gumbeu lama, mede hemipuidung penui dwa kegwang dau penui lam sap beu lama.

24 Cine aide reugwame reu RAMPAUBE Tinggwang ne ndugai, Israel Ngkingtube:

"Penui da lungrei! Acu kereniamedung de Ih hekum peei zie, nah a ngauraume de akatei ne mmau eh tei keherei zie.

25 Ih a ba nreu pwa nnuide mmau zie,

lye nzwa nnui keheradung de tei mci dizie, nah nnui kehera pelane keugi dizie.

26 Kerai dau nzwa n tutiakme de Ih kai dai beuzie, nah raitu dau nzwa ncu saukeliame de;

cipaucai ncu petauketei namdi lie qu zie, makesang nam ge lie."

27 Kemzuibe gade Zion de rilu zie, nah masang gade pelung nreu kelume de.

28 Reniakelame nah kemaumedung de tei kecai ncüt dizie, nah RAMPAUBE de püt kedime de tei ngkap dizie.

29 "Nnui renet mhu tsingbangdung* de luu neu kedi ziemne nnui ngngam zie,

nah nnui heguriedung de kedet kelune nnui ngngai dizie.

30 Nnui mhu nei regui kedibe nzwa dizie,

nah hegurie ga dui kegah ge nzwa dizie.

31 Kengkiengme ge tsingtie keceu nage nzwa di, nah pe bata de mici nage nzwa dizie;

penai kenana de ru ncüt dizie, nah migede penaide peu gailak."