1 Cipaunai RAMPAUBE pe ketak, kedi kengkieng kiengtie teu eh

Neidi de saja peuzie, nlai kebam heneide de,

nah pa jaaidi ga kebam neidide de teitset dizie.

2 Cipaunai: Kubetsiluh ge pe lei teizie.

3 "Ih, RAMPAUBE, cide kegumbe; Ih cide de dui hetau mui bamla.

Ih tingmui tingba cide de kwala migede cide de tei rejam dilak kera.

4 Ih a rata ma, Oh, cide acu pe tudung nah pe kiakdung peu lacai!

Ih penuide hereu gade gwaketang zie; Ih penui pelane de runcüt dizie;

5 A ngauraume acu peu gum kebeude ga ntip bamlu mecai nah acu ngngwa kezuyilu kemakta; penuide peu acu kezuyi lulo.

6 Gwangkela tingba ga, Jacob pe mah him luzie; Israel pe nei bwa luzie nah pa luzie;

nah penui kideu zu ga petsi le kepui tei luzie."

7 Tinggwang pecu reniakela leuh dungde kerenia nzwa Jacob penai Israel de reniadi deni? Heleuh dungde penui ne teitset kedinzwa Jacob penai Israel de teitsetdi deni?

8 Anui pe mdet petausiak gade renia da, Jacob penai pe minadung de lang gidi* eh; pa pe cuingi kehingde teu penuide gwagi di, naimiak kepetle tingkai kegui benai.

9 Ainzwa eh Jacob gu kemauta de teimci beuzie, kedanemene aide le pe mau keugidi kera tsibe zielu:

pa recabam tsukangdung chalk kang nzwa tiedi eh niak kecai dizie,

nah herabepui Asherah miedung mede perim kehengui recabamdung gede sap bamlak.*

10 Kedanemene riekelu namdibe de gidi da, kelungh bamde mta mrwa dida nah pütkedi hetaideu de nzwa dida.

Cika hetumna ma peei tyei nah zeu eh pe kiakdung tyeila la.

11 Tsingkiak hui kedidau, cidungde cum dizie. Mipuidung gwang cidungde pwa mi teizie,

kedanemene mina aidungde macilu kebuime melu.

Cine penuide Damkegaibe penui Tinggwang penuide kulak, nah penuide tei kegaibe Tinggwang penuide ngaunggia lak.

12 Cipaunai

RAMPAUBE Euphrate Reuki gade Wadi Egypt ga kecang ciumei neu luzie

nah nnui, Israelme, hangge ge eh hekwa ncüt luzie.

13 Cipaunai telui kedi ge kwagai zie;

nah Assyria deuga gah kedimedung gwang zie, nah Egypt deuga mina gwagi kedimedung,

penui Jerusalem kemci deutu ga RAMPAUBE de reca zie.✝