1 Minadung keligai, "Anui dade siulu eh penui cau nlumlu dino, nah RAMPAUBE ba cau dage keulia no?

2 Kedanemene pa RAMPAUBE dwa gade mabang leuh ge nzwa lungh cuh, nah hangdeu kecangh gade tsehei pwak pet kecu nzwa da;

pecu kengau dau ngaukemcha mede hezukeyi gede bam ma; anui pecu ngau kecudau, hezuyi eh anui ngau misuilu kera gah.✝*

3 Mina ne pecu masipei tadi nah luulu tadi; lungrei pei ge, nah pa au keteei ngau bammui kelabe.

Mige dade minadung penui zudung kebai kedi nzwa, pecu masipei tadi; nah pecu le magede kemak nzwa di.✝

4 Dede pane anui mateeidung lia beu nah anui lungreidung pungbeu;

ciuliede Tinggwang ne pecu saja peu lie eh anui cetla, Tinggwang ne kedeu lie, nah teikeherei liede eh.*

5 Dede anui tahdung kesia ziemne pecu reu dida; anui maudung ziemne pecu teitset dida.

Anui kezuyi ziemne pecu saja peu, nah pe jai gade anui yi ngkeilu.*

6 Anui pelane au meurün gah kedibe nzwa da; anui hange ge kecu pekatei pe lampui gage nreu tetdi,

nah anui pelane kemau de RAMPAUBE pe dage pwa gai dida.*

7 Pecu teikeherei di; ciuliede pa pekatei pecu tei hena keludau, pa pe mui ngkei ma;

meurünna ge de gitset kera ngngwa kemie nzwa, nah meurün ge pemai tai kera dwa matu kemak nzwa,

ciu eh pa sam gede rang ma.*

8 Ketang kecu nah tutiak gade pecu rangmsia; cipau ceheu ga cauge pe ha cet si no?

Dede pecu keringme deu gade daptsetti; a minadung kemau teikegai ziemne saja pe da gwang di.✝*

9 Penui pe rau kemauketeime taiga kai, keheime ge tsit taiga ge,

pa kemau ge de tei pwabam melie de, mede pe mui gade mide kecwa sam ge de rang meliede.

10 Ciuliede cide RAMPAUBE pecu teikeherei nah teimsia kera pelungning di kecune. Pa pe teilungh teu kemau ziemne reca tei kegaidau,

pa pe namedung de ngau zie, pa pe tingbadung de nsung zie, nah RAMPAUBE mariem de pe dade teicang luzie.

11 Pe teilung gade keherei kelu cai, pa kebaa ngau zie nah pe maci gade mnung luzie.

A samsang kilabe kekiee gede tei mzeu beuzie; pa penui teimau kedidung de lialu zie.

12 Cine maadi kakga Ih pecu pe kwa peu zie, nah pa ma tui keludung de kekiee ge de mzi zie,

kedanemene pa ketsai dage pekatei pecu pwalia gai nah kemauketeime de ngngwa pei ncüt lu.

Pa kekiee ge mau liabeu nah kemau keteime ziemne hekak tetbeu.