1 Tyre ha ndu kegai ge:

Mralu, Tarshish ga liemdung; ki nah liemtaubam gah da,

Cyprus* deu gade penuide peu ci dida.

2 Zing delu, duidi kungga kelunghmedung, Sidon ga heli keteimedung,

jaaidi ga hebeuh tei kelame ne nnui reu puih dida.

3 Dui kedi reu gade Shihor mei gwang,

Nile reukung gade penui tah kelu nah luhlüt keludung le;

heleuh pelane teu helila teidi.

4 Ngngamlu, Sidon; jaaidi rang dida, jaaidi kengkingbe. Pa rang,

"Ih madaude a na lungh ma,

Ih madaude a napeidung mede a napuidung de nkwet cuh ma."

5 Egypt ga Tyre ha ci gwang lude, penuide penui sui sia dizie.

6 Tarshish gage tet gailu; haplu, dui kedi kungh ga kelungmedung.

7 N dage aide teigai nei, suiyi namdi, ndaa de bamla kela,

penui pile kemdei sangme deu ga mie lungh di kera?

8 Caune Tyre nam de renia eh aide riam lu no, peurwadung peu kelabe,

heliketei gwangdung, heli keteime kideu ga hetwa kepungme.✝

9 Penui hegie nah penui kemdu pelane tei hena di kerane,

reugwame reu RAMPAUBE ne cide riemlu kideu ga hetwa kepungme de hengam tei kerane.

10 Tarshishme Nile kungga hangdeu puhlwe kelung nzwa, nnui deu puhlu. Tyre ga cu au litakni ketei gah da.

11 Tinggwang jaaidi reu gage pe ba hwagai lwe hegwangramdung kecung dida;

Phoeniciame* ziemne pa aja ge kaigai, kengking bamdung de tei msiadi kerane.

12 Pa rangdi, "Nnui suiyi dai lakta, Sidon ga relei kemci keherei kebamme;

cuhlu, Cyprus ga mie cu; dede cikade nnui mtak lak."

13 Chaldeeme* deu de pielo. Aipaume cang dida; Assyriame ne cide makaune ziemne hetaideu ge tei dida.

Penui gwakelu reneidung kwalu; hegwangkidung tei msiadi; penui cide ralie ge teidi.

14 Mralu, Tarshish ga liemdung; kedanemene nnui liemtaubam tei msia dida. 15 Cipau nai Tyre de mmi riakhena nsungta dizie, hegwangme ge tingba dau nzwa eh. Mmi riakhena cang kedi cai Tyre au lei ga helipui de nzwa dizie.

16 N leibung pwalu, namdi ga rwa mie cu, nsungta kedi nang helipoi;

kwa hemi gai, lei kekiee teigai, ncu nsunglu kerane. 17 Mmi riakhena cang dide, RAMPAUBE Tyre de ngha beu zie, nah pa helipui ta tei eh rangkang teidai zie, nah pa kideu ga hegwangram pelane dage pecu ligai zie. 18 Pa heli tei mmi nah gie kelube RAMPAUBE de kai ntsam beu dizie. Pa cidungde kebau gailak, pa gie kelube RAMPAUBE de reca kelame de peu dizie nah taktyei kekiee penuide pwa peulu kerane teulu zie nah iciu eh paiheni yitube lulu kerane.