1 Pielo, Tinggwang kideu tei mta di lau da, cide ngkapdi kera, cide peureu teimsiadi, nah cika kelungme de teuzangra di kera.

2 Cide cinzwa gwangzie, mina da, cingkume da;

nkwetme da nzwa, penui mpaume dade;

nkwetpuime da nzwa, pe mpau puime dade;

keluime da nzwa, kezwa dade;

hepok kebeume de nzwa, hepok kelume dade;

pekai keu kelame nzwa, pekai kepeume dade.

3 Kideu teimsia nah tei nggah cangsiak dizie;

RAMPAUBE aipau sam de rangdi de kecune.

4 Hangdeube cang nah ki dida, kideube mnei cuh nah huidi zeuda,

kideu ga kenlangme kemta tei dida.

5 Hangdeu ga kelungme ne tei hera dida,

kedanemene penui hezai gikah, kesangbe teilu tadi

nah kelungta samkak kelube teipangdi delu.

6 Ciziemne reset ne kideu de mnwa lu nah cika kelunghme petau kemak ngau.

Kideu ga kelunghme de ru cuhdi nah mina kiee kemak ge gwale tadi.

7 Zau kehecibe cang di zeuda, kubebang de ki dida, pesuiyi kela leune mra dida.

8 Suiyi tambourine kwa nah kenlwa suiyi kwa mtak dida,

nah lyre suiyi dede mtakdi.

9 Penui zau sak eh lei tei meda nah zau de sak kegaime dade ka dida.

10 Kebwak kebam namdi de pang dida, ki leune ngkuilwe nah mrwa dida.

11 Lampui gadung zau ziemne kehap bam dida,

suiyi pelane mui dida, kideu ga suiyi de bam ta dida.

12 Namdi be ga zing de dida, nah herieki de pangmsia dida.

13 Kedanemene kideu pelane ga deudidung ga ainzwa dizie,

olive bang dap kegai nzwa, kubetsi raidi eh pe dang pa kelanzwa.

14 Penui kwa mrung sahbak eh kengkieng RAMPAUBE de eh sah

nah jaaidi gade de suiyi kwa sah zie.

15 Cine naimiak kepetle Tinggwang de hetwa peu,

nah jaaidi kung ga kelungme RAMPAUBE Israelme Tinggwang zi hetwa peu zie.

16 Hangdeu mdeitu le de anui lei kwa ge siu,

"Hetwa peu lu kemzeu be de."

Dede I rangla, "I tei ngkap dida, I tei ngkap dida, I keregui gah.

Samsang kemakme dage samsang kemak ta teigai da;

yeo, samsang kemakme dage siasüt eh teigai da."

17 Kehing, hekwa nah baih nnui da bam, kideu ga kelung medung.✝

18 Caugame keheu kecu kwa siuhing eh pak labi, hekwa ga cakmie zie,

nah hekwa sum gade mpet kelume, hebai gega keu dizie.

Tinggim bakidung ngkei zie nah kideu bangbe mbeu dizie.

19 Kideu be teipang cang dizie, nah pang kecai dizie,

kideu teu msiasüt dizie.✝

20 Kideu be sak kemieme nzwa tetkenok dizie nah haki ge nlai mpet nlüt kelanzwa dizie.

Pe mau kerüt dene kaudi eh cuhdai gailak dizie.

21 Cipau benai RAMPAUBE tinggimdung reu tinggim reugwame de saja peuzie

nah kideu ga hegwangme dede.

22 Penui de hekwa ncüt lu eh, hekwaki gage hebaang teilwe,

nah hebaangki ge gage kai cio dizie

nah peting ketie caine penuide saja peuzie.

23 Iciu eh hekei ngngam dizie, nah tingnaimiak de hetwa pung tadi zie,

kedanemene Zion Deutu nah Jerusalem ga reugwame reu RAMPAUBE hegwang tei dizie,

nah hangkiame dwagade pe kemdu ngau dizie.