1 Zion ziemne Ih zing de di lak, nah Jerusalem ziemne Ih mlei tadi lak,

pe kesamsang baaha eh pet lu kemaktane, nah pe kelikelu mitaubung heu kebam nzwa.

2 Heleuhdung n kesamsang ngau zie, nah hegwangdung leune n kendu.

N zi keheci ge le quzie RAMPAUBE ne kedet kebeu be.*

3 Nang de hezukeyi peurwa ge zie RAMPAUBE ba ga, nah hegwang ketei peudui ge zie n Tinggwang ba ga.

4 Ncu rang si lak, "Gikedi"; mede n deu de de rang silak, "Pütkedi."

Kesang, ncu qu zie "A suiyi be pe da la," nah n deu "Laktak teilu,"

RAMPAUBE ncu pe suiyi kela ne, nah n deu laktak tei dizie.

5 Lungsang eh, rehangme ge releime ge de pe nau kedi nzwa, cine n napeidung ncu pe nau zie,

nah lakciube pei lakciube pui de pe suikeyi nzwa, n Tinggwang n ziemne pe suiyi zie.

6 Ih reketme n riedung gage kai luda, Jerusalem;

penui tingna mede tingmui nlei mene bamma.

RAMPAUBE dage rang heci dai kebamme, mtak di so.*

7 Peu pecu mtak diso pa

Jerusalem teucuh dai lu kemakta nah kideuga peu ketwa ge teilu.

8 RAMPAUBE zetle ba le sampet teibeu da nah pe ba kengkieng le,

"Ih n ngauraume de n meiciu de taktyei ziemne peu si lakta.

Sangme n zau keheci sak lak, nang ne tei kelu de.

9 Mei luhlüt kelume tyei zie nah RAMPAUBE de twa zie,

nah kubetsi rai kelube a Kerecaki kigu gade sak zie."

10 Jerusalem ga minadung, riekidung gade kah gwanglu! N minadung cailigwang kelame ziemne lampui mteilu!

Teicuh lu, puidibe teicuh lu! Tangtsudung hekwa mpet lu!

Heleuhdung ziemne marehi pailim pwacuh lu!

11 Piegai, RAMPAUBE kideube pe nlidung leune dage reci gaila.

"Jerusalem ga minadung dage rang beulo: Ainie, n Kelikelube au gwang lada!

Pielu, pe ziehi au pe dala, nah pane kapkedi sukebeu au pe dwaga la."*

12 Penui nnuide, "Kemci mina; lie quzie RAMPAUBE ne rikelube," nah nnuide qu zie "Peei kelabe; Namdibe gidi kemakbe."