1 RAMPAUBE rangla, "Mra sahbak gai; kezeu diso. Telui nzwa n kwa keu cuh gai.

A Israel minadung de penui teimau kedi ranglia gai, nah Jacob kilungme de penui maudung.

2 Ciuliede tingba ramsang penui acu reca la nah a lampui cineu eh penui sui yila,

heleuh ge makesangbe teireli kecu nzwa nah penui Tinggwang gu hezai de gidi lama.

Penui a dade kesang tutiak keteu; penui Tinggwang gwang mna kela de mning eh penui suiyi bam.

3 Minadung keteu, ‘Anui daitei mmwang no,’ penui rang, ‘dede nang cide ngau ma? Daitei anui zai henah bi kecu, dede nnui cide ci luma?’

RAMPAUBE penui dage rangla, "nang mmwang kecu benai nang nkatei n suiyi ngaulu nah n ta keteime leune de teikeherei la.

4 Pielo, nang kesamlim nah keregi kerane mmwang la, nah helungkesia bazum teu mide teigai kera;

nang henai mmwang kecu nreule de n kwa siulu kerane ma.

5 Aikenzwa kemmwang de Ih a sui lu zieni: Mikeheibe de pekatei pecu teihena lu kera tingba ge,

hekuu nzwa eh pe peu keumie kera, nah rosopai nah mimüt pekatei pekangga kamlu kera?

Nang aide de mmwang kecu rangla deni, RAMPAUBE suiyi teikela tingba ge?

6 Kemmwang aide Ih kedet kelube meni:

Kesiabe de riangkeu kelade keugi di kera, ngwanggai ria hiak di kera,

keherei kelame de peu lungmpet beu kera, nah ngwanggai leune teupang di kera?*

7 Cide nzeu kelame de ngu tangku pangbeu kerabe meni nah kegame nah peki kegahme de n kiga ngngwa gwang kerabe meni?"

Nang migede paaula bam eh ngau kecudau, nang pecu penia kaibeu kerabe; nah nang nkatei n kibaume dade mbai di kerabe ma.*

8 Ciucai n kebaa de tingnaimiak nzwa pang zangra pet zie, nah n keteei zam de yi ngkei zette luzie;

N kesamsang de n dwaga tet zie, nah RAMPAUBE kendu dene n ma piela luzie.*

9 Ciu eh nang qu zie, nah RAMPAUBE keli zie; nang kengha luneu eh sahgai zie, nah pa rang zie, "Ih aika bam."

Nnui katei nnui kakgade ngwanggai de keugi lucai, mide kemmau zurang de, nah sam kesia rang kecude,

10 magade nang nkatei mzeu eh kebamme de peulu nah lungrei kebamme de tei relui beu cai;

ciu cai n kebaa de kemui gade baa petlu zie, nah n kemui de tingna nzwa dizie.

11 Ciu eh RAMPAUBE ncu teuswa jüja beu zie nah cuikuidung dui kegah gade n mnung teibeu zie,

nah pa n radung tei ngking beu zie. Nang gurie duitau kegai nzwa dizie,

nah duilet dui, madaude duidung cang dila kemakpe nzwa zie.✝

12 Nnui kangge ndaa tingdau sia kedi de teicuh dai zie; ceheudung kekieege sia kedidung de nang teicuh dai zie;

ncu ainzwa qu zie "Kirie keretakme," "Lungh bamlu kerane lampuidung tei kehemibe."

13 Magade nang Sabbath benai hebeu tei kera gade caisim dicai, nah a kemci tingba dau nsuibe ketei gade ketip lucai.

Magade nang Sabbath de suiyi ge lie qulu, nah nang RAMPAUBE tadung de kemci nah hetwakepung lie qulu cai.

Magade nkatei n tahdung de pütti eh Sabbath de herüt peu cai, nah nkatei n suiyibe peila nah nkatei n suibe samdung rang meliecai.

14 "Ciuciu cai nang RAMPAUBE dade n suiyi ngau luzie; nah Ih ncu kideu kecehu ga ngngwa gai beu zie;

N pei Jacob leuhme gade Ih n pok teibeu zie, kedanemene RAMPAUBE rang dida."