1 "RAMPAUBO, magade nang Tinggimdung tei pang di eh gwang lie cai! Lamlwadung n dwa gade mbeu dizie,

2 tsingkiak mi heu kegai dau nzwa eh, mede mi le dui helet lu kela nzwa.

Nzi au n cu renia kelabe da de ci lu zie, heleuh be n dwa gade mbeu dizie!

3 Pedwale, nang anui cet kemak be miswa kega ta tei kegai dau, nang nghung lu, nah lamlwadung n dwa gade mbeu di.

4 Ndaa tingdau de migede Tinggwang nang kenzwa gede siu ma mede ci lu ma,

nah migede nang rünne gwale keda Tinggwang de ngau ma, ncu pie kelame ziemne bata tei kelabe.*

5 Petaube ga renga kelame da nang gwang la, n lampuidung de nsung nah tei mzai kelame da.

Anui kemau ketei dau nang n rata di. N lampuidung gade anui de keli beu la mui zie.

6 Anui pelane nci kemakme ge nzwa kedi ziemne, nah anui ta kesamsangdung pelane pai neurie nzwa dida.

Anui pelane tsingneidung nzwa regui dida; anui maudung, tingkai nzwa, anui de gui pung dida.

7 N zi qu kerame migede gah, ncu teugim nzeu lu kera lai kai keteime de gah.

Nang anui dade n zu hebai kedine nah anuide peu anui kemaudung ba gade ngkap dida.

8 Ciude, RAMPAUBO, nang au anui pei;

anui au lidei. Nang au li keteibe; nah anui pelane n bata lie.

9 N rata ham di helo, RAMPAUBO, nah anui maudung de cet bam sap helo.

Keherei de anui pelane de pie lo, n minadung.

10 N kemci namdidung au renaamkang nzwa bam dida;

Zion au renaamkang ge dida, Jerusalem au mta nrwa dida.

11 Anui gu kemci nah hezukeyi kerecaki, anui peime ncu ketwa de ga,

mi ne ngkap dida, nah hung süt kecu leune ngkap dida.

12 Nang dai nzwa cu de gim pwabam lu lai no, RAMPAUBO? Nang dainzwa nleimene anuide tei ngngam jüja bam laino?"