1 Ephraim zausak kelame dungne kekai kehegie peurwa, nah huidi kezeu kendu mapa de ziemne suisiet ge,

mapa peurwa hangdeu keyi Langkam ga zau ne ngam kedime peu ga kebam!

2 Ainie, Rampaube kengkieng nah kedige de langgai la; tangheu cui nah kengkap tingkai cui ge nzwa,

tingrui cui ge nah puikenlim duidung nzwa;

nah pa kendu peurwa ramsang kideu gage kelien nghung dizie.

3 Ephraim zausak kemieme kehelia peurwa de mi pidau tei dizie.

4 Ma lungh keyi langkam peuga pe kendu pa huidi kezeude,

tinglum dwa tangzüttsi meu keraibe nzwa, mige cide ngau eh

pe ba ga kebamdau, pa mnua lula.

5 Cipaunai pe mina bang kelumedung ziemne reugwame reu RAMPAUBE hezu keyi peurwa ge nah pe mina depeu nusunglu kera kendu peukangria ge dizie,

6 tutiak bam ga kebamme ziemne teu kensam rabe ge, nah penui riekidung ga ngauraume de gwacaili kedimedung ziemne kengkieng ge.

7 Dede aidungde liede zau gade tet mlia la, nah kengkieng zau gade tanglia la.

Cingkupei nah caihakecibe kengkieng zau gade tetmlia la, nah zau ne penuide mnwa lula.

Penui kengkieng zau gade tanglia la, mangdak gade nah kecet gade mnei eh.

8 Kesangde, taktyeibamdung pelane penui mrui le gum pwabam, iciu eh kemci ni gede gah eh.

9 Cau dage RAMPAUBE maci ledeu lai, nah cau dage pa sambe rangmci lialai?

Tungdui peu ta kedime dage mede tung gade keu kedime dage ni?

10 Kedanemene cide aja reu aja, aja reu aja; peuteu reu peuteu, peuteu reu peuteu;

aika kieekemak ge, luga kieekemak ge.

11 Kesangda, helet ketsam kerangme de teu eh pa mina aidung dage marang zie.

12 Ndaa pa penui dage ranggai, "Aide kemtak, leu kelame de kemtak peulo;

nah aide teikemcang," dede penui au kingnei lak

13 Cine RAMPAUBE samde penui dage

aja reu aja, aja reu aja; peuteu reu peuteu, peuteu reu peuteu;

aika kieekemak ge, luga kieekemak ge;

iciu eh penui mie eh kau caili, nah pangdi eh, hetak gage keu, nah tuilu kerane.

14 Cine nnui mide kii kelamedung, RAMPAUBE sam kingneilu,

nnui Jerusalem ga kebam mina aidungde reu kedi tei kelame.

15 Aide teicang luzie kedanemene nnui rangla, "Anui ketsai de ngngwa samkak luda,

nah ketsaime deu de ngngwa samting luda. Cine ngkiengsüt kecu saja kah kegwangdau, anuida gwang canglak.

Kedanemene anui kemret ge keu anui kensiube teilu, nah petau kemak gage nsiulu."

16 Ciziemne RAMPAUBE rangla,

"Ainie, Ih Zion gade tsubam ge,

pemi kehung kimiak tsuge, bangdwa kesang ge kaigai zie. Nlum kelume ngngam dilak.*

17 Ih kemzuibe pwa kemdet tuitie teizie, nah makesangbe pwa mdet zie.

Kemretdung gum kwak kebeu de tangheu ne diapung gi dizie nah duididung ne kembai bam de gumpung dizie.

18 Ketsai de ngngwa n samkak tei kelude nsungta dizie, nah ketsaime deu de ngngwa samting kelude sap bamlak.

Duidiet kah kegwangdau, nnuide gumpung dizie.

19 Cide kah kegwangdau, cide ne nnuide gumpung dizie,

nah tingcang cai tingcang cide kahgwang zie nah tingmui tingbadau cide gwang zie.

Sambe ci keludau, cide kengkap teigai zie.

20 Kedanemene mide nzanggai kera zeu be duizu nah pai be pecu kezui gai kera nrum zu."

21 RAMPAUBE Perazim Deutu nzwa cuhzie;* pa Gibeon Langkam ge nzwa eh pekatei cuhzie

pe ta tei kera,* pe tatei ketsam ge, nah pe ta ketsam teigai zie.

22 Cine nnui henui teiso, mecai nnui gu kangria de tei ntipki dizie.

Ih Rampaube reugwame reu RAMPAUBE dade kideube de ngkapdi kera hezai ge siuda. 23 Nnui lung kai eh a kwa kingneilu; mting eh a kwa kingneilu.

24 Heta ketame ge heleuh gi kerane tingba pelane de hangdeu puh lani? Pa pe luh ga tangdei tei takcai bam jüja lani?

25 Heta ketame hangdeu mtei luge, caraway tsileuh teizang gaila meni, cumin linggai,

wheat pesau tei eh kaigai nah barley pebam petau gage, nah mei keda luh tudung gage?

26 Pe Tinggwang pecu ranglia la; pa pecu ledeu mteusüt beula.

27 Cipau reude, caraway tsileuh tsingtie kerüt ge le dap lama,

mede cumin tsileuh de keniak gari le niak lama;

dede caraway de tsingtie gele dap nah cumin de hegeutie gele dapla.

28 Meitsi au tangku ziemne taulu dede yi cangsiak ma,

nah pe tum gari ta nah pe hekwendung cide teizang dide, pe hekwendung cide daumsiadi lama.

29 Aide de reugwame reu RAMPAUBE dade gwangla,

pa keledeudung au miswagah nah maci reu yicangsiak.