1 Makesangme kap gah dila, dede migede cide cet lama,

nah samkak kelu kesamsang minadung de ngngwa tetdi, dede migede cilu ma

makesangme kesiabe dade ngngwa tetdi kecu.

2 Keheibede masangbe ga tet kelame;

ketsai gade lungciep ngaulu nah mtak lula.

3 Dede aika mmau kera gwanglu, nnui reka ta keteipui napeidung,

kemmha ta ketei namedung nah mipui pekatei kemmha tatei kelame.

4 Cau de nnui suiyi eh henui teibam no?

Cau de renia eh n mui ngkei nah mleu hetwa pet bam no?

Nnui keregi kebamme name meni, kecwa taketei name meni?

5 Nang mhudung kangga ngngwa zip kebam gade nkatei ncu teimmau, kemdiak bang kang leune gade,

tsupop nzukebam kang, kecang reuki singdung gade nnui nnui name de pwa ratak tei beula.

6 Kemdui niadung hereuki langkam kakga kebam niadung de ncu nlum gai pwabam da. Penui ncu reca kera nia da.

Nang penuide zau reca rui gai beu nah mei reca tei cuh gai. Aidungde gade a sui yilu zie ni?

7 Nang lamlwatu kehu ga mamie ratak tei kera mteilu;

nang cika de reca ratakdung tei kerane hang.

8 Kikam cai nah kikamtsiadung ga nang ngu mamiedung tei nzeu;

nang acu gidi, ngkatei n nia gau di, nah tet hang; nang n zeulie teimdi lu.

Nang penui de ngngwa samkak lu; nang penui zeulie de nsui la; nang penui pum ga ngaubui kemakpe ngau da.

9 Nang ngu perim keyi nah macadung pütlu delwe Molech rabe de reca kera miela.

Nang n samgwame de kemdei ga langgi dida; nang Sheol ga nghung dida.

10 N beu kedei gade nang leu dida, dede madaude rangma, "Cide keregui ga."

Nang n ba gade teilung ngaulu; cine nang nnei di ma.

11 "Cau ziemne nang nlungkeherei bam no? Cau de hing süt eh nang mide kecwa tah teila no,

ciu eh nang acu nsung tadi mede acu mning tadi kera?

Kedanemene Ih sau tiege zingde bam di, nang acu hing sita dida.

12 Ih n masang tadung pelane rang zie nah nang tei kegai leune ranglia zie,

dede penui ncu ngha gailak.

13 Nang kengha kie kegai kecudau, ngu hekwakelu mamiedung de peu ncu kelilu.

Meliene tingkai ne penui pelane de pung tetti zie, ngicui ge ne penui pelane de pung tetti zie.

Ciuliede cauge a da nsiulu di bi hangdeu de gumlu zie nah a Kerecaki ga acu reca zie.

14 RAMPAUBE rangzeu,

‘Teigai, teigai! Lampui teimci gai! A minadung lampui gade puikam leune keugi di!’"

15 Kedanemene kehu ga Kebambe ne aide ranggai, kelungta ringkebam be, pe zi kemci be,

"Ih hutu nah kemci ni ga lungh, peda liede pangkedi nah pezai kehena rabe,

pezai kehenamedung rabe de tei mring beu kerane, nah helung keherei kelame rabe tei mring beu kera.

16 Cine Ih a minadungde mmau bam muilak, mede Ih a rata bam muilak,

kedanemene minadung rabe a dwaga de siakau di lubui, keringria Ih tei kegai de.

17 Pe zaisiet gade kemau tei kedi ziemne, Ih a rata di, nah Ih pecu saja peu gai; Ih a zu kebai nah a rata bam,

dede pa pe lungningbe tei eh caisim di.

18 Ih pe lampuidung ngau,

dede Ih pecu teingkei beu zie. Ih pecu teuswa nah tei relui beuzie nah pe ziemne pe suisia kelame lung taumla beuzie,

19 nah Ih muileudung tsi damgai beu. Kezuyi, kezuyi, kemdei ga kelame de nah kemna ga kelame de de, RAMPAUBE ranggai, Ih penuide tei ngkei beuzie.*

20 Dede kesiame au jaaidi cuidung nzwa, mtak gailak eh bamla,

nah cipau duidung nah tangdei de pung nswak.✝

21 Kesiame ge ziemne kezuyibe ga, de eh Tinggwang ranggai."