1 "Co renia kela namedung," aide RAMPAUBE ne ndugai.

"Penui au penui mariem riemlu, dede a dade ma; penui heleuh kedadung de ngngwa ket teilu,

dede penuide a rabe ne saubeu ma, cine penui kemau reuge ga kemau silu.

2 Penui Egypt ga nghung kera tetcuh, dede a puisau de keteu ma.

Pharaoh de peu penuide gumbeu kera peei, nah Egypt mie kangga nsiu.

3 Cine Pharaoh gum kebeude nnuida hengam ge dizie,

nah Egypt mie kangga kensiu de, nnuide tei kehengam ge,

4 penui hegwangnadung Zoan namdi ga bam liede, nah penui samgwame Hanes namdi ga gwang de.

5 Penui pelane ngngam dizie kedanemene Egypt penuide ngha gai kelak ziemne,

penui kengha mede kemmi gede peula kemakme, dede hengam ge, nah herüt kegah ge."

6 Tingbangle bie hetaideu ga makaunedung ha ndu kegai ge:

Keherei nah kengngi deu ga hinghopui nah hinghoseu,

neidui nah henei kerabe,

penui mahei gadadung cai gage pung,

nah penui mabamdung utdung reu gage pung,

penuide ngha gai kelakmedung dage.

7 Kedanemene Egypt ngha de au pemi gah;

cine Ih pecu Rahab* lie qu, zing de bam kelabe.

8 RAMPAUBE Isaiah dage rangbeu: Cu miecu, penui kebam gade tangtsukwak ge gage raulu, nah kehezui laisiukwak gage raulu,

iciu eh cide kaipwa paucai ting ga zierang gelu kerane.

9 Kedanemene aidungde kerenia minadung kenret namedung kecune,

RAMPAUBE rang kebeudung kingnei kelak namedung.

10 Penui marengei kengaume dage rangla, "Pie so;"

nah caihakecime dade, "Caiha kesangbe anui dage rangso;

siu keyibe samdung anui dage ranglo, kesang kemak caihasam ranglo. 11 Lampui gade mzialu, lampui gade mpet dilu;

peu Israel Kemcibe Tinggwang de anui dwa gade marang mtakti lu."

12 Cine Israel Kemcibe rangla,

"Kedanemene nnui sam aide luu kemakne

nah kemneu nah kecwa de nlum eh cide de ngngei kedine,

13 cine aipau maude nnui da lazie

pang kempet ge nghai mie kera mteikelu nzwa, kirie kehu ga makang ge

zette nghai kelwa mie kera nzwa."

14 Li keteibe li pang kedi nzwa pa cide teipang zie; pa cide bang beulak,

iciu eh pang takcai kelu kakgade ketakcai gede ngau gailak

mimang gade mi pwa mpet kera mede duibung gade dui twak mpet kera ziemne.

15 Kedanemene ainzwa eh RAMPAUBE, Israel Kemcibe rangla,

"Cailigwang nah mtak lude nnuide kelilu zie; ziune kecu nah nlum kecude nnui kengking zie.

Dede nnui neu lama.

16 Nnui rangdi, ‘Lak,

anui hekündung gade pak dizie,’ iciu eh nnui pak dizie;

nah, ‘Anui hekwen pak kemzetbedung reu gade pak zie,’ iciu eh nnuide ziu kelame nzetlu kerane.

17 Hangge keheu gaide cangge pak zie;

hang mengei keheu gaide nnui pak zie

nnui bangkelume lamlwatu peu ga pailim tsia ge nzwa mede kideutu ga pailim ge nzwa di kemaktane."

18 Dede RAMPAUBE au nnuide hung eh kwabam, cine pa au nnuide ngaugia keulia kera mtei pwabam.

Kedanemene RAMPAUBE au kemzui Tinggwang; pecu kwa kebamme samlam pungtu.

19 Minadung Zion ga nah Jerusalem ga lungh zie, nah nang hap silak ta.

Nang kengha kie gai cai pa au ncu ngaunggia bizie. Pa cide siu lude, pa ncu kelibeu zie.

20 Tinggwang ncu keherei kecu tangku nah keherei kecu dui peu liede,

iciu liede, n keledeube pekatei pecu hebai silak ta, dede nkatei n miakle n keledeube de ngau zie.

21 Nang zetle ge nreu gai mede hile ge nreu gai liede n cai gade sam rang eh pe kwa siu zie,

"Aide lampuibe da, aika tetlu," de eh.

22 Ngu mamie rangkanggeu nah kecakle teilwe kai kenzeu de gi dizie.

Nang cidungde pai kehera ge nzwa kelien gi dizie. Nang cidungde dade, "Aika de tetdi lu," de rang zie.

23 Ngu heleuh ziemne pa tingrui peu zie nang kideu gage ling kegaidau,

nah kideu gade tangku kekiee ge, nah meitsi kekiee ge peu zie.

Cipaunai n kauruine tsehei deu gade ma peei tyei zie.

24 N luh puu kela ketum nah gadadung taktyei keyi tyei zie

peitwak nah kehwatie le hepet ntsam kelube.

25 Reketbam kaumie eh mina kekiee de tei ketset benai,

lamlwatu kehu nah kideu kehu leune gade reuceu nah reuceunadung gade dui lwa zie.

26 Hekei kebaa tingnaimiak nzwa zie nah tingnaimiak kebaa pia hena kiee ge baa ki zie, lang henane ba nzwa zie.

RAMPAUBE pe mina rezam kebam de kang dizie nah penuide rejam kedi zamdung teingkei beuzie.

27 Pielo, RAMPAUBE zi heni kemdei gade gwangla, pe rata heu eh nah mika nzwa.

Pe muileudung au rata le pui, nah pe mleu au tyei zette di kelabe mi nzwa.

28 Pe ngicui au puikenlim rata lwa pwa pe ngngwang sumbe ga kecang nghang kebam nzwada,

heleuh dungde kengkap teu eh zangra di kera. Pe ngicui au mina tangkei ga keuteu kela heria ge nzwa, peu penui lam tsam tetdi kera.

29 Nnui tingmui kemci hengyi kemnei nzwa lei tei zie,

nah mige terwaine teu eh RAMPAUBE Kerecaki, Israel Tsura ga kehang nzwa, nnui mlung sui yizie.

30 RAMPAUBE peu pe kwa kemdu de siu luzie nah pe ba mlai de keulia zie

rahang rata nah miheu gade, tingkai kaici, tingruicui nah tangheu gade.✝

31 Kedanemene RAMPAUBE kwa gade Assyria au takcai dizie; pa penuide tsingtie gele dap zie.

32 RAMPAUBE penui reu gage dap kegai msangne

tambourine kwa nah leibung kwadung si zie, pa penuide hereu gade regi kecudau.

33 Kedanemene keru bam ge nda ge de mtei teula. Kesangbe au cide hegwangpei ziemne telei teula nah Tinggwang ne cide teimza nah tei ncok gai.

Tsing kekiee ge nah mi teu eh kerubam mtei luda.

RAMPAUBE ngicui, miheu reuki nzwa, cika mi mtau gai zie.