1 Pielo, RAMPAUBE ba au dui ham eh keli gailak dilak; mede pe kwen ham dima, iciu eh cide siu gailak di kera.

2 Iciuliede, n kemau tadung, dene n Tinggwang dade ncu teu lamcam dida,

nah n maudung ne n dade pe zu kebai nah n kekie keli beuma.

3 Kedanemene n badung au hejai ne hera dida nah n ba zurangdung kemau ne.

N muileukung kenret rang nah n mleu makesiabe rang.

4 Migede masangbe gade qu ma, nah migede pe ziemne kesangbe gade ngaugia kie ma.

Penui kemrwa samdung de nlum la, nah kenret rangla; penui keherei tetlak lu nah kemau de nna beu la.

5 Penui henei ra kecu bumdung mbum gai nah tamriakpe ra dak la.

Penui gu bumdung tyei kelume tsai zie, nah magade bum ge pang dicai, cide henei ra kecu ge mmi dila.

6 Penui gu peradung de paiheni ziemne keu gailak, mede penui tahdung teu penuikatei penuide hacim gailak.

Penui tadung au kemau tahdung, nah zaisiet tahdung au penui ba ga la.

7 Penui pidung kesiabe gage pak gai dila, nah penui mina maukemakme jai tei lwa gai kera zui la.

Penui lungningdung au kemau lungningdung; keregi nah kengkap de penui lampuidung da.

8 Penui kezuyi lampui ci lama, nah penui lampui ga kemzeube ga.

Penui lampui tei nkoi pwabam; cipau lampui ga ketetme leune kezuyi de ci lama.✝

9 Minadung rangla, "Cine kemzeube au anui dade mdei bam, kesangbe liede anui da gwangcang ma.

Anui kebaa de kwabam, dede kemuibe ngau; anui kebaa de peeila, dede anui kemui ga tetla.

10 Anui miakcietme nzwa tangdeu hemiet la, mina mangau kemakme nzwa.

Tinghegi dau nzwa anui tingna dau ma nrap la; kengkingme kakga de anui au ketsaime nzwa.

11 Anui hegumdung nzwa mrung nah tamhaudung nzwa mra la;

anui kemzeube de kwa la, dede kemzeube bam ma; kelilu kera ziemne, dede cide au anui dade mdei dida.

12 Kedanemene anui teimau kedidung kekieege n dwaga bam, nah anui maudung anuide kemmau zierang tei;

kedanemene anui teimau kedidung anui da la, nah anui maudung anui cibam.

13 Anui renia, RAMPAUBE de mlai nah anui Tinggwang caisui ketei gade mreu tetdi.

Anui kemneu rang nah mria tet, helungbe gade lungcet kesia pung nah kenret samdung.

14 Kemzeube au keu caili dida, nah masangbe au kemdei ga sapbam;

kedanemene hemaabe kengkwa bam ga makesangbe puikam teila, nah kesangbe gwang gailak.

15 Nlumlu kebui de gah dida, nah kesiabe dade mria kelume pecu le kemaube lie di.

RAMPAUBE cide ngau nah kemzeube bam kemakne pesui lu tadi.

16 Migede bam kemak pa ngau gai, nah migede ngngwa kangzang lu kera gah kecune pe swagah di.

Cine pekatei pe ba ne pecu kelikelu teugwang beu, nah pe masangbe ne pe teilung tei mtie beu.*

17 RAMPAUBE masangbe le hekarakcum nzwa kailu nah pe peu ga kelikelu le peurwa teilu.

Pa hekum peei kecu niadung le pecu cumlu nah neungga kedi lungning cwatie nzwa bahlu.*

18 Penui tei kegaidung ziemne pa saja penuide peu, pecu renia kelame de rata tutiak peu, pe ngauraume dade hekum pei, duigwadeu ga kebam deudung dage penui ziehi nzwa saja peu.*

19 Ciu eh penui naimiak kenlütle gade RAMPAUBE zi de hinglu zie, pe kendu naimiak kepetle gade; kedanemene pa dui kedi nzwa gwang zie, RAMPAUBE cuingi de teuswa gwang zie.*

20 "Kelibeu kera ge Zion gade gwang zie nah Jacob gade penui samzai teikemak gade nreu caili kelume da, aide RAMPAUBE ne ndugai.✝

21 A ziemne au, penui ziemne aide a samkak da, RAMPAUBE rang, a rabe n da kelade, nah a samdung Ih n mui gage kaikebeu de, n mui de gidi lak, mede n namedung mui gade mpetti lak, mede n tsamedung mui gade mpetti lak, RAMPAUBE rang, cu gade nah kelungta."*