1 "A dwa gade zing de eh kingnei lu, nnui jaaidikung deudung; peu ge heleuhdung de penui kengking tei heci dai lu;

peu penui de gwang mna lwe marang lu; anui gwang ncüt lwe dai petau bi resiu gwang go.

2 Naimiak kepet lede gwakelube de cau no, pecu makesangbe ga qu eh pe ta tei kera?

Pa heleuhdung pe reu gage kai beu nah hegwangdung de teu kera pecu ngha.

Pa penui de pe kingtie le rebui tei di, pe heleilakpi ne reigau gui zangra kedi nzwa.

3 Pa penui caisui la nah kwak eh tet kahgwang la, pe lampui mzet zu kela ne pepi hangdeu tung tadi nage la.

4 Caune aipau tadung de tei gai nah tei canglu dino? Cau ne raitu gade ceheudung de qulu dino?

Ih, RAMPAUBE, raitube, nah kamtube de, Ih au pa.

5 Duigwadeu cide ngau da nah penui hing bam dida; kideu penli dung mlai di;

penui cika gwang.

6 Migege de pekidame de ngha, nah migege de ket ket de rang, ‘Kuu bamlu.’

7 Cine tsingta keteime kecak kerekime de tei kecung lu, nah cauge hegeu teisang ta tei kelame cai ge geu kerüt tah teila bi pecu de tei ngkuu lu,

geu ru kau kecu de rang eh, ‘Cide au yi’. Penui gojal le gia ncüt lu pereu ga kau kelak ne.

8 Dede nang, Israel, a kilabe, Ih ne kedet kelube Jacob,

a zangbe Abraham leuhme,

9 Nang au Ih kideu penli gade ngngwa gwang dai kelube, nah Ih deitu henidung gade qu kelube,

nah Ih ainzwa rang, ‘Nang au a kilabe;’ Ih ncu kedet luda nah ncu mlai dima. 10 Ngngi di so, kedanemene Ih nda la lu. N mlung ceu diso, kedanemene Ih n Tinggwang.

Ih ncu tei ngking beu zie, nah Ih ncu de ngha beu zie, nah kesamsang a ba zetle le ncu de teu ncuh beu zie.

11 Pielo, penui ngngam dizie nah hengam tei dizie, pelane cau ge ncu perata la bi;

penui au ma gede kemak nzwa gahdi zie, ncu renia kelame.

12 Nang peei zie nah ncu renia kelame dung de ngau lu ta di zie;

ncu regie kelame ma de kemak nzwa di zie, magede mezing.

13 Ih, RAMPAUBE n Tinggwang, n ba zetle herak lu zie kecune,

ncu rang eh, ‘Ngngi di so; Ih ncu ngha bam.’

14 RAMPAUBE rangla, "Ngngi di so, Jacob nang tangseu, nah nang Israelme pei;

Ih ncu ngha beu zie, aide RAMPAUBE rang kegai be, n keli kelube, Israel Tinggwang kemcibe.

15 Pielo, Ih ncu ciuneutie pemui keyige nzwa tei beuzie, keheci nah pemui kena;

nang lamlwatu neuzie nah penuide tei takcai dizie; nang kideutudung de ciurie nzwa tei dizie.

16 Nang penui dage tingkai guigai zie, nah penuide tingkai ne pung tetdi zie; tingkai ne penuide tei zang dizie.

RAMPAUBE gade nnui suiyi lu zie, nnui suiyi lu zie Israel Tinggwang kemcibe gade.

17 Mine kegahme nah keherei kelame dui peei, dede cika kette gah, nah penui mleudung hereu eh cangh di;

Ih, RAMPAUBE, penui kekie dung keli beu zie; Ih, Israel Tinggwang, penui de pütti lak.

18 Ih reuceunadung lwa hung kera teibeu zie, nah duipindung langkamdung kakga;

Ih hangdeuketsai de tei pwa dui zai teidi zie nah kecang deudung de duipwak dui teibeu zie.

19 Renaamkang ga Ih cedar kai gai zie, acacia, nah myrtle, nah olive bang.

Ih hangdeuketsai langkam ga cypress kaigai zie, helei nah cypress bangdung de si eh.

20 Ih aide teigai zie iciude minadung ngaulu kerane, cilu, nah cet nsamlu kera,

RAMPAUBE ba ne cide teigai lie kecu, Israel Tinggwang kemcibe ne cide teigai lie kecu.

21 "N ha ndu lia lu," de RAMPAUBE rang,

"Nnui gu mamie dung ziemne nnui lungning yitu be ndu gai lu," Jacob gwangpei cinzwa rangzeu.

22 Peu penuide penui lungningdung teugwang lu; penui de pe dwaga peu gwanglu nah anuide daitei zie bi peu ge ndu gai,

ciu eh anui ma aidungde ci mmi lu kerane.

Peu penuide anui dage ndaa mrai ndu kegai dung de rang gai beulo, ciu cai anui cika pie caili lubui nah dainzwa tei cang bi kecu ci luzie.

23 Aipau cai daitei di zie bi rang gai lo, ciu de nang rabedung lie kecu anui cilu kerane;

makeyi mede kesia ge tei gai lu, cinzwa eh anui de tei ngngi nah anui ci nting lu kerane.

24 Pielu, nang mamiedung au kemta nah nnui batadung au kemta; ncu kedet kelube de au kemneeu.

25 Ih tingpeule de mige de teu cuhlu, nah pa gwang; tingnaimiak kepet lede Ih pecu qugai cauge a zi qu bi,

nah pa kengking keteume dungde tangdei nzwa pidau tei dizie, li keteime ge lidei keniak kecu nzwa.

26 Cau ge ne raitu gade ndu gai no, anui cibam lu kerane? Aipau ting dwa ga, anui rang lubui, "Pa au petau"?

Kesang migede hezai mzai ma, yeo, migede nang marang kecu kette siu ma.

27 Ih, RAMPAUBE, Zion dage sam aide rang kebeu raitube, "Pielu aika penui bam da;" Ih Jerusalem ga samgwame gede langgai.

28 Ih herabe dung kakga pie kegai dau, migede gah, penui kakga migede samkeyi rang kerame gah,

cauge, Ih keteu kegai dau, sam kelilu kera bam no.

29 Pielo, hera aidung pelane au kemta,

and penui tadung au kemta; penui gu rekikelu hegeu miedung au tingkai nah mrwa cwa.