1 Ainie Egypt ga kengha ziemne nghung kecumedung nah hekwendung da ngngei kecumedung,

nah bagi dungde nlum eh (cidungde au kiee kecune) hekwen keteume dungde (cidungde au peikap gai kelak ge kecume).

Dede penui au Israel Tinggwang Kemcibe de helung kaima, mede penui RAMPAUBE de peei ma!

2 Iciuliede RAMPAUBE au mteu, nah pa kengkap teugwang gaizie nah pe samdung teucaili dilak.

Pa kesiame ki de renia cuhzie nah kemau ketei kenghame dungde renia zie.

3 Egypt au mina ge nah Tinggwang ma, penui hekwendung au pumteeibe nah rabe ma.

RAMPAUBE pe ba hwapet kegaidau, kenghabe hangna nade kau dizie, nah ngha kebeube liede kau dizie; hangna na ngngwa tsai dizie.

4 RAMPAUBE a dage ainzwa ranggai,

"Hingho ge nzwa, heriheret hingho ge liede, pe taktyei tui kelube dade mra la,

meurün kekwamedung maa gene cide ncau eh sahbak kegaidau,

dede penui kwadung ne pa mbeu dima, mede penui kwa ne nriatet dima;

cine reugwame reu RAMPAUBE Zion Deutu ga regi kera nghung, cipau deutu ga.

5 Nruinedung lim kelanzwa, cinzwa eh reugwame reu RAMPAUBE ne Jerusalem de gum beuzie;

pa ne gum nah kelilu zie pa cipaureu tetkak nah cide kaizeu lula.

6 Israelme nnui ngngwa reniasüt kegaibe RAMPAUBE da cailigwang lu. 7 Kedanemene cipaunai hangge ge kecu pegu rangkanggeu gu mamiedung

nah pegu kecak gu miedung nnui katei nnui ba kemau gele tei kelude keliengi dizie.

8 Assyria au kiengtie gade kau dizie; mina ne keula kemak kiengtie gene pecu ngkap dizie.

Pa kiengtie dade pak dizie, nah pe mina heriheretme depeu tahung tei kera ketang zie.

9 Penui ngngisüt kecu ziemne teilu kera kenlum kebam leune gah dizie, nah pegu hegwang napeidung RAMPAUBE gu hereu pailim ngau kegaidau ngngi dizie,

aide au RAMPAUBE ne ndu kegai ge, Zion ga pe mi kebambe nah Jerusalem ga pe mibung kebambe."