1 RAMPAUBE rangla, "Ainie, a kilabe, Ih ne teu ncuh kelube; Ih ne kedet kelube, Ih pecu asui lie.

Ih pereu ga ge a rabe kai gai dida; pa heleuh dung de kemzui keugwang beu zie.*

2 Pa ma sah mede nrung lak, mede puidikidung ga pekwa siu kera tei lak.

3 Pa hekuu kiakmie kebam de teicum di lak, nah helei mmüt di lai eh kebam de pa tei mmüt di lak:

pa samsang eh kemzui be tei gai zie.

4 Pa au pe kengkieng mede keregui de gah dilak

kideu ga kemzui be teu gwanglu kemak ta;

nah jaaidikung deudung pe keledeu kwa bam.

5 RAMPAUBE Tinggwang pe kilabe dage ainzwa rang,

Tinggimdung damgai nah teimdi kegaibe, kideu tei kegaibe nah cika lungh kepet pelane,

minadung de cuingi peu kegaibe nah lungh kebam dung de kering kepeube:

6 "Ih, RAMPAUBE, ncu kemzeube gage qulu nah n ba kerak teula zie.

Ih ncu kai nzeu zie nah minadung ziemne samkak kelu ge tei zie, Gentileme ziemne kebaa ge zie,*

7 miakcitme miakdung tei mrak beu kera ziemne, hangdeu kang hebaangki ga kebammedung de,

nah kemui ga bam kela baang kenzeu ki gade lungmpet beu kera ziemne.*

8 Ih au RAMPAUBE, cide au a zi;

nah a kendu Ih kedame de mzi lak mede a ketwa de tei kelu mamiedung de mzi lak.

9 Pielu, pedwa dung de gwang cang lada,

cu au Ih ma kehecidung de ndu lia zie da.

Penui gwang di kemak dwa Ih penui ha ranglia zie."

10 RAMPAUBE dage lei keheci ge tei gai lu, nah pecu twa lu kideu penli gade;

nang jaaidi kang hung kelabe, nah cika kebam pelane, jaaidikung deudung, nah cika lungh kebamme.*

11 Peu hangdeuketsai deu nah namdi dung de mrung gai, Kedar lungh kebam renamdung de peu suiyi sah lu!

Sela namdi ga kelunghme dung de peu lei tei lu; peu penuide lamlwa twangdung gade sah lu.

12 Peu penuide RAMPAUBE de kemdu peulo nah pe hetwa jaaidikung deudung ga ndu gai lo.

13 RAMPAUBE reugwame ge nzwa tetpet zie; hereu keteibe pei nzwa pa ren de cuh dizie.

Pa sah zie, yeo, pa pegu hereu kwa sah mrung zie; pa pe ngauraumedung de pe kengking pwa lia zie.

14 Ih peting ketie ge mlei mene bam dida; Ih sünne eh akatei acu kezeu pwa bam;

cu au Ih mipui kemna tetteei kecunzwa mragai zieda; Ih ngngi mzetsüt dizie.

15 Ih lamlwa nah kideutuhdung ngkap dizie da nah penui gu tsehei gineidung pelane tei kii dizie;

nah Ih hereukidung de duigwadeu dung tei dizie kehwa deu langkamdung de tei cangh dizie.

16 Ih miakcietme de ngngwa gwang zie penui ci kemak lampui gade; lampuidung penui ci kemak ga Ih ne penui puisau tei zie.

Ih penui dwaga kemui de kebaa tei di zie, nah kenkoi nidung de tei mzui di zie. Aidung de Ih tei zie, nah Ih penui de gidi lak.*

17 Penuide teu caili dizie, penuide hengam ga ge kaidi zie, mamie de nlum kelame de,

hegeu mie de ainzwa rang kelabe de, "Nang au anui rabe."

18 Kingnei lu, nnui kwenpangme; nah pielo, nnui miakcitme, nang ngau lu kerane.✝

19 A kila swade cauge pe miak citgwa no? Mede pe kwen pang no Ih lang kegai a samgwame nzwa?

Cauge a samkak kelu zangna nzwa miakcit no, mede RAMPAUBE kilabe nzwa miakcit no?

20 Nang ma kekiee ge ngau, dede cide ci luma; kwen dung ngkei pwa bam, dede migede siu ma.

21 RAMPAUBE pe kemzeu de twa kegai pesui la nah pegu hezaidung tei ndu kegai de.*

22 Dede aipau minadung de au mine cwa nah süt teu kedime;

penui pelane de hekwakidung gage baang nzeu dida, hebaangkidung gage kebai dida;

penui au sütteu kedime ge mi de keli beu kera kegah ge tei dida, nah migede rang ma, "Penuide teu cailigwang lu!"

23 Cauge nnui kakgade aide kingnei lai? Caineu ne cauge kingnei nah siu lai?

24 Caune Jacob de sütketyeime reu gage ha di no nah Israel de keregame dage?

RAMPAUBE ne meni, anui pedage kemau tei gai kedibe,

penui cau lampui ga tet gai kera mlai di no, nah cau gu hezaidung mzai lu ta dino?

25 Cine RAMPAUBE perata siasüt kecu Israelme dage ruigai nah hetei hereu de,

mi le penuide twagwalu, dede penui ci luma;

cide ne penuide ru ngkap di, dede cide penui penui mlung gage keu gai luma.