1 Babylonme ziemne sam ge, Amoz napei Isaiah ne Tinggwang dade ngau kelu:

2 Lamlwa kwak kebam gage marehi lia kera pailim pwacuh lu, reugwame dage sahbak gai,

penuide peu kedime kirieki lung lwetti lu kerane n ba kezit gaibeu.

3 Ih agu kemci minadung de aja kaibeu dida,

yeo, Ih a mina kengkiengmedung de qulu da a rata gai kerane, a kedi de suiyi kelamedung de de si eh.

4 Lamlwatudung ga mina maadi mra kegai kwa, mina kekieege kenzwa ge!

Heleuh kekieege ngkwa ncüt kelube nzwa zie hegwangramdung hemaa maadi mra kwa!

Reugwame reu RAMPAUBE hereu tei kerane reugwame kekieege de hekwabam.

5 Penui kemdei deudi gade gwang, kideu penli gade.

Cide RAMPAUBE tutiak niadung teu delwe, kideu be de ngkap ti laizeu.

6 Suisiet kwa teu mralu, kedanemene RAMPAUBE tingba mna gwang zeu; cide Ngkiengtube Tinggwang dade ngkapti kera gwang.

7 Ciziemne mina badung leune zaura eh mzu zie, nah mileune mlung sui dizie.

8 Minadung ngngi dizie; hena kemnapui ge nzwa keteei teeisüt kecule penuide kerakteu dizie.

Penui swagah eh penui hangge ge da kerepie dizie; penui zudung miheu ge nzwa dizie.*

9 Pielo, RAMPAUBE tingba au lunghop Kesia nah rata kepui tei eh gwangzie,

kideu de kemta teidi kerane, nah cika kebam kemaumedung de ngkapti kerane.

10 Tinggim ga hegi leune nah hegimaadung penui kebaa peu ta dizie.

Tingnaimiak baareirang kecu dau de mui dizie, nah hekei de baa ta dizie.*

11 Ih kideube de pe kesia ziemne, nah kesiame de mateu nsam ta kedine saja peu zie.

Ngang kelame zaisiedung Ih tei nggah dizie nah pezai kesia ngaugia kegahmedung de tei ngkau dizie.

12 Ih ring kebamme de kecak swade ngaupa kelage tei dizie, nah mina luilungh kemci Ophir kecak swade peeipa kelage tei dizie.

13 Ciziemne Ih tinggimdung tei mbeu dizie, nah kideube de kecui kelai pwa pebam ga bam ta dizie,

cide reugwame reu RAMPAUBE lunghop gade zie, nah pa perata sia kedibe nai zie.

14 Babylon ga sangme lungh kebamdung heti gede rehume ne gwa kela nzwa mede meurün pe kekwabe kegah nzwa,

mina leune de penui katei penui leuhme dage nreu cailigwang pekatei peram gage pakkai dizie.

15 Ngau kelu leune de teitsetti zie, nah tuih kelu leune kingtie gade tsai zie.

16 Penui nepamnadung de de penui miakdwa gade hekei kecai dizie.

Penui kidung tei msia dizie nah penui naudung de teuh dizie.

17 Pielu, penuide gwaketang kerane Ih Medesme lung teigai lai bam dida,

cipaume rangkanggeu de de masi peilak, mede kecak gede penui mca swalak.

18 Penui lakpidung ne heluibuame de kap ngkau dizie;

penui nepamnadung de de ngaunggia lak nah hename de kenggia teu eh pielak.

19 Iciu eh Babylon, mileune mca bam kela hegwangramdung, Chaldeme hegie bam kela hezukeyi,

cide Sodom penai Gomorrah namdidung de Tinggwang ne ngam kelu nzwa.*

20 Babylon migede gum lak mede lungh mene ceheu ge gade ceheu ge gwang dizie.

Arabme pe paiki cikage limlak, mede meurün kekwame de penui meurünhau de cikage mtak kera gwagai lak.

21 Dede hetaideu gade renaam kaunedung cika bam zie. Pe nui kidung ga biangkang le pui dizie;

nah ruitiedung nah renaam meudung cika nsak eh lungh zie.✝

22 Penui kudadung ga maiserungdung hapzie, nah hezu keyi hegwangkidung ga heneudung bam zie. Babylon ting mna dida, nah petingba ziedung ri dilak.