1 RAMPAUBE Jacob da pe ngaugia bam zie; pa Israelme de kedet dailu nah penui deu penuide pwapeu daizie. Sangme penuide ncütlu zie nah Jacob ki ga ngngwa hekang zie. 2 Heleuh kekieege ne Israelme de nghabeu eh RAMPAUBE penuide kepeu deu ga cailigwang gwang dai luzie. Nah Israel kilungmedung penuide RAMPAUBE deu gage ngngwa gwang kilapei nah kilapui tei zie. Penuide tui kelame de penui teu penui bang tei dizie, nah penuide tei keherei kelamedung reu penui kedi tei zie.

3 RAMPAUBE nnuide kemtak kepeube nai nnui keherei nah teei kela gade, nah nnui kemei tei eh peu mata kewhung ketei gade, 4 nnui aipau henui lei Babylonme gwangpei dage teigai zie,

"Dai nzwa delwe mide tei keherei kelabe penli dau zeu no, ngang kela rata penli gwang dida!

5 RAMPAUBE ne kesiame tuitie teipang dida, hegwangme tuitie kengking de,

6 cide mtak mene mina de lunghop teu delwe kebiet eh dap bam kela de,

iciu eh heleuhbe reu rata teu hegwang tei kebam de, nah kezeu mezing delwe ketang kebam.

7 Kideureu pelane mtak luda nah zingde luda; penui lei tei eh renga cuh dida.

8 Cypress bang kecang de Lebanon cedar bangdung de ngngwa n peureu gade penui suiyi renga bam dida;

penui rang eh, ‘Ncu tei hena kedi nzwa, tsing kebime gwang anuide bi ngkau kerame gah da.’

9 Nang Sheol* ga nghung kecudau, ncu dau kera regui bam dida.

N ziemne ketsaime de nkia ncu luda, kideu ga hegwangdung pelane de de,

penui hegwangbamdung ga peu cuh dai kap luda, heleuhdung pelane hegwangdung.

10 Penui marang eh n dage mra gaizie,

‘Nang de anui nzwa mnei dida. Nang de anui nzwakap dida.

11 Leibung kwadung de ngngwa ketsaideu gage n kengkieng cak nghung gai dida.

N cidung n kangga pui nah tangseu ne ncu hezui luda.’

12 Dainzwa eh nang tinggim gade cakmie lu dino, tingna gibo, tingcang napeibo!

Dainzwa eh ncu hangdeu gage keling nghung dino, nang heleuhbedung de ngam kelabe!*

13 Nang nkatei n mlung gade rang da, ‘Ih tinggim ga hangcang zie,

Ih a hegwangbam keu cehu pwa Tinggwang gu hegidung swade huzie,

nah ngkwa kela lamlwatu ga bam zie, cide tingpeule kemdei ga.*

14 Ih hemwadung hutube reu hang zie; Ih akatei acu lepwa Tinggwang Hutube nzwa eh tei zie.’

15 Iciu meliene cu au ncu Sheol gage teu nghung dida, hekwaki cuktu gage.*

16 Ncu ngau kegaime ncu pieling zie nah penui n dage penui lung kai dizie.

Penui ainzwa rangzie, ‘Mina aide kideube de tei mbeu bam kelabe de deni, pa hegwangramdung kecui kelai kelabe de,

17 pa kideube teipwa hetaideu nzwa tei kedibe, namdidung ngam kelube nah pegu hebaangme dungde peu kilung gwang kemakpe de meni?’

18 Heleuhdung pelane gu hegwangmedung,

penui herüt teu eh hangge ge kecu penui katei penui rauga zeu.

19 Dede ncu au tsingkiak kelien kedibe nzwa n rau gade de gwagi dida.

Ketsai ne ncu paini ge nzwa hezui luda, kiengtie le huih kedimedung, hekwaki tsudung ga nghung kelame.

20 Ncu au hegwang kedame de nzwa kunglak, kedanemene nang n deu teingkap dida

nah nang n mina dungde teitset dida.

Makesia ketei namedung de madaude nsung dailak."

21 Aipau hegwangpei namedung de teitset kera mtei lulo, penui paume mau ziemne,

iciu eh penui cuh delwe kideube gumlu nah kideu pelane namdidung le tei puih di kelakne.

22 "Ih penuide renia cuh zie", aide reugwame reu RAMPAUBE ne ndu gai.

"Ih penui zi Babylon gade kemai dizie, pe leuhdung nah penui namedung", aide RAMPAUBE ne ndugai.

23 "Ih pecu biangkang ne gumteu kedi ge tei dizie,

nah rejaai ge tei dizie, nah Ih pecu kengkap kaibiak le biak teu dizie", aide reugwame reu RAMPAUBE ne ndugai.

24 Reugwame reu RAMPAUBE sampet luda,

"Kesang, Ih cet kelu de kesiakke, cinzwa eh gwangzie;

nah Ih riam teu kela de nzwa, ciciu luzie:

25 Ih a deu gade Assyriame de teipang dizie, nah Ih a lamlwa gade pecu a pidau teizie.

Iciu eh pe ngwanggai penui dade keucuh dizie nah pe reidung pe keutu gade keuteu dizie."

Iciu eh pe ngwanggai penui dade keucuh dizie nah pe reidung pe keutu gade keuteu dizie."

26 Mariem aide kideureu pelane dage teigai kera cet kelube da, nah heba aide hwapwa heleuh leune reu gage kai kelube da.

27 Kedanemene, reugwame reu RAMPAUBE ne aide riemlu da; caune pecu kamlu lai? Pe ba pwacuh dida, nah caune cide keu caili lulai?

28 Hegwangpei Ahaz tsai kedibe kum ndu kegai sam aide ada gwang:

29 Nnui Philistinme, nnuide kedap tie tsum di delu de nnui suiyi bamso.

Kedanemene henei leuh gade henei keheibe de lungh cuhlu builu,

nah penadung au lim kela miheu nei gezie lu.

30 Ma kegahme neraidung penui meurün de peu a luhpak gade taktyei peu tyei zie,

nah makegahme kwak eh lungh dizie.

Ih nnui mah herakum le teitset dizie

iciu eh ringkebammedung de de ketsai gage kaidi kerane.

31 Rieki ga mra eh kengha sahgailo, namdi go; nnui pelane de sui tet dizie, Philistia go.

Kedanemene, tingpeule de mika hemwa ge gwangla,

nah pe kedi kangga kenghet reugwame gede gah.

32 Dainzwa eh penui cipau leuh Philistia samgwabe dage samli peulai?

"RAMPAUBE ne Zion ndeu luda, nah teei eh keherei kela pe minadung pe dade kensiuge ge ngau luzie."