1 Pielo, hegwangpei ge kesamsang gade hegwang teu zie, nah hegwangname kemzeube gade teu zie.*

2 Hangge ge kecu au tingkai gade kensiu ki ge nzwa zie nah rahang gade kensiu ge nzwa,

kecangh bam ge ga reuceudung lwa kebam nzwa, leu kedi deu ga tangtsukang kedi ge mie nzwa.

3 Pecai pie kegaime miakdung miakmai dilak, nah kingnei kegaime kwendung kingnei sünne luzie.

4 Macet teune kemakme maci bam eh macet sünne dizie, nah pelet nsii cume rang nci nah rang relui dizie.

5 Kemieme de rüt lubui lie qu si lak, mede mide kecwa mede makesangme lie qu si lak.

6 Kedanemene kemieme au kemie sam rang la,

nah pe mlung ga kesiabe nah nlum kemak tahdung riam la, nah RAMPAUBE de renia eh petau kemakpe rang la.

Pa mzeu kelame de tei mrwa dila, nah hereu kelame de peu dui sak melu kera tei la.

7 Mide kecwame keteibedung au kesiabe. Pa kenretdung le kegahme de

tei nsia kera heciem kesiabedung riem la, kegahme petau be rang kegai dau liede.

8 Dede rütlu kebuime ge au rütlu kebuidung riem la; nah pa rütlu kebui tahdung tei kegai de ziemne pa sap bam luzie.

9 Cuhlu, nang mipui relui kebammedung, nah a kwa kingnei lulo;

nnui lungrei kegah napuidung, a kwa kingneilu.

10 Kedanemene mmi ge swa kiee nakke kecudau n kenlum de gah dizie,

nnui lungrei kegah puidung, kubetsi luhlüt kera teilu ta dizie kecune, keu hekwa kecu de gwang lak.

11 Mbeulu, nnui relui kebamme puidung; kehereilu, nnui madedu melie kebammedung;

nnui paini keyidung radi nah nnui katei nnuide tei paaula lu; rosopai le nnui kiakang gage kailu.

12 Nnui luh keyidung ziemne hap zie, kubetsi bui süt kebam ziemne.

13 A minadung deu au hetu nah hetubang ne lungh pui dizie,

nggwa kenlwang namdi ga ndaa suiyi kepui kidung pelane ga liede.

14 Hegwang ki gi dizie kecune, mina ne kepui tei kebam namdi de püt dizie;

kideutu nah reketbam au kelungta tsupopdung dizie,

renaam gadadung ziemne suiyi ge zie, kauhaudung taktyei bamge zie;

15 Nreu le de anui dage Tinggwang pe Rabe ruigai kemaktane,

nah hetaideu au luh petsi buisüt cuge dizie, nah luh petsi bui süt kecu gede hegung ge lie dizie.

16 Pecai kemzeube hetaideu ga lungh dizie; nah kesamsangbe luh petsi bui süt cu ga lungh dizie.

17 Kesamsang ta au kezuyi zie; nah kesamsang tah ne ziune kecu nah kenlum kelunghta peula.*

18 A minadung lungciep bam ga lungh dizie, kwak eh bamlu kera kidung ga, nah ziune eh kemtak bamdung ga.

19 Dede magade tangheu kei liede nah hegung tei nsia di liede, nah namdi tei nsia ciak dide, 20 nnui cau reuceudung leune tai ga gi kegaime samlam pung luzie, nnui hetumseu nah gadadung petak tyei kera lang mpet kegaime.