1 Egyptme ziemne ndu kegai ge.

Pielo, RAMPAUBE hemwa gade mzet eh Egypt ga gwang lada;

Egypt gu mamiedung de pe dwa gade mbeu bam dida, nah Egyptme ngngi eh penui mlungdung suih dida.

2 "Ih Egyptme kakga ngngwa kesia kaigai zie: Mige pe sinabe de renia zie, nah mige pe kidabe de renia;

namdi ge namdi keda gede renia zie, nah hegwangram ge hegwangram keda gede renia.✝

3 Penui kak gade Egyptme rabe mnei dizie. Ih pe mariemdung tei msia dizie,

penui mamiedung, ketsaime rabedung, rekame nah ketsaime de mpau kelame dade ma keteu liede.

4 Ih Egyptme de pe zaikesia mpaube ba gage kaigai zie, nah hegwang kengking ge penui reu dizie,

aide reugwame reu RAMPAUBE Tinggwang ne ndukegai."

5 Jaaidi ga duidung cang dizie, nah kereuki cang eh mtaku dizie.

6 Kereukidung nnam dizie; Egypt ga reunadung ceureu reu eh cang dizie;

kiina nah hekuu bangdung regui dizie.

7 Nile reuki le kiina bangdung,

Nile reu mui ga,

nah Nile tai mei luhdung ga lingpwa kebam leu ki dizie,

nah guipwa tet di eh magede bam ta dizie.

8 Heka ketuime mra nah hap zie, nah Nile gage kagwak keling kegaime leune hapzie,

nah dui gage helang sam kegaime suisia zie.

9 Flax gade langcimpai tei kempetme nah pai keha dak kelame swagah dizie.

10 Egypt ga pai dak kelame de teimsia dizie; ma hityei kelame leune penui lung keherei dizie.

11 Zoan* ga hegwangnadung au mie cangsiak. Pharaoh puisau tei kela citumedung sam de kemta ge dida.

Nang dainzwa eh, "Ih au ma kecime na, nda hegwangme na ge?" Lie eh Pharaoh dage rang lulai.

12 Ciucai nnui gu makecime daiga lano?

Peu penuide ndage rang beulu nah reugwame reu RAMPAUBE Egyptme ziemne daige riem pwabam bi peu cilu.

13 Zoan ga hegwangnadung au mie dida, Memphis ga hegwangnadung de cwa dida; penui heleuhdung gu kimiaktsudung ne Egypt de peu lampui kemak gage ngngwa gai dida.

14 RAMPAUBE ngngwa kesia rabe penui kakga ge kaigai beu,

nah penui tei kegai leune Egypt de lampui kemak gage teu gaidi, cine sakmie kelume nzwa tanglia eh pekatei pe mrui ga kaumie bam dida.

15 Egypt ziemne magede teilu kera gah da, keheime mede kegahme, pekiak mede hekuu de. 16 Cipau nai, Egyptmedung mipuidung nzwa dizie. Penui mbeu nah ngngi dizie kedanemene reugwame reu RAMPAUBE penui reu gage pe ba hwa kegaine. 17 Judahme deu Egypt ziemne kehing ge dizie. Mi keheibe de pe ha rang kegai dau, penui ngngi dizie, kedanemene RAMPAUBE penuide mcau kera riem pwa kebam de ziemne. 18 Cipau benai Egypt namdi mengei ga canaanme let rang dizie nah reugwame reu RAMPAUBE dade samsang kera sampet lu. Aipaudung de ket zi Tingnaimiak Namdi* de qu zie.

19 Cipau nai Egypt deu sum ga RAMPAUBE de reca kepeu bam ge bamzie, nah deurai* gage RAMPAUBE zi gade tsusum ge sum gai zie. 20 Cide Egypt deu ga reugwame reu RAMPAUBE zierang nah saulia ge zie. Penuide teikeherei kelame penuide teiherei kegaidau RAMPAUBE dage hapgai, iciu eh Pa kelikebeube ge nah gumkebeube ge langgai beu zie, nah Pa penuide kelilu zie. 21 Egypt ga RAMPAUBE de ci gwang dizie, nah cipau nai Egyptme RAMPAUBE kebam ci luzie. Penui ratak nah mapeudung teu eh reca zie, nah RAMPAUBE dage sampetdung teigai zie nah cidungde teicang luzie. 22 RAMPAUBE Egypt de teikeherei zie, teikeherei nah teingkei gaizie. Penui RAMPAUBE da nreu gwang zie; pa penui kekie kingnei luzie, nah penui de teingkei beuzie.

23 Cipaunai Egypt gade Assyria ga puidi ge bam dizie, nah Assyriame Egypt ga gwang zie, nah Egyptme Assyria ga; nah Egyptme Assyriame de ngngwa reca ncüt dizie. 24 Cipau nai, Israel au Egypt penai Assyria de ngngwa dih nsam dizie, nah kideu pelane ziemne samlam ge dizie; 25 Reugwame reu RAMPAUBE penuide samlam beu zie nah rang eh, "Samlam kepung Egypt, a minadung; Assyria, a ba le tei kelu; nah Israel, a mapwamedung."