1 Cuhlu, Jerusalem, baapet lu; kedanemene n kebaa de gwang lada, nah RAMPAUBE kendu ne ncu teu cuh luda.✝

2 Kemui ne kideube de hacim di liede, nah muiting kecu ge ne heleuhdung de;

ciuliede RAMPAUBE ncu teucuh beu zie, nah pe kemdu de n dade ngaulu zie.*

3 Heleuhdung n kebaa ga gwang zie, nah hegwangmedung n kebaa baa cuh kebam ga.✝

4 Pie twagwa gai nah pielo. Penui pelane gwang penuikatei gwang ngkwalu nah n da gwangla.

N napeidung kemdei gade gwang zie, nah n napuidung de penui badung gage pwa zie.

5 Pecai nang pie zie nah baa dizie, nah n mlungbe suiyi nah puinlim dizie,

kedanemene jaaidi gu kekieege n reu gage rui gaibeu zie, heleuhdung mahei de n da gwang zie.*

6 Ut haudung ncu hacim zie, Midian nah Ephah me gu ut nadung;

penui pelane Sheba gade gwang zie;

penui kecak nah perimkehengui teugwang zie, nah RAMPAUBE de ketwa leidung tei zie.*

7 Kedar cuikui ga kauhaudung pelane n da keu hekwa beu zie, Nebaioth gu meurün seudung nang teumai kesia teibeu zie;

a ratakbam gade penui luulu kebui recadung zie; nah Ih a kendu ki de tei ndu gai zie.✝

8 Hemwa nzwa lim kela de caudung no, nah tamhaudung penui kemsiu ki ga lim gwangdi kela nzwa?

9 Jaaidikung deudung acu pei, nah Tarshish limdung ne teuswa,

kemdei gade n napeidung de ngngwa gwang, penui gu rangkanggeu penai penui gu kecak penui da teugwang kerane,

RAMPAUBE anui Tinggwang zi de ziemne, nah Israel Kemcibe ziemne, kedanemene pa ncu rüt kelane.

10 RAMPAUBE Jerusalem dage rangla, "Sangme napeidung n kiriedung teicuh dai zie, nah penui gwangpeidung n tatei zie;

Ih a rata gade ncu saja peu liede, ciuliede a lung gade au Ih ncu ngaunggia la zie.

11 N kirie liede ngkei pwabam jüja zie; cide tingmui mede tingkebaa dau nkui lak,

ciu eh heleuhdung maheidung keuteu gwanglu kerane, penui gwangpeidung ne teuswa eh.✝

12 Kesang, heleuhdung nah hegwangramdung n gwatei kemakme de ngkap dizie; cipau heleuhdung de ngkap ciak dizie.

13 Lebanon kemdu de n da gwang zie, cypress bang, fir, nah cypress bung gu pebang de ncüt si eh,

a kerecaki de tei hezuyi kerane; nah Ih a pi bam de tei ndu zie.

14 Penui n da keu mie kera gwang zie, n da hena kelame napeidung; penui n pi ga keu mie zie;

penui ncu Namdibe RAMPAUBE qu zie, Zion Israel Kemcibe.

15 Ncu gidi meliene nah ngaunghet kebam gade, migede tetka gwang kemak ga,

Ih ncu kelungta ziemne hegie kera ge, ceheu gade ceheu suiyi ge teibeu zie.

16 Nang heleuhdung tungdui liede sak zie, nah hegwangpeidung tung gade nkwet zie;

nang cilu zie Ih, RAMPAUBE, ncu kelikelube nah ncu Rikebeube, Jacob Ngkiengtube. 17 Ih hetageu mene kecak keugwang zie, Ih hegeu mene rangkanggeu keugwang;

hetsing mene, hetageu, nah tangtsudung mene, hegeu. Ih kezuyibe le n hegwangmedung tei beu zie, nah kemzeube le n muiteume.

18 N deu ga keregi kecu siu silak ta, mede ngkap kedi mede n raidung lungga teimsia kedi;

dede nang n kirie de Kelikebeube, nah n kiriekidung de Hetwakepung de qu zie.

19 Tingkebaa dau tingnaimiak de ngu kebaabe tadi zie da,

mede hekei baa de n reuga baa tadi zie;

dede RAMPAUBE ne kelungta ngu kebaabe dizie, nah n Tinggwang n kendube.*

20 Ngu tingnaimiak madaude gah dilak, mede ngu hekei mui eh gah dilak;

kedanemene RAMPAUBE kelungta ngu kebaabe dizie, nah n suisiet tingbaziedung bamsi tadi zie.

21 N mina pelane masang zie; penui peting pelane ziemne hangdeu cide gumlu zie,

Ih ling kegai kiak de, a badung le teikegai tahtei, ciu eh Ih ndu lu kerane.*

22 Keceuna be cangge, nah keceu be heleuh kengking ge petlu kera;

Ih, RAMPAUBE, peting gwang kecudau ma aidungde zette teicang beu zie.