1 Jaaidi kung ga hetaideu ziemne ndu kegai ge. (Tinggwang dade marengei kengau).

Heratingkai Negev gui kah kegwang nzwa cide gwang zie

renaamkang kahgwang zie, kehing deu gade gwang zie.

2 Ih zaisiet teugwang kera rengei ge ngau da:

pezai kesiabe ma tei msia, nah tei kengkappe matei ngkap eh.

Hang cu nah regi cu, Elam; twagwalu, Media;

Ih pe riedung pelane tei mtak dizie da.

3 Ciziemne a kia de teei dida,

mipui ge kemna tetteei nzwa eh ada bam dida;

Ih kesiu dene acu keheu dida; Ih kengau dene acu kebwak dida.

4 A mlung keherei dida; Ih hing eh mbeu di.

Ih peu tinghegi gwang neu bam dida, dede cide acu kengngi teugwang beu.

5 Penui taktyeibam mteilu, bamkamdung kamlwe ma tyei saklu;

cuhlu, hegwangnadung, nnui geudung maca keniaklu.

6 Aide Tinggwang ne a dage rang,

"Mie, reketme ge kai nzeulu; pa kengaudung paubeu maisia.

7 Pa minadung bagi, mina hangnana hekwendung, utdung,

nah gadadung reu gade kegwang ngau cai,

pa cidungde pie siakte lu maisia mriakmrak eh."

8 Kekwabe sah gai,

"Kedibo, Ih tingba ramsangne reketbam ga sap kwa bamla,

nah tingmui zie pelane a bam ga sap eh kwa bam."

9 Hekwen bagi ge mige ne teu gwangla nah hekwen keteume hangna.

Pa sah gai, "Babylon kau dida, kau dida,

nah penui reca kela rabe mamiedung hangdeu ga pang bam dida."*

10 A mina neu nah gui kelumedung, a hecaipung bam namedung!

Reugwame reu RAMPAUBE, Israel Tinggwang dade Ih dai siulu di bi,

Ih n dage ndugai da.

11 Dumah* ha ndu kegai ge,

mige Seir* gade acu qu eh cu,

"Kekwabo, tingmui zie daitei ge bam reu no?

Kekwabo, tingmui zie daitie ge bam reu no?"

12 Kekwabe rang eh, "Tingcang gwang kela nzwa tingmui de gwang la.

Nang keteu neu cai keteu lu, nah gwang dai lu."

13 Arabia* ha ndu kegai ge.

Nnui Dedanme hebeu tei kela maadung, Arabia hetaideu ga nnui zeu mtaklu.

14 Hereu kelame ziemne dui pwagwang beu;

Tema deu ga lungh kebamme, pakkelame de redau lu eh tangku pwa peulo.

15 Kedanemene penui kingtie dade, kingtie pwa hwa kebam dade,

lakpi kapgai kera mteipwa kebam gade, hereu kengngi pelane gade pak la. 16 Aide ziemne Rampaube adage ranggai, "Mmi ge gage, mmi ge ziemne mata tei kera likelube nzwa eh ngau zie, Kedar leuhme kendu de cang dizie. 17 Kedar reugwame Lakpi kepwame kecamnage gwale bam ta dizie," kedanemene RAMPAUBE Israel Tinggwang rangdi delu.