1 Judah deuceu ga hegwangpei Uzziah tsai kedi bekum, Ih RAMPAUBE hegwangbam ga kebam ngau; pa au cehu nah hutu ga bam, nah pe cwatie le kerecaki puih bam.* 2 Pereu ga seraphim* bam; hangge pe hesiu herok ramcau pung eh; hesiu kenale pezu gum, nah hesiu kenale pepi gum, nah hesiu kenale pa lim. 3 Penui hangge ge de qu eh ranggai,

"Mci, mci, mci, reugwame reu RAMPAUBE au! Kideu pelane pe kendu le pui."*

4 Hap kebamme kwadung dene kikam sing dung teukelai di, nah ki be mika le puidi.

5 Pecai Ih mragai,

"Co! Ih kap dida kedanemene Ih a muileu gade mci kemak kerang kau ge kecu ziemne,

nah mina mci kemak sam kerangme kakga Ih kelungh ne,

kedanemene Ih a miak le Hegwangpei de ngau kelune, Rampaube, reugwame reu RAMPAUBE!"

6 Pecai seraphim ket a da lim hung, pa pe ba ga miceu heukebam ge la, cide pa tuusiep le recabam gade keu kelu. 7 Cide le pa a mui tunggai nah rang eh cu,

"Pielo, aide n muileukung tung gai da; n mau keu gi dida, nah n mau gibeu dida".

8 Ih RAMPAUBE ma kerang kwa siu, "Ih caude langgai lai; caune anui ziemne tetlai?" Pecai Ih keligai, "Ih aika bam; acu langgai".

9 Pa ranggai, "Mina aidungde da mie nah rangbeu lo, ‘Kingneilu, dede cilu so; pielu, dede made keteu so.’

10 Pecai pa ada ge rangbeu, "Mina aidungde mlung teimang dilu, nah penui kwen tei pang, nah penui miak teicit dilu.

Iciumeliecai penui miakle ngau dilu bui, penui kwen le siu, nah penui mlung le ci, nah penui nreu gwang nah yi dizie."* 11 Pecai Ih keteu, "Rampaubo, daitie ge lai?" Pa keli eh,

"Namdidung kaumie sia cangsiak nah mina lung ta di kemaktane zie,

nah kidung ga mina lungh lak, nah hangdeube de peu mta mrwa di kemakta,

12 nah RAMPAUBE minadung de lang mdei gi di kemakta, nah hangdeu kedi nlikwak eh gi dizie.

13 Magade mina hang kerei gade zi ge cika bam liede, aide de ngkap dai dizie;

terebinth bang mede mhu bang bi kedi nzwa nah tsingmui bang bam kela nzwa,

kemci leuh au tsingmui ga bam."