1 RAMPAUBE Jerusalem da rangzeu, "Lei teigai, nang nagahpui, nang hena nna kemakpui; lei tei n suiyi lu nah hap sahbak lu, nang hena kenna rei ci kemakpui.

Kedanemene hemeu meukelu pui namedung swade gi kedibe namedung be kieeki," de eh RAMPAUBE ranggai.*

2 "N paiki tei mdi lu nah n paikidung de tei mtie pet lu, cide tei kudi mene;

n riadung tei tielu nah pe pakdung tei ngking lu.

3 Kedanemene nang zetle kezang pet zie nah hile de,

nah n leuhme heleuhdung reu ngking zie nah gikedi namdidung tei ncuh dai zie.

4 Ngngi so kedanemene ncu tei hengam tei dilak, mede n lung ceu diso kedanemene ncu ngaunggia tadi lak;

nang hena kecudau n ngngam de nsung tadi zie nah ncu gikedi ngaunggia kemak de. 5 Kedanemene ncu Teikegaibe au n naapei; pe zi au reugwame reu RAMPAUBE.

Israel Kemci Tinggwang au ncu Kelikelube; pa au kideu pelane reu Tinggwang.

6 Kedanemene RAMPAUBE ncu qu caili luda takedi nau nah rabe kilam suisia kela nzwa,

mipui hena dau mmeulu eh ta kedi nzwa," de eh n Tinggwang ranggai.

7 "Peting tie kemakge ziemne Ih ncu gidi, dede Ih ngaugia kedi teu nnuide teuhekwa luzie.

8 Rata kepui kebam gade Ih n dade a zu tingkakge ziemne kebai di;

dede kelungta samkak kesamsang teu Ih ncu ngaunggia lamui zie,

RAMPAUBE ncu keli kebeube rangla.

9 Kedanemene a dade aide Noah gu duilwa kedi nzwa da:

Noah gu duidung kideube reu kah gwang dai kelak Ih sampet kaikebeu nzwa,

ciu eh Ih a sam petgai la Ih nnuide a rata mede kesiu lak.

10 Lamlwadung kaumie lubui nah kideutudung nlai di liede,

ciuliede a keku kesang de n dade nreu tetti lak, mede a kezuyi samkak de nlai dilak,

RAMPAUBE ncu ngaunggia kelabe rangzeu.

11 Teei eh rei kelabe, rahang ne guigi kedi nah relui kemakbe,

pielo, Ih tangtsu pemi kehung le n lampui teibeu zie, nah n bangdwa sapphire le kambeu zie.

12 Ciu eh Ih tangtsu pemi kehung le pwa n kudadung peureu teibeu zie nah ngu kirieki tangtsu kemzaibe le teibeu zie,

nah ngu hegwale hezukeyi tangtsudung le.

13 Ciu eh n name pelane de RAMPAUBE ne ledeu zie;

nah n name kezuyi de yiki luzie.*

14 Masangbe gade ncu tei ngking beu zie, nah nang keherei gade mdei dizie, kedanemene nang ngngi tadi zie; nah kengngi gade, kedanemene cide n da gwang mna tadi zie.

15 Pielo, keheibede mide teikeherei kecu tei cai, cide a dade gwang lak; keheibe de ncu teikeherei cai kau dizie

16 Pielo, Ih hebaciem keyime de damgai, miceu tei heu kelame

nah reunetdung teimpet kecu pe tah, nah Ih tei ngkap kerane kengkapbe de dam gai.

17 Ncu renia kera reunet teikelu kette ngking gailak;

nah ncu kemau ndam kelame leune de mmau zie.

Aide RAMPAUBE kilame mapwa, nah a dade penui kemzeu ngau zie, aide RAMPAUBE ne ndugai."