1 Aide siulu, Jacob leuhme,

pe zi Israel de eh qu kelame, nah Judah leuhme gade kegwangme;

RAMPAUBE zi gade nnui sampet kelame nah Israel Tinggwang de qu kelame,

dede lungsang gade mede samsang gade tei la kemakme.

2 Kedanemene penui penui katei penuide kemci namdi gu minadung liede eh qu la

nah Israel Tinggwang de nlum la. Pe zi au reugwame reu RAMPAUBE.

3 RAMPAUBE Israel dage rangla, "Tei kedibedung ndaa ge Ih ndu lia dida; cidungde a mui gade mpet, nah cidungde de Ih peu cigai;

ge cidungde Ih zette teigai, nah cidungde teigwang.

4 Kedanemene nnui au nnui lungh tak kecu Ih ci kecune,

nnui ngwang teih hegeu nzwa tak, nah nnui sipie hetageu nzwa,

5 cine Ih ma aidungde nnui dage mrai ranggai la; aidungde tei di kemakne Ih nnuide ranglia dida,

iciu eh nnui, ‘A mamiedung ne cidungde teigai da,’ mede ‘Ih ne tei kelu mamie nah tei kelu hegeu mie ne aidungde keniak luda,’ de eh ranggai kelak ne.

6 Nnui aidungde ha siu da; kesangbe cilu kebui ma aidungde piegai pielo; nah nnui, Ih rang kegaidung de kesang lie de eh nnui mnei lak ni? Cu gade, Ih nnuide ma kehecidung keulia la, hebai pwa kebam nnui ci kemakdung de.✝

7 Cu, nah ndaa gade mene, cidungde teigai, nah cu kecang nnui cidungde ha siu ma,

iciu eh nang, ‘Yeo, Ih cidungde cibam,’ de eh rangdau kelak ne.

8 Nnui piage de siu ma; nnui cima; aidungde nnui mrai siu ma.

Kedanemene nnui mide cwa kelame ge kecu Ih cibam, nah nnuide mna kelu gade nnui mide kereniame ge tei eh gwang.

9 Ih a zi ziemne a rata ketip zie, nah a herüt ziemne Ih nnuide ngkap dilak.

10 Pielo, Ih nnuide tei mci luda, dede rangkanggeu nzwa ma; keherei mi dele nnuide Ih tei nci luda.*

11 Akatei a ziemne, akatei a ziemne Ih teigai zie; kedanemene Ih dainzwa peu a zi de rang msia lu lai?

Ih a kendu migede de peu lak.

12 A kwa kingneilu, Jacob, nah Israel, Ih ne qu kelume:

Ih pa da; Ih raitube, Ih ne kamtube de da.

13 Yeo, a ba le kideu bangdwa teigai, nah a ba zetle bie le tinggimdung teu kamlu;

Ih penuide de qugai kecudau, penui sap nsam lula.✝

14 Gwang ngkwa lulo, nnui pelane, nah kingneilu! Nnui kakgade aidungde caune mrai ranggai no?

RAMPAUBE minadung Babylon dage teigai zie lie eh kebam de teicang luzie. Penui RAMPAUBE sui lungningbe Chaldeanme dage teigai zie.

15 Ih, Ih ranggai dida, yeo, Ih pecu qugai dida, Ih pecu ngngwa gwang luda, nah pa ngking luzie.

16 A da gwang mna lu, aide kingneilu:

Raitu gade Ih ngkim eh marang dima; cide tei kegaidau, Ih cika bam."

Cu RAMPAUBE acu nah pe Rabe langgai.

17 Aide RAMPAUBE, n Kelikelube, Israel Kemci Tinggwang ne ranggai,

"Ih au RAMPAUBE n Tinggwang, ncu ngkinglu kera ledeu beu kelabe,

nnui gwang kera lampui le ge nnuide ngngwa gai beu kelabe.

18 Nnui a ajadung mzailu liecai!

Iciu lucai nnui kezuyi nah teilung keyi de hereuki ge nzwa lwa dizie de nage, nah n kelikelu de jaaidi cuidung nzwa dizie de nage.

19 Nnui leuhme heciangdung nzwa kiee dizie de nage, nah nnui neki ga nnui namedung heciangdung nzwa kiee dizie de nage;

penui zi a dwa gade dang tütti mede hemai gidi lak de nage.

20 Babylon gade mpetlu! Chaldeanme dade paklu!

Suiyi kwa teu cide rang ndu lialu! Aide peu ci gailu, Kideu pelane ga peu ci gailu!

‘RAMPAUBE pe kilabe Jacob de keli luda,’ de eh ranglu.

21 RAMPAUBE pe minadung de hangdeuketsai gade penuide ngngwa mpet kecudau penui hereu dima;

tsurakang gade pa penui ziemne peu hedui lwa mpet;

pa tsurakang de teipang di, nah dui lwa mpet.

22 Kemaume ziemne lungciep gah, de eh RAMPAUBE rangla."