1 Mraklu, mraklu, n kengking bahlu, Zion;

nnui gu hezukeyi paihenidung kailu, Jerusalem, kemci namdi;

kedanemene madaude hegeurum kemak mede mcikemak n da nlüt dai laklu.✝

2 Rebui gade nkatei ncu kecung di; cuhlu eh bamlu, Jerusalem;

n ngwang gade teiria de keumpet ti, hebaangmedung, Zion napui.

3 Kedanemene RAMPAUBE ainzwa ranggai, "Ncu pemi tei mene zwadi, nah ncu rangkang keu mene lungmpet beuzie."*

4 Kedanemene RAMPAUBE Tinggwang ainzwa ranggai, "Keraidau a minadung Egypt ga tingtiekemak ge ziemne lungh kera mie hung; nah Assyria ne pekie kegah gade penui de teikeherei.

5 Cu aika Ih a da dai bam no, aide RAMPAUBE ne ndugai, a minadung de pekie kega gade keuteu di kecu? Penui reu kedi tei kebamme ne rangmsia gai, aide RAMPAUBE ne ndugai, nah a zi au tingbazie leune rangmsia bammui la.*

6 Cine a minadung a zi cilu zie;

cipau benai penui au penui cilu zie Ih ne ainzwa rang kecu, "Yeo, cide au Ih lie!"

7 Samgwabe pidung lamlwadung ga daihiage de hezuyi no sam keyi teugwang kebeube,

kezuyi ndu kegaibe, sam keyidung teugwang kelabe, kelikelu ndu kegaibe,

Zion dage, "N Tinggwang au hegwang lie!" De eh kerangbe.*

8 Kingneilu, namdi kekwame penui kwadung sah zeu, penui ngngwa suiyi teu sah zeu,

kedanemene penui ngau zie, penui miakdung leune, RAMPAUBE Zion ga cailigwang kecu.

9 Ngngwa eh suiyi lei tei sahbak lu, nnui Jerusalem sia kedime;

kedanemene RAMPAUBE pe mina lung taumla beu; pa Jerusalem de kelibeu da.

10 Heleuhdung leune miakngau gade RAMPAUBE pe kemci ba peu ngau gai;

kideu leune Tinggwang gu keli kelu ngau zie.*

11 Tetdi, tetdi, Babylonia gade tet mpetdi; mcikemak kette tungso;

pe dade tetdi lu; ngkatei ncu teimci lu, nnui RAMPAUBE lidung pung kelamedung.*

12 Kedanemene nang kelwa eh tet pet lak, mede nang lungrei ge bam eh tet lak;

RAMPAUBE n dwaga tet zie kecune; nah Israel Tinggwang ncu kegumbe zie.

13 Pielo, a kilabe mriak eh heta teizie;

pa au dizie nah teucuh luzie, nah pecu hetwa peuzie.*

14 Kekiee ge ncu ngau hing bam dida,

pe pum rehi mina kedame nzwa ta hamdi kecune, nah pe rehi mina nzwa mezing di.*

15 Ciuliede, a kilabe heleuhdung kekiee dage kezin gai zie nah pe ziemne hegwangmedung kekiee ge penui mui ngkui dizie.

Kedanemene penui da ranglia kemak de, penui ngau zie, nah penui siu kemak de, penui cilu zie.*