1 Gwang nnalu, nnui heleuhdung, nah kingnei lu; helung kai lu, nnui minadung!

Hangdeube nah cika pui kebam pelane kingnei maisia, kideube, nah cika de kegwangbedung pelane.

2 Kedanemene RAMPAUBE au heleuhdung pelane de pe rata bam dida, nah penui gu reugwamedung pelane de pe ratasüt bam dida;

pane penuide tei nkap zing di, pane penuide gitset kera gage balie gai beu.

3 Penui ketsaipaaudung kelien mpet dizie. Ketsai paaudung rim maleu ga nnam dizie;

nah lamlwadung ga penui jai jok nghang dizie.

4 Tinggim ga hegidung pelane nnei mietmiet dizie,

nah tinggim au laisiudum nzwa kezui dizie; nah penui gu heghidung pelane nnei mietmiet dizie,

manei pebang gade gah mietmiet di kela nzwa, nah nzüt tsidung meu ntei zu eh nzüt bang gade nghai di kela nzwa.*

5 Kedanemene a kiengtie tingkam gade sak pui kelu dau;

pielo, cide cu au Edom ga nghung zie da, Ih ngkapdi kera ziemne kai ntsam pwa kebam minadung da.

6 RAMPAUBE gu kiengtie au hejai le zau bam nah maca le cum pwabam,

meurünnadung nah hemeudung zai le zau bam, meurün seudung gu nkeudung ca le cum pwabam.

Kedanemene RAMPAUBE ne Bozrah namdi gade ratak ge tei gai nah Edom deu gade kekiee ge gitset kegaine.

7 Renaam tumseudung penuide ngngwa kau zie, nah hena kebam tumseudung hecing ki kecubedung de ngngwa kau zie.

Penui deu au hejai le sakmie zie, penui gu rebui de maca le tei ca lu.

8 Kedanemene cipau nai au RAMPAUBE ziemne hekum kepeei tingba ge zie nah Zion de tei kegai ziemne penuide peu caili dai kecu tingkum ge zie.

9 Edom ga reukidung au kehania mmi dizie, pe rebui au sulfur mmi dizie,

nah pe deu au kehania heu kebam nzwa dizie.

10 Cide tingmui tingba ruzie; pe mika kelunghta ka cuh zie;

ceheu ge gade ceheu ge cide nta kebam deu dizie; migede cika kelunghta nah kelunghta tetkah gwang lak.*

11 Dede renaam ruinedung nah makaunedung cika lungh zie; biangkang nah hegak cika ge pe ciep teugai zie.

Pa cipau reu gage tei nsia kera kemdet tie teu kezang gai zie nah tei ngkap kera petie kemdet tie de.*

12 Pe muiteumedung

hegwangram gelie qugai kera ma gede bamlak, nah pe hegwangnadung au ma gede lak.✝

13 Hetudung ne pe hegwangkidung lungh pui dizie, tambu bang nah hetu bang ne pe kengkiengbam dung ga.

Cide au maiserung kelungh bam ge zie, ruitie bam dizie.

14 Renaam kaunedung nah heneudung cika redau zie, nah renaam meudung hangge ge dage hap gaizie.

Tingmui kaunedung cika lungh zie nah penui katei penui ziemne kemtak bam ge ngaulu zie.✝

15 Biangkangdung peciepdung teu zie, mbum gai zie nah penui na nkak zie, pena nkak zie nah penui na de gum zie.

Yeo, cika heliedung ngkwa zie, ketket kecu pekang ngngwa lwe.

16 RAMPAUBE gu laisiudum gade pei lo; aidung de kette gah dilak.

Kette pekang gah eh bam lak; Kedanemene pemui ne aja kai kebeune, nah pe rabe ne penuide hekwa kelune.

17 Pa penui bamdung ziemne dacak tei gai, nah peba ne penui ziemne heria ge le cide mdet mpet gai beu.

Kelunghta cide penui gu zie; ceheu ge eh ceheu ge penui cika lungh zie.