1 Judah Gwangpei, Ahaz Jotham napei Uzziah capei, Rezin Aram gwangpei, nah Pekah Remaliah napei, Israel gwangpei, tingdau Jerusalem ga hereu tei kera hang, dede penui ngkinglu tadi. 2 David* kilungme da Aramme Ephraimme de ngngwa zangna tei kelu ci gwang kedi dau. Pe mlung nah pe minadung mlung mbeudi, tsingbang hegung ga tingkai gui kegai dau mlai kela nzwa.

3 Pecai RAMPAUBE Isaiah dage ranggai, "N napei Shear-Jashud de ngngwa lwe tet pet gai cu Ahaz de redau kerane rejaai nreube gade dui teugwang kebam helau tün ga, pai kehetame luh lampui ga de dau lu bui. 4 Ahaz de rangbeu lu, ‘Mriaklu, sünne eh zing de bamlu, ngngi diso mede helung keherei diso tsingtie ai kena de heu mene mika kebam ziemne, Rezin nah Aram, nah Remaliah napei Pekah rata teu keheu kegai ziemne. 5 Aram, Ephraim, nah Remaliah napei. Penui heciem kesia ge ncu mmau kera riemlu de lie penui ranggai; 6 "Anui Judah gwa go nah pecu keheu go, nah anui pecu teipangpop ti go nah cikage Tabeel napei de anui gwangpei peu teilu kera."

7 Dede RAMPAUBE Tinggwang Ahaz dage rangzeu, "Cide teigwang lak; cide tei gailak,

8 kedanemene Aram reu kedibe au Damascus, nah Damascus peu reu kedibe au Rezin.

Mmi riakherokemengei tingkak gage, Ephraim de tei pang takcai dizie nah mina teidau lak dizie.

9 Ephraim peureu kedibe au Samaria, nah Samaria peureu kedibe au Remaliah napei.

Magade nang kenlum ntiplu mai, nang mateitei de kwak bam gailak."

10 Rampaube Ahaz de resiu dai, 11 "N Tinggwang RAMPAUBE gu marehi ge kielu; ma kecok gage mede ma kecehu gage kie gailu." 12 Dede Ahaz rangdi, "Ih kie lak, mede Ih RAMPAUBE de kedei lak". 13 Cine Isaiah keligai, "Kingnei lu, David leuhme. Nnui mina liakebamme de kedei kera mnung cang mereu ni? Nnui a Tinggwang lia kebamde de kedei zie ni? 14 Ciziemne Rampaube ne marehi ge nnuide peu zie: Pielu, releipui ge telak luzie, mipeina ge nna luzie, nah pezi Immanuel lie qu zie. 15 Pa tungdui mnwa nah heliadui tyei zie ngking cuh kesia be ci eh mlai dilu kebui nah keyibe luu lu kebui ting di de. 16 Kedanemene hena nabe kesiabe mlai nah keyibe luulu kebui ci kemak dwa, hegwang kena nang hing kela deu de tei mta dizie. 17 RAMPAUBE teu gwang beuzie n dage, n minadung dage, nah n pei ki kelak dage ndaa nzwa kette mene Judah gade Ephraim tsam mpet kelu benai gade, pa Assyria gwangpei de ngngwa gwang beuzie".

18 Cipau tingdau

RAMPAUBE Egypt reukidung kemdei ga tamaine ziemne makwa nza gai zie,

nah Assyria deu ga tegeine ziemne.

19 Penui pelane gwang zie nah langkam mta kemrwa leune ga, tsura tia,

hetuhum pelane, nah tsehei deu leune ga lungh dizie.

20 Cipau tingdau Rampaube Euphrate Reuki kahpet lulamde li kelu tangkane le tai dizie, Assyria gwangpei,

pe peu nah pepi maidung; pe tangkeimai desi eh tai dizie.

21 Cipau benai mige hetumpui ge nah meurün kena gui bamzie,

22 nah tungdui kieesüt eh penui kepeu ziemne, pa tungdui sakzie,

hangdeu cika mina bang kebamme tungdui nah heliadui tyei zie.

23 Cipau tingdau, kubebang cangge pemi rangkanggeu cangge tei lu kela luhdung de,

cika magede bamlak dede hetuhum nah hetu rünne dizie.

24 Minadung cika lakpi pwalwe heteih gwazie, kedanemene hangdeu pelane hetuhum nah hetu le puidi zielu.

25 Penui hepei le ta kelu hangdeutu dungga mie tadi zie, hetuhum nah hetu le lungh pui kedide hing eh;

dede cide hetum nah meuründung rwala kecu heni ge dizie.