1 Caihakecibe Isaiah rangla, "RAMPAUBE Tinggwang Rabe a da bam, kedanemene RAMPAUBE ne acu keniaklu

keherei kebamme dage sam keyi ranglia kerane. Pelung ceu kelame de teingkei beu kerane pa acu langgai,

hebaangme dage lungkempet ranglia kera, nah hebaangme kangpwa kebamme de ngkei beu kera.*

2 RAMPAUBE pesuiyi kela tingkum de ranglia kera pa acu langgai,

anui Tinggwang hekum peei kera tingba,

nah hap kela leune lung taumla kera.*

3 Pa acu langgai, Zion ga hap kebamme de peu kerane, penuide mimüt mene peuzui ge peu kerane,

kehap mene suiyi ca, keregui kegah rabe be mene hetwa cwatie be,

penuide mhu masangbe qulu kerane, RAMPAUBE ling kebam de, peu pecu twa zie.*

4 Judahme ndaa siakedi namdidung de penui retak dai luzie; penui ngkap kedidung de teihemi luzie.

Penui namdidung siakedi de teihemi luzie, ceheudung kekieege gade ngkap kedidung.

5 Sangme bam eh nnui kauhaudung de taktyei peu zie, nah sangme napeidung nnui luhdung nah kubeluhdung ga heta teizie.

6 Nnuide RAMPAUBE cingkume de eh qu zie; penui nnui de Tinggwang kilame de eh qu zie.

Nnui heleuhdung mahei de tyei zie, nah penui mahei gade nnui hegie zie.*

7 Nnui ngngam meliene nnui kena kiee ge ngau zie; nah rütkemak meliene penui qwa ziemne penui suiyi zie.

Cine penui deu gu kena kiee ge penui ngaulu zie; kelungta suiyi penui gu zie.

8 RAMPAUBE rangla, "Ih, RAMPAUBE, kemzeube ku la, nah kerega Ih ngkau la nah mzeukemak keregi.

Ih a minadung de samsang eh ziehi peuzie, nah Ih penui da kelungta samkak ge tei zie.

9 Heleuhdung kakgade penui leuhdung de cilu zie, nah minadung kakgade penui name de cilu zie.

Penuide kengaume pelane penuide hetwa peu zie, RAMPAUBE ne penuide samlam kebeume de zie.

10 Ih RAMPAUBE da a suiyi süt zie; a Tinggwang da Ih suiyi bamsüt zie.

Kedanemene pa kelikelu paidung le acu bah beu; pa masangbe cwatie le acu bah beu,

lakciubepei peuzui le pecu mtei kelu nzwa, nah lakciubepui hetei hetah le pecu mtei kelu nzwa.*

11 Kedanemene hangdeu pe bangdung pwakcu kecu nzwa, nah hegurie pe bangdung de peu lungcuh kecu nzwa,

ciu eh RAMPAUBE Tinggwang masangbe teigai zie nah heleuhdung leune dwa gade pwakcu kera hetwa peu zie.