1 RAMPAUBE Pe minadung de ainzwa ranggai, "Petaube pie heling lu, kemzuibe teilu;

kedanemene a kelikelu au mna dida, nah a samsang keulia lai bam dida.

2 Mina cide tei kelume samlampung, nah cide herak ntip kelume.

Pa Sabbath mnei la, cide tei heradi lama, nah kesia ketei gade pe ba ketip lula."

3 RAMPAUBE caisui tei kelu sangme de peu ainzwa rang diso,

"RAMPAUBE pe minadung gade acu gidi bi zie."

Eunuch ainzwa rang kerabe ma, "Pielo, Ih au kecangh bang ge."

4 Kedanemene RAMPAUBE ainzwa ranggai, "Eunuchme a Sabbathdung mnei kelume

nah a suiyi ketei de kedet kela, nah a samkak herak ntip kela Eunuchme,

5 napeidung nah napuidung lungh kelu swade yiki kecu ge penui ziemne a kiga nah a kirie lungle kensungbam ge tei beuzie.

Ih penuide madaude gahdi kelak kelungta kensungbam ge peu zie.

6 RAMPAUBE da mna gwang kelu sangme de liede,

pe ta teikera, nah RAMPAUBE zi de hung kelame, pecu reca kera,

Sabbath mnei kelu leune nah cide teihera di kemankme, a samkak ga bam kelume,

7 Ih a kemci lamlwa ga ngngwa gwang zie nah a kekie ki gade de peu penui suiyi zie;

penui gu keru recadung nah penui gu ratakdung a recabam gade luulu zie.*

Kedanemene heleuhdung pelane ziemne a ki de kekie ki de qu zie,

8 aide RAMPAUBE Tinggwang ne ndugai, langgi kedi Israelme de teuhekwa kelube,

Ih mina kedame de liede penui da teuhekwa silu zie."

9 Israel ngauraumedung gwang delwe Israel pe muiteumedung de ngkap dilu!

10 Penui gu kekwame pelane miakciet, penui au daitei au bi cima.

Penui au pelane heteudung zingde tang lula kemakpe.

Penui hemang mmi, nah zeu mie eh zip kecu penui suila.

11 Heteudung de penui taktyei dih sütla; madaude penui mnung ngau gailak;

penui au keci kecet kegah kekwame;

penui pelane penui lampui riep gage nreu tet dida, hangge ge kecu petaukemak mahei hengim la.

12 "Gwanglu," penui rang, "Zau kengking le anuikatei anuide teipui lugo.

Ncünne au henai swade yi zie."*