1 Hezekiah hegwang teikelu mmi kereimdai bekum, Assyria gwangpei Sennacherib Judah ga namdi kwa keludung gwaketang nah cidungde tuilu. 2 Pecai Assyria gwangpei reugwamaa muibe de Lachish namdi gade Jerusalem ga hegwangpei Hezekiah dage langgai reugwamaa kedi gede si eh. Pa rezai nreube duipak nggwa kebamga gwang nnalu, paiketame luh puidiki ga, nah pa cika saplu. 3 Israel leuhme kakgade kedime namdi gwale pecu resiu kera kepetme becai Hilkiah napei Eliakim, hegwangki kerengei kedibe, Shebna, hegwangpei gu keraube, nah Asaph napei Joah, sorkari matiak kelubedung keraube.

4 Reugwame kakgade ditube penui dade rang eh, "Hezekiah de rang beu lo, hegwangpei kedibe Assyria gwangpei ainzwa eh ranglie eh, ‘Dai gade n kekuu cide gwang bam no? 5 Nang lugai kelak samdung rünne rangla, hereu tei kera ziemne ciemyi nah kengking bam lie eh. Nang cu caude nlum la no? Acu ngngwa renia kera caune ncu kekuu peu no? 6 Pielo, nang Egypt de nlum la, cide hekuu pangtakcai kebam nang hetuitie tei teula, dede cika mige ngngei gai cai, cide peba ga kau pwa lwe pecu kui zie. Pharaoh Egypt gwangpei de cinzwa da pecu nlum kelame dade. 7 Dede magade nnui a dade, "Anui au RAMPAUBE anui Tinggwang de nlum la," de eh rang liecai. Pa cide Hezekiah ne pe reca nidung nah reca bamdung keu tet kedibe de meni, nah Judah nah Jerusalem da pa rang, "Jerusalem ga recabam aikade nnui reca zie"? 8 Cine cu, Ih nnuide a mpaube Assyria gwangpei zi gade mapwa peu gaila. Ih nnuide hekündung cangna ge hazie, penui reu cwa kerame nnui ngau lu liecai. 9 Nui dainzwa a mpaube kilame kakgade ceutu nabe de de ngngwa regi lu meno? Bagidung nah hekwen teu kelame ziemne nnui nnui kenlum Egypt dage kai dida. 10 Cine cu, Ih heni aide ga RAMPAUBE si mene mbeu hang lani hangdeu aide de ngngwa regi nah tei ngkapti kera? RAMPAUBE a dage rangdi, "Hangdeu aide de regi lu nah ngkap dilo."’"

11 Pecai Eliakim Hilkiah napei, nah Shebnah, nah Joah reugwame reu ditube dage rang eh, "Teikeherei de n kilamedung de Aramme let, Aramaic gade marang lo, kedanemene anui cide cibam. Judahme let gade anuida marang so herie ga kebam minadung kwen gade." 12 Dede reugwame kakgade kedibe rang eh, "A mpaube acu langpwa n mpaube nah n dage sam aidungde rang kerane langgai ni? Pa acu langpwa herie ga kebam minadung dage langgai meni, nnuide ngngwa penui katei penui teu tyei nah penui zung sak kerame dage?"

13 Pecai reugwame kakgade kedibe cuhlu nah Judahme let gade pekwa sahbak eh, ranggai, "Hegwang kedibe Assyria gwangpei, hegwang kedibe samdung kingnei lulo. 14 Hegwangpei rangla, ‘Hezekiah de peu nnuide cwadi helo, kedanemene pa au nnuide keli gailak lu. 15 Peu Hezekiah de nnuide RAMPAUBE de nlum kera teiso, rang eh, "RAMPAUBE nnuide kelilu bi zie; namdi aide Assyria gwangpei ba gage peu di lak."’ 16 Hezekiah sam kingnei so, kedanemene Assyria gwangpei ainzwa eh rangla: ‘Acu ngngwa kezuyi teilu nah a da mpetlu. Iciude nnui hangge kecu de pekatei pe kubebang gade nah pekatei pe tangzütbang gade tyei zie, nah pekatei pe tekwa gade dui sakzie. 17 Ih gwang eh nnui katei nnui deu kenzwage gage ngngwa tetdi kemak tane nnui ma aide teizie, meitsi nah zau keheci deuge, tangku nah kubetsiluhdung deuge.’ 18 Hezekiah de peu nnui lampui saumau diso, rang eh, ‘RAMPAUBE anui de kelilu zie.’ Assyria gwangpei ba gade mina kedame rabedung ket nede penui de kelibeu ni? 19 Hamath nah Arpad tinggwangdung daiga la no? Sepharvaim rabedung daiga lano? Penuine Samaria de a kengking gade kelibeu ni? 20 Hangdeu aidungde rabedung kakgade, tinggwang gede bamni a kengking gade pe hangdeu kelikelu kerane, RAMPAUBE Jerusalem de a kengkieng gade kelilu kera nzwa ni?"

21 Dede minadung zing de eh bam di nah penui sam gede rang ma, kedanemene hegwangpei aja au, "Pesam keli so," de kecune. 22 Pecai Hilkiah napei Eliakim, hegwangki ga kedibe, keraube Shebna, nah keraube Asaph napei Joah, penui lung keherei eh penui niadung hietti eh Hezekiah da gwang nah reugwa muibe samdung peda pau gaibeu.