1 Ainie Ariel* reuga suisiet, Ariel, David kebam namdi de!

Mmi gecai mmi ge hekwalu; peu hengyi dungde gwanglu.

2 Dede Ih Ariel de twagwa luzie, nah pa hap nah hei eh hap bamzie;

nah pa a ziemne Ariel nzwa zie.

3 Ih ncu twagwalwe renia zie

nah Ih ncu rietwagwa gwang zie, nah renia eh gumlu kera ta tei cuhzie.

4 Ih ncu teingkau dizie nah nang hangdeu gade marang zie; kehenah rebui gade n samrang de gwang zie.

N kwa rabe kwa ge hangdeu gade kerang nzwa zie, nah rebui gade n samrang rang mtei mene rangzie.

5 N reugwame maadi rebui yitube nzwa dizie, nah ngaugia kegah hemaa maadidung ciurie gahdi kelabe nzwa dizie.

Cide peting keduinage ga zette eh tei dizie.

6 Reugwame reu RAMPAUBE

tingceu, nluiteu, makwa kwadi, tingkai keci nah rahang kesia, nah ngkapdi kera miheu teu nnuida gwang zie.

7 Cide hemang ge nzwa zie, tingmui mangdak ge:

Rwakela heleuh leune de Ariel

nah pe kengkiengde de renia zie. Penui pecu nah pe kengkieng bamdung de gwaketang zie.

8 Cide kemzeume ge pe mangle de matyei kebam nzwa zie, dede pa mrakcuh de, pe za au mrwa.

Cide hereu kelame ge pe mangle de kesak nzwa zie, dede pa mrak lude, pecai cita dizie, pe hereu gahdi mene.

Yeo, heleuh kekiee ge Zion Deutu de renia kelame cinzwa dizie.

9 Nnui swagah eh nnui swagahsüt dilu; nnui katei nnui miakcit dilu nah cit lalu!

Sak mielu, dede zau le so; tanglialu, dede zau le so.

10 Kedanemene RAMPAUBE nnuide peu zipzing di kera rabe ruigai beu.

Pa nnui miakdung ngkuidi, caihakecime dungde, nah nnui peudung kezuidi, caiha kerangmedung.✝ 11 Keuliakegai leune nnui dade ngkui kedi laisiukwak samdung ge dida, cide minadung makecime depeu, rang eh, "Aide peilo," de zie. Pa de rang eh, "Ih pei gailak, kedanemene cide ngkuidi delu," de zie.* 12 Magade laisiukwak pwa peigai kelakme de peugai eh, rang eh, "Aide peilo," pa rangzie, "Ih pei gailak."

13 Rampaube ranggai, "Mina aidungde pe mui gade a da gwang nna la

nah penui muileu gade acu rütla, dede penui mlung au a dade mdei la.

Penui acu kerüt au ledeu eh kaikebeu mina zai gade rünne.*

14 Cine, pielu, Ih mina aidungde dage mning kemak ta ge teigai zie, miswakegah caide miswakegah ge.

Penui makecime maci de gah dizie nah penui kemteume ngang kela kecikecet dungde gah dizie."*

15 Ainie penui mariemdung RAMPAUBE dade kebai ncok kelame,

nah penui batadung kemui ga kelame. Penui rangla, "Cau anuide ngau lano, nah cau anuide ci no?"

16 Nang maleune pwa kedet dida! Li keteibe de pwa lidei nzwa cetgai zieni,

iciu eh tei kelube nia ne tei kegaibe dade, "Pa ne acu tei ma," de zieni,

mede mania tei kelube tei kegaibe dade, "Pa ci lama" de zieni?✝

17 Matie mene,

Lebanon de teipwa luh ge tei dizie nah luh de hegung ge dizie.

18 Cipaunai kwenpangme laisiukwak samdung de siu luzie,

nah muiting kecu gade miakcitme ngau luzie.*

19 Mine keherei kelame RAMPAUBE gade pesui yidai luzie,

nah mina kakgade kegahme Israel Kemcibe gade pesui yizie.

20 Ngaugia kegahme nli dizie, nah mide hegah kelame gah dizie. Ma kesiabe teineu kelame leune de teinggah dizie,

21 samkie ge gade migede tei mmaudi kelame. Penui pe ziemne hetak ge kainzeu la

pa kiriebe ga kemzuibe peeila nah masangbe de kemret le teingkau dila.

22 Cine ainzwa eh RAMPAUBE Jacob ki ha rangla, RAMPAUBE, Abraham de kelikelube,

"Jacob depeu ngngam si lakta, nah pe zu depeu hamda la lakta.

23 Dede pa a bale teikelu pe name de kengaudau, penui a zide teimci zie.

Penui Jacob Kemcibe zi teimci zie nah penui Israel Tinggwang de kerüt gade sapzie.

24 Rabe gade mau kelame keci kecet ngau luzie, nah mcam kelame maci luzie."