1 RAMPAUBE rangla, "Cu kingneilu, Jacob a kilabo, nah Israel, Ih ne kedet kelube:

2 RAMPAUBE aide rangla, ncu tei kebeube nah neki gade ncu teigailu

nah ncu ngha kerabe: "Ngngi so, Jacob a kilabo; nah nang, Jeshurun, Ih ne kedet kelube.

3 Ih hangdeu hereu kelade gage hedui ruigai zie, nah hangdeu kecangh ga reuceudung peu lwamie zie kecune;

Ih n dade lunggwang kelume dage a Rabe ruigai zie, nah n name dage a samlam.*

4 Penui ceheibwa kakga lungh cuhzie, reuceunadung taiga willow bang nzwa.

5 Mige rangzie, ‘Ih RAMPAUBE gu,’ nah kedage Jacob zi qu zie,

nah mi kedage pe ba gage, ‘RAMPAUBE gu dida,’ de eh rau zie nah pekatei pecu Israel zi teu eh qu zie."

6 Aide RAMPAUBE rangla, Israel Gwangpei nah pe kelikelube, reugwame reu RAMPAUBE:

"Ih raitube, nah Ih kamtube; nah Ih rünne gwale Tinggwang keda kette gah.*

7 Ih nzwa cauge bam no? Pecu peu cide rang ndu gailo nah acu ranglia lo

Ih ndaa a minadung de teikegai gade hetadung tei kegwang dungde, nah peu penuide teigwang dai kera tadung depeu rang ndu gailo.

8 Hingso mede ngngi diso. Ih nnui dage ndaa rang ndulia gai meni, nah ranglia meni?

Nnui a zierangdung da: Ih si kemak Tinggwang keda kette bam si reuni? Tsura keda kette gah; Ih kette cima."

9 Mamie keteime leune au magede ma; nah hera aidungde penui sui keladung de au pemi gah;

penui zierangdung ma ngau lama nah magede ci lama, nah penuide hengam tei dizie.

10 Cauge pemi kegah hera ge mede mamie ge teigai lai?

11 Pielo, mamie reca kelame leune de hengam tei dizie; mamie keteime au mina ge gwale ma.

Penuide peu gwang ncütlu; penui ngngi dizie nah penuide hengam tei dizie.

12 Hegeu ta keteime pe niadung teu eh heta teila, pe zu teila, miceu gade heta teila.

Pa hegeuteisang le perehi reki gaila nah pe ba kengking le hetah teila.

Pa mzeu la, nah pe kengking gah dila; pa dui sak lama nah pa nnei dila.

13 Tsingta keteibe tsing mdetla, nah kerautie dele pegiak giak lula.

Pa pe niadung teu eh perehi tei lula nah kemdet tie dele giak gai dila.

Pa cide mina rehi gage teigai la, hezu keyi mina ge nzwa, iciu eh kilung gage kailu kerane.

14 Pa cedarbangdung bi ngkei dila, mede pa heleibang mede mhubang kedet lula.

Pa pekatei pe ziemne hegung gade tsingbangdung keu lula. Pa fir bang linggai la nah tingrui ne cide depeu lungcuh lula.

15 Pecai mipei ge cide keu tsingdiak teila nah pekatei pecu tei lum lula. Yeo, pa mi teila nah tangku ru la.

Pecai pa cidele pwa herabe ge teila nah cide de keukeimie reca la.

16 Pa tsing kesa teu mi teila, pa cika heteih rula. Pa cide tyei eh mnung lula.

Pa pekatei pecu teilum lula nah rangla, "Ah, Ih lum dida, Ih hemi de ngauda."

17 Tsing kebangbe le pa herabe ge teila, pane reki kelu mie ge; pa cide de keukei mie reca la nah herüt peula,

nah cide dage kekie tei eh rangla, "Acu keli beulo, kedanemene nang a tinggwang lu."*

18 Penui ci lama, mede penui cide daibi cilu lama, penui miak cit kecune nah ma ngaula kemakne, nah penui mlung cide cilu lama.

19 Migede macet lama, nah penui cilu eh aide ranglu lama,

"Ih tsing kesa mi gage ru dida; yeo, Ih mi gage tangku ruda. Ih mi gage heteih ruda nah tyei luda.

Nah Ih cu tsing kedadungde le mi ngau kemneeudung ge tei eh reca zieni? Ih tsing kangge de keukei mie reca zieni?"

20 Cide au mimüt tyei kebam ge nzwada; cwa teu kela pe mlung ne pecu pe lampui sau mau beula. Pa pekatei pecu kelilu gailak, mede pa, "A ba zetle lebie kebam aide au kenret rabe," de eh rang lama.

21 Ma aidungde cetgailo, Jacob, nah Israel, kedanemene nang a kilabe kecune:

Ih ncu teigai; nang a kilabe: Israel, Ih ncu nsungta dilak.

22 Ih hemwa kedi ge nzwa nnui renia kela tahdung de guigi dida, nah hemwa ge nzwa, nnui maudung;

a da cailigwanglu, Ih nnuide kelibeu delu.

23 Helei teilu, nnui tinggimdung, kedanemene RAMPAUBE aide tei kegaine; sahlu, kideube kecokdung.

Helei tei sahlu, nnui lamlwadung, tsingbang leune kebam hegung;

RAMPAUBE Jacob de kelibeu kecune, nah Israel ga pe kendu lia beuzie kecune.*

24 Nnui kelikelube, nnuide neki gage teigai kebeube RAMPAUBE aide rangla:

"Ih au RAMPAUBE, ma pekiene tei kegaibe,

Ih akatei tinggimdung teimdi kegaibe, Ih akatei kideube de tei kegaibe.

25 Pekie kegah reka sam rang kelame de Ih penui lunghop tei kegaibe nah ma kereka pei kelame de tei hengam tei kegaibe;

Ih maci kelame maci de de teu hekum di kelabe nah penui keledeu de de kemie tei dila.*

26 Ih, RAMPAUBE, a kilabe samdung de teicang beu kelabe nah pe samgwame mrai rang kegaidung de teicang beu kelabe,

Jerusalem dage rangla, ‘Cika mina lungh dizie,’ nah Judah namdung dage, ‘Penuide retak dai luzie, nah Ih kau kedi gade teu ncuh dai beuzie’;

27 jaaidi kecok dage, ‘Cangh dilu, nah Ih n reukidung teicangh dizie,’ de eh rang kegaibe.✝

28 Cyrus dage, ‘Pa a meurün kekwabe, pa Ih luu keneu leune tei zie; Jerusalem ga pa hezai teibeu zie, ‘Cide retak dai luzie,’ nah kerecaki de ziemne ranggai, ‘Peu pe bangdwa dwalu,’" de eh rang kegaibe au RAMPAUBE da.✝