1 RAMPAUBE rangla, "Gwanglu, hereu kelame leune, dui ga gwanglu,

nah nnui rangkang bam kemakme, gwanglu, luilu nah tyeilu!

Gwanglu, rangkang teu mene zau nah tungdui luilu nah pemi tei mene.*

2 Daitei eh tyei kemak be gage rangkang mpet lano, nah daitei n mnung teilu la kemak ziemne hairei tei lano?

A kwa kingnei sünne lu nah ma keyibe tyeilu, taktyei keyi ga nnui suiyilu.

3 A minadung, kingnei lu delwe a da gwanglu! Ciu eh nnui ring luzie!

Ih kelungta samkak nnui da teibeu zie, a kumedung, Ih David dage keku kenlum sampet kai kebeude ncu de peu zie.*

4 Pielo, Ih pecu heleuhdung dade nlumlu kebui ge, muiteu ge nah minadung reu kedibe teibeu dida.*

5 Pielo, nang cikemak heleuh gede qu zie; nah heleuh ncu cikemak ge n da pak gwang zie

N RAMPAUBE Tinggwang ziemne, Israel Kemci Tinggwang, ncu tei ndu kebeube."

6 RAMPAUBE de peei lu kebui dau peei lu; pa mna kebam dau pecu qulu.

7 Peu kesiaketei de pe lampui putdi, nah kemau ketei minabe de pe kecetdung.

Pecu peu RAMPAUBE da cailigwang lu, nah pa pecu ngaunggia zie, nah pe mau gi cangsiak beu kerabe anui Tinggwang da.

8 "Kedanemene a kecetdung de n kecetdung ma, mede n lampuidung de a lampuidung ma, aide RAMPAUBE ne ndugai, ✝

9 kedanemene tinggimdung au kideu swade hu ki kecu nzwa, cinzwa a lampuidung de n lampuidung swade hu ki, nah a kecetdung liede n kecetdung swade hu.

10 RAMPAUBE rangzeu, Israel, "Tingrui nah buising tinggim gade hung kela nzwa

nah penui hangdeu ga jok di kemakne cika cailigwang lama

nah lungh keyi peula nah pwakcuh nah hetaketame de petsi leuh nah ketyeime de taktyeipok peula,*

11 cine a mui gade kepet a sam liede cinzwa zie, cide a da mta mrwa eh cailigwang lak,

dede cide Ih langkegai mariem de teicang luzie.

12 Kedanemene nang nsuiyi eh Babylon püt dizie nah kezuyi nda lazie;

lamlwadung nah hangdeutudung n dwa gade suiyi ne puih eh sahbak gaizie, nah luhdung ga tsingbangdung pelane penui badung bapeu zie.

13 Hetu ziudung be mene, cypress bang lunghcuh zie; nah hetubang be mene, myrtle bang be lunghcuh zie,

nah cide RAMPAUBE ziemne zie, pe zi ziemne, kelungta marengei ge nzwa cide dangtüt dilak."