1 Ainie Cush reukidung kunghga kebam, hangdeu ge hesiudung kwa siu eh bam;

2 caune kiina le teikelu duiliem gade jaaidi taiga ge deudiding keteime de langgai no.

Kemzet samgwamedung, heleuh penui ra hu nah hezukeyi da miecu,

kemdei kenna leune gade mina ne pecu hingbam kela gage, heleuh kengkieng nah ma tei ngkapti kela, pedeu hereukidung ne mzi kedi deu ga.

3 Hangdeu reu ga lunghkebam leune nah nnui kideu ga lungh kebamme,

kideutudung ga pailim pwacu lia kecudau, pielo; nah telui kwa kegaidau, kingnei lu.

4 Aide RAMPAUBE a dage rang kegai ge, "Ih zingde a ki gade mcet sünne bamzie,

tingnaimiak tau peri tingding tingdau nzwa, luhlüt peri dau mwangzim ge nzwa.

5 Luhlüt kemakdwa, pepa pah cang di eh kubetsi bui kepet tingdau,

pa pe pwakdung de kieceuna le hetsia dizie, nah pa cide bi ngkaulu nah pekiak perang keuteu tet dizie.

6 Penuide lamlwadung ga nruinedung de nah kideu ga makaunedung de ncüt delwe pütdiak gai dizie.

Nruinedung hepwak dau penui reu bamzie, nah kideu ga makaune pelane tingtiak dau penui da bam dizie."

7 Cipau tingdau pera hu nah hezukeyi minadung dade reugwame reu RAMPAUBE dage hetwakepeu mapeudung keu gwang zie,

kemdei kenna leune gade mina ne pecu hingbam kela gage, heleuh kengkieng nah ma tei ngkapti kela, pedeu hereukidung ne mzi kedi deu ga,

Zion Deutu, reugwame reu RAMPAUBE zi kebam ni ga.