1 Cipau tingdau Hezekiah nra eh tsai di lai eh bam. Cine Amoz napei Isaiah, caihakecibe, pe da gwang, nah pecu ranggai, "RAMPAUBE aide rangla, ‘N ki kezeu teune dilu; kedanemene nang tsai zie delu, nang ringlak.’" 2 Pecai Hezekiah tangdeu ga zu nreu gailu nah RAMPAUBE dage kekie teigai. 3 Pa ranggai, "Kehereide, RAMPAUBO, Ih a nlung kai cangsiak eh samsang eh n dwa gade tet kegaide nsung gailo, nah n miakngau gade makeyi tei kegaide." Pecai Hezekiah hap mrunggai. 4 Pecai RAMPAUBE sam Isaiah da gwang eh ranggai, 5 "Miecu nah Hezekiah dage ranglu, a minadung muiteube, ‘Aide RAMPAUBE, n pau David gu Tinggwang, rangla: Ih n kekie siu da, nah Ih n miakduidung ngau da. Pielo, Ih n teilung ga mmi kereiehmengei ge kaisi beu lai eh bam. 6 Pecai Ih ncu nah namdi aide de Assyria gwangpei dade kelibeu zie, nah Ih aipau namdi de de gum luzie. 7 Aide n ziemne RAMPAUBE dade marehi ge zie, Ih a sampet teicang kera de. 8 Pielo, Ahaz takswa ga tingkaumie kebam de peu pikiet kerei caisim dizie.’" Cine tingkaumie cide kepet gade pikiet kerei ge caisim di.

9 Aide Judah gwangpei Hezekiah sia bam eh yidai keludau, pa ketwa lei raugai:

10 "Ih a teilung ga peri tingdau

Ih Sheol kiriedung tetkah zie de eh ranggai; Acu cika a teilungh kebang de ziemne cikage langgai di.✝

11 Ih RAMPAUBE de madaude ngau dai lak lie eh ranggai, RAMPAUBE de keringme deu ga;

Ih madaude minadung de mede kideu ga lungh kebamme de pie dai si lakta.

12 Meurün kekwabe paiki keugi kedi nzwa a teilungh a dade keugidi;

Paidakme ge nzwa Ih a teilungh hedui dida; paidak bam gade nang acu keugidi zeu;

tingkeba nah tingmui kak gade nang a teilung ngkap bam zeu.

13 Ih tingcang kecang hap bam;

hingho nzwa pa a radung teipang di.

Tingkeba nah tingmui kakgade nang a teilungh ngkap bam zeu.

14 Nruine ge nzwa Ih mra; Ih tamhau ge nzwa mra;

Ih a miak kena nreule ge pie eh leudi. Rampaubo, Ih au keherei dida; acu nghalo.

15 Ih dai ranglai? Pa a dage ranggai, nah pa teigai da;

Ih a teilungh pelane tet nneu la dizie kedanemene lungrei ne acu ngam kelune.

16 Rampaubo, nang a ziemne keherei lang kegaide au a ziemne yi; peu a teilung acu peu dailo;

nang a teilungh tei hemi dai beuda nah pumteih keyi kai dai beuda.

17 Lungrei cide Ih ngau kecude au akatei a ziemne kemmi ge.

Kengkap hekwaki gade nang acu kelibeu da;

kedanemene nang a kemau leune n caile bie ge kelien gaidi.

18 Kedanemene Sheol ncu ketwa peu lama; ketsai ncu twa lama;

hekwaki ga nghung kedime au n kesamsang ga regui bam lama.

19 Keringme, keringme, pane ncu twala, Ih henai tei kebam nzwa;

mipei ge pe name dage n samsang de lia la.

20 RAMPAUBE acu kelibeu zie da, nah anui helei le suiyi mzi zie

anui RAMPAUBE ki ga kelunghta." 21 Isaiah hegwangpei de ranggai, "Penuide peu tangzüttsi le tei kelu kangge keulu nah reteei gage kaigailu, nah pa yi luzie." 22 Pecai Hezekiah Isaiah de keteu, "Ih RAMPAUBE kiga hang kera marengei de dai zieno?"