1 RAMPAUBE rangzeu, "Acu keteu kemak medungde Ih peu ngaulu kera mteiluda; Acu peei kemakme de peu acu peei lu kera Ih mteiluda.

Ih ranggai, ‘Ih aika bam! Ih aika bam!’ A zi qu kemak heleuh be dage.

2 Ih a minadung de ngngwalu kera mteipwa bam muila, penui helung tak eh

yi kemak lampui ga tet kelame, penui katei penui kecetdung nah mariemdung ga tet kelame!✝

3 Penui au a kemei tei bammui kelame,

heguriedung ga ratakdung reca gai, nah tangtsu kwakdung gage perim kehengui ru gai.

4 Penui heraudung kakga bamla nah tingmui kwabam cangla,

nah penui gilidung ga heteih keherabe le gidui tei lu eh hebak teih tyei.

5 Pecai penui kedame dade rang, ‘Sap mdei di, a taiga gwang mna so, kedanemene Ih nnui swa mci ki lu.’

Aidungde a ziemne a ngkie ga mika ge, petingnai ru bam kela mi ge.

6 RAMPAUBE rangzeu, "Pielo, aide a ziemne rau pwabam:

Ih zing de bam dilak, kedanemene Ih penuide saja peu zie; Ih penuide saja peu zie,

7 penui maudung nah penui peime maudung ncüt eh," RAMPAUBE ranggai.

"Penui lamlwatudung ga perim kehengui ru kegai ziemne nah kideutudung gade a ha rang msia kecu ziemne Ih penuide saja peu zie.

Ih cine penui tei kedi tahdung de mdet lu eh penuide peu zie."

8 Aide RAMPAUBE rangla, "Kubetsidung gade petsi dui ngau keludau,

mige rangla, ‘Cide tei msia diso, kedanemene cika makeyi bamlu,’

aide Ih a kila be ziemne teigai zie: Ih cidungde tei msia ciak dilak.

9 Ih Jacob dade heleuhdung tei gai zie, nah Judah leuhme a lamlwatudung gum luzie.

Ih kedet kelume ne hangdeu gum luzie, nah a kilamedung cika lungh luzie.

10 Meuründung ziemne Sharon tsehei deu dizie nah Achor langkam kauhaudung ziemne kemtak ni ge zie,

acu peei kela a minadung ziemne.

11 Dede nnui RAMPAUBE de mlai kedime, a kemci lamlwatu de nsungta kedime,

mabam* ziemne taktyeibam ge mteiteu kelame,

nah riem pwa kela de ziemne zau hai ncüt kelade zau piak gage kai pui kelame.

12 Ih ncu kingtie peu kera mtei luzie, nah nnui pelane tsai kera keumie luzie,

kedanemene Ih qu kegai dau, nnui a sam keli ma; Ih marang kecu dau, nnui kingnei ma.

Dede a miakngau gade petau kemak be nnui tei nah Ih ngkau keladung nnui tei kera kedetlu."

13 Aide RAMPAUBE rangla,

"Pielo, a kilamedung matyei zie, dede nnui au mzeu zie;

pielo, a kilamedung sak zie, dede nnui au hereu zie;

pielo, a kilamedung penui sui yizie, dede nnui de tei ngngam dizie.

14 Pielo, a kilamedung penui lung suiyi de ziemne suiyi kwa sah zie,

dede nnui au nnui mlung keteei de ziemne nnui hap zie, nah rabe kap kebam de ziemne nnui hei zie.

15 A kedet kelume ziemne nnui cai kai nzeu kegai nnui zi de au reset ge eh cide teu eh marang zie; Ih, RAMPAUBE, nnuide teitset zie;

Ih a kilamedung de hezi keda ge le qu zie.*

16 Kideu ga samlam kie kegai keheibe de a dade samlam ngau luzie, kesamsang Tinggwang.

Keheibede kideu gade samkak kelume a dade sampet zie, kesamsang Tinggwang,

kedanemene nda reidung de nsungta dizie, kedanemene cidungde a miak gade hebai dizie lu.

17 Kedanemene pielo, Ih tinggimdung keheci nah kideu keheci ge teigai lai eh bam;

nah teigwang kedidung de de nsung dailak mede milung ga gwang dailak.*

18 Dede Ih dam gai lai eh kebam gade nnui renga zie nah kelungta nnui sui yizie. Pielo, Ih dam gai lai eh kebam Jerusalem de suiyi ge zie, nah pe minadung suiyi ge zie.

19 Ih Jerusalem reu renga zie nah a minadung ziemne a sui yizie;

cika keherei ziemne hei eh hap kecu peda siu si lakta.*

20 Cika ngiena ge tingkak nage rünne lungh kecu tei si dai lakta;

mede kecingme ge peting cang mene tsai dai lakta.

Mige mmi hai ge lungh lu eh tsai kedime ge de hena au reu lie zie.

Keheibe de mmi hai ge lungh hang canglu kemakme de au reset pung lie de zie.

21 A minadung hekidung tei zie nah cika lungh zie, nah penui kubeluh tei zie nah pe tsi tyei zie.

22 Penui heki ge teilu eh mi kedame ge de peu cika lungh kecu tei si lakta; penui linggai lak, nah mi kedame ge tyei;

kedanemene tsingbangdung gu tingbaziedung de a minadung gu tingbaziedung zie. Penui penui bata tei kelude ziemne kehega luzie.

23 Penui kemta gage matei dilak, nah suisiet de nna lak.

Kedanemene penui au RAMPAUBE ne samlam beu pwa kebam namedung kecune, nah penuide de si eh penui leuhmedung de. *

24 Penui qu kemakne, Ih penuide keli gai zie; nah penui rang kebam tingdau, Ih siu luzie.

25 Heneu nah meurün ngngwa matyei zie, nah hingho hetumseu nzwa reigau tyei zie;

dede henei taktyei au rebui zie.

Penui mide tei rezam ta dizie nah a kemci lamlwatu de ngkap dilak," RAMPAUBE rangla.