1 Tinggim reugwame reu RAMPAUBE, Israel Tinggwang, aide Moab deudi dage ranggai,

"Lungrei Nebo nam da gwang bam dida, kedanemene penuide ngkapdi delu. Kiriathaim nam de hengam tei dida nah tui luda.

Pe kengkieng reketbam de tei ngkau nah hengam tei dida.

2 Moab da herüt kepeu gah da. Penui ngauraume ne Heshbon namdi gade penuide tei ngkap gai kera heciem riem.

Penui rang eh, ‘Gwanglu nah anui Moab leuh de ngkap digo. Kemieme de de ngkap dizie, nnuide kingtie ge ne gwasui zie.’

3 Kingnei lo! Ngkapsüt kedi Horonaim namdi gade sah kecu kwa ge siu gwang.

4 Moab de ngkap dida. Pename kehap kwa siu bam dida.

5 Penui hap eh Luhith deutu ga nghang,

Horonaim ga kehung dau de kengkap ziemne penui kehap kwa siu bam dida.

6 Paklu! Nnui teilung kelilu nah hetaideu ga tsaila kemak tsingbang nadung nzwa lu.

7 Kedanemene nang ntadung nah n mahei de nlum kebam ziemne, ncu de tuilu zie.

Pecai Chemosh de tuiteu mie baang dizie, pe cingkume nah muiteumedung de de si eh.

8 Kedanemene kengkapbe namdi leune ga gwang zie; namdi gede cide mbai gailak.

Cine langkam gah dizie nah langkiedung kau dizie, RAMPAUBE rang kegai nzwa.

9 Moab de limkera hesiudung peulo, kedanemene pa lim tetbi maisia lu.

Pe namdidung kemrwa deu ge dizie, cika migede lungh kera bamlak.

10 Keheibe de RAMPAUBE tagwa tei kenghetme de peu reset punglu! Keheibe de pe kingtie hejai bi lwa gai mene keu caili kedime de peu reset punglu.

11 Moab pe henane gade cu kecang kwak eh lungh bam. Pa au pe zau

madaude hela ge gade keda ge gage liagai kemakbe nzwa bam. Pa madaude hebaang ketei ga mie mereu.

Cine pa ndaa lui de nzwa sak yi bam reu; pe rim keyide de nli dima.

12 Cine pielo, tingbaziedung gwangla dida, aide RAMPAUBE ndugai, Ih pe dage pe zaula rui mpet kerame langgai zie nah cidungde ne pe ladung rui mta dizie nah tei pang kecai dizie.

13 Iciu eh Moabme penui rabe Chemosh ziemne hengam tei dizie Israelme Bethel de nlum kelane hengam tei kedi nzwa, penui nlum kela rabe de.

14 Dainzwa nnui, ‘Anui au reugwame, ngkiengsüt kecu reugwame, de eh rang lu lai’?

15 Moab nah pe namdidung de gwaketang eh ngkap dizie. Kedanemene pe rehang yitumedung dapketset ni ga mie kedine. Aide hegwangpei ndugai! Pezi au Tinggim reugwame reu RAMPAUBE.

16 Moab keherei kera matie mene gwang lau da; mzet süt eh kekap gwangla dida.

17 Moab twagwa eh lungh kebam leune, heei eh haplu; pe kendu de cikela leune,

aide sahlu; ‘Ainie, kengkieng tsingtie, herüt kepeu geutie, pang dida.

18 Dibon namdi ga kelunghmedung, nnuide herüt kepeu bam gade nghunglu nah hangdeu kecangh reu ga ntumlu.

Kedanemene Moab de ngkapdi lai eh kebambe de nnuide gwaketang bamdi delu,

penui ne nnui kebam kengkieng kuda de ngkap dizie.

19 Lampui kiga sap eh kwalu, nnui Aroer nam ga kelunghmedung.

Pak tet kelame dade, ‘Daipai tei dino? de eh keteulu.

20 Moab pangpop kedi ziemne hengam tei dida.

Mra eh haplu; kengha ziemne sah lu.

Arnon reuki taiga minadung dage rang beulu Moab de ngkapdi delie kecu.

21 Cu hangdeutu deudi ga saja gwang bam dida,

Holon, Jahzah, nah Mephaath,

22 Dibon, Nebo, nah Beth Diblathaim,

23 Kiriathaim, Beth Gamul, nah Beth Meon,

24 Kerioth nah Bozrah,

nah Moab deu ga namdidung pelane,

kemdei nah kemna namdidung pelane da.

25 Moab kii dang dida; nah peba cum dida, aide RAMPAUBE ndugai.

26 Pecu peu sakmie lu, kedanemene pa RAMPAUBE de ngangsüt eh renialu. Peu Moab de pane mruikegai ga küt bamdi, nah peu minuineu ge tei bam dilu. 27 Moab, Israel n ziemne henui ge di meni? Pecu keregame kakgade peeilu dini, iciu eh nang pe dage pe ha kerangtane n peu hengak kecu.

28 Moab ga kelunghmedung, namdidung gi dilu nah hetialwa ga lungh dilu.

Tangtsu koiki muidung gage tamhau peciep teu kela nzwa la dilo.

29 Anui Moabme ngangkela ha siu da, pe zai kesia de,

pe helia, pe zai kedi nah pecu mning kemdi de. 30 Aide RAMPAUBE ndugai, Ih pa ngang kela samdung cibam, cide pe tateidung nzwa magede ma.

31 Cine Ih Moabme ziemne heei eh hap zie, nah Moabme pelane ziemne Ih lungrei kwa ge sah gai zie nah

Ih Kir Hareseth namdi ga minadung ziemne heei eh hap zie.

32 Sibmah namdi ga kubebangdung! Ih nnui ziemne Jazer dage hap kegai swade hap kiee zie. N kiakdung himpet Mcai Jaaidi kahpet kemdei

Jazer namdi kecang miecang. Ma tei kengkapmedung hepwak tingdau nnui gu buibeu kela tsidung nah nnui zaudung ngkap dida.

33 Cine suiyi nah keramciem de Moabme deu gade nah matsibangdung gade keugi dida.

Ih penui zauniakbam gade peu zaulwa si lakta. Penui suiyi kwa sah eh tet lakta. Sah kegai kwa keheibe de suiyi kwa lakta.

34 Heshbon gade kemdei Elealeh kecang sah kegai, penui kwa Jahaz nam gade siudi, Zoar nam gade Horonaim, nah Eglath Shelishiyah kecang, kedanemene Nimrim reuki de cangh kedine. 35 Moab ga keheibe de nlumkemakme recabam gage ratak tei kegaibe nah pe rabe dage perim kehengui teu reca tei kegaibe de Ih ngkap dizie, Aide RAMPAUBE ndugai. 36 Cine terwaine nzwa a mlung au Moab ga minadung ziemne hap bam dida. A mlung au terwaine nzwa Kir Hareseth ga minadung ziemne hap bam dida. Penui mahei hekwa keludung gah dida. 37 Kedanemene peutam pelane tai kwak dida nah tangkeimai pelane tai dida. Penui pelane ba ga hezamdung la dida, nah pelane penui kia gage roso pai kanglwe la dida. 38 Moab ga kinim pelane ga nah puidikidung kehei gade kehap rünne dida. Kedanemene Ih Moab de migede luu neu ta kedi tangdei lidung tei pang kedi nzwa ngkap kedine, aide RAMPAUBE ndugai.

39 Moab de teipang msiasüt dida! Penui lungrei kwa sah eh hap dida! Moab de tei hengam dida! Cine Moab au pecu twagwapung kebam leuhdung dade penui nuineu nah kengngi ge dizie." 40 Kedanemene RAMPAUBE aide ranggai, "Pielo, ngauraume helie nzwa Moab reuga pe hesiu nzang gailwe lim gwang zie.

41 Kerioth namdi tui luda, nah pe kengkiengbam de tuilu da.

Kedanemene cipau nai Moab reugwamedung mlung mipui mna tet teei nzwa dizie.

42 Cine Moab de ngkap dizie nah pe leuh bam sita dizie, kedanemene pa pekatei pecu tei mdi eh RAMPAUBE de mcau kedine.

43 Kehing nah hekwaki, nah hebaidung nnuida gwangla dida, Moab ga kelunghmedung, aide RAMPAUBE ndugai.

44 Keheibede kehing de pak mbai kecume hekwaki ga caklüt dizie,

nah keheibede hekwaki gade mra mpet kelume de hebai gage dap dizie, kedanemene Ih RAMPAUBE aide penui reu gage teugwang gai zie,

penuide mcau eh Ih hekum kepeei bekum, aide RAMPAUBE ndugai.

45 Pak kelume Heshbon sung ga sap zie penui kengkieng gah zing eh, kedanemene Heshbon gade mi ru mpet zie,

Sihon sum gade mi heu cuh zie. Cide ne Moabme sipie nah hegie kelame peulim ru dizie.

46 Lungrei Moab da gwang zie! Chemosh de reca kelame de ngkap dida.

Kedanemene nnui napeime de tuiteu tet dida nah nnui napuime de hebaang tei dida.

47 Dede pecai Ih Moab de peu lungh yi dai luzie, aide RAMPAUBE ndu kegai."

Moab de tutiak kepeu aikade penli da.