1 Tingnaige penai Naomi pe dage rangdi, "A napoi n ziemne yilu kerane Ih n nahpei peei beu maisia da. 2 Nang pe releimedung de nzang mata tei kebam mpaube, Boaz aide anui kibaume meni? Ainie, pa heziu hecaipung gade barley tei mci bam zie. 3 Cu nang duipia lu, periem kehengui keniaklu, nah nnia keyibe teulu, delwe hecaipung ga hung culo. Pa matyei masak canglu kemakta nang cika bamlie kecu peu ciso. 4 Nah pa zeu kecudau, nang pa daiga zeu zeubi ci siaktelu. Pecai mie pe pi gum pwa kebam de gaudi delwe pe pi ga zeulu. Iciude pa ncu tei kerabe ranglia zie."

5 Ruth pe dage keligai, "Nang kerang pelane, Ih tei luzie."

6 Cine pa hecaipung ga mielu delwe penai rangkebeu de kesiak ge teilu. 7 Boaz matyei nah saklwe pe suiyi bam, nah pa mei hekwa pwa kebam tu ga gwang zeudi. Pecai Ruth sünne eh pe taiga lütlu, nah pe pi gum pwa kebam de gaulwe pe pi ga zeudi. 8 Pecai tingmui muisumge mipeibe mrak lop de gwang nah zeudet gwang ge, ainie, mipui ge pe pi ga zeu kebam ngaulu!

9 Nah pa keteudi, "Nang cauno?"

Pecai pa rangdi, "Ih au n kilabe pui Ruth lie. Nang n pai tuna gele n kilapui de hagai beulo, kedanemene nang au anui kibaume ma pie kebeube lu."

10 Pecai pa rangdi, "A napoi, RAMPAUBE de peu ncu samlam beulo! Nang n samkakkelu kesamsang de kerai dau swade kekamle kai mting kilu delie, rehangme keheime mede kegahme de nang peiswa kemakne. 11 Cine cu, a napoi, ngngi diso! Nang kerang leune Ih n ziemne teibeu zie ; kedanemene renam ga a minadung pelane nang mipui keyi ge lie kecu ci bamlu. 12 Ih au anui kibaume ma pie kera a zie kesangda, dede a swade nna ki kecu mige bamreu. 13 Heziu aika bamlu. Nah ncünne tingcang dide, magade pa ncu nma pie beuzie liecai, makeyi da, peu pecu nma pielu. Dede pa nma pie daulak liecai, Ih ringkela RAMPAUBE zi teu nma pielu kera sampet gaila. Tingcang kemaktane zeu bamlu."

14 Cine Ruth tingcang kemakta pe pi ga zeu bamdi, dede pa mi pecu ngau kera tingbaa mmi kemakne cuhlwe tetdi. Nah Boaz rangdi, "Peu migede de mipuibe hecaipung ga gwang lie kecu ciso."

15 Pecai Boaz pe dage rangdi, "Nang teukebam pai de lwak mpetlwe kam gailo." Cine pa pe pai kamlu. Ge pa barley mdet herok* ge mdetlwe pe pai gage ruigai beu. Pecai pa namdi ga caili gwangdi.

16 Ruth penai taiga gwang luge Naomi keteu eh, "Dainzwa ah a napoi?" Pecai mipeibe pe dage teikegai leune pa pau beu.

17 Pa rang si eh, "Pa acu barley herok ge mdet beu, kedanemene pa rangdi, ‘Nang n nai taiga mta gwang daulak.’"

18 Pecai Naomi rangdi, "N lung teilu, a napoi, aipau ha de dainzwa tei gwang ziebi kecu kwa eh. Kedanemene mina aipaude henai aipau ha de tei canglu kemaktane mtak laklu."