1 Israelme deu ga tutiakme kedi tei kebam tingdau herakum gwangdi. Bethlehem ga lungh kebam Judahme pei ge, pa nah pe nau nah pe napei kena de ngngwa Moab deudi ga kak ge lungh kera miedi. 2 Nah cipau pei de zi Elimelek, nah pe nau zi cai Naomi, nah pe napei kena zi be Mahlon penai Kilion. Penui pelane Ephrathme Bethlehem ga kelungh Judahme. Cine penui Moab deudi ga tetmie delwe cika lunghdi.

3 Ge Naomi nahpei Elimelek, tsaidi. Nah Noami pena kena de rünne ngngwa bamdi. 4 Nah penai Moabme relei de penai naulu; keraibe pui zi cai Orpah, nah pe kenabe pui zi cai Ruth. Nah penui cika mmi kerei kenzwa ge lunghdi. 5 Nah Mahlon penai Kilion hangnana de tsaidi, nah Naomi pena kena mede pe nahpei si mene pecu rünne banglu.

6 Pecai Naomi Moab deudi gade RAMPAUBE pe minadung de Judah ga ketyeipok keyi* pwa kepeu ha siulu. Cine Naomi nah pe na nau kena Moab deu gade pe nam ga cailigwang kera mteilu. 7 Cine pa lungh kebam heni gade pe na nau kena de nzang lwe tet mpetdi, nah penui Judahme deu ga cailigwang kerane lampui ga tet nghung.

8 Pecai Naomi pe napei nau kena dade rangdi, "Tetcu, cailigwang nnai pui kiga gwang daidi lulo. Peu RAMPAUBE de nnai dade pezai yi kelube tei lulo, nnai tsaikedime dade nah a dade keyi nzwa. 9 Peu RAMPAUBE de nnai de meu dailu kebui nah nnai ki ngau dailu kera samlam beulo." Pecai pa penaide kemamgai, nah penai hap cuhdi.

10 Dede penai pe dage rangdi, "Lak, anai ncu ngngwa n leuhme da cailigwang zie."

11 Dede Naomi rangdi, "Caili lulo, a napui kena! Daitei nnai acu ngngwa tet laino? Ih nnai ziemne nnai nahpei tei kera mna dailu buini? 12 Caili gwang cu, a napui kena, tetcu! Kedanemene Ih au a nahpei tei dai kera hecing süt dida. Ih a keregui bam reu de rang cai, nah Ih heziu a nahpei bam liecai, nah Ih mipeina de mna lu bui liede, 13 nnai penui ngkieng cuh kemaktane kwa bam lubui ni? Aide ziemne nnai meu dai mene kwa bam zie deni? Ma, a napui kena! Nnai swade Ih a lung sia gwa dida, kedanemene RAMPAUBE acu ngkau kedine."

14 Pecai penai hap cuh daidi. Ge Orpah pa penai de yila lulo kemam gai eh kilung ga caili gwangdi, dede Ruth pecu ngngwa bamdi.

15 Pecai pa rangdi, "Pielo, n heipei nau pe mina nah pe rabedung da cailigwang dida. N heipei nau caisui eh n kilung cailigwang culo."

16 Dede Ruth keligai, "Acu peu ncu pütdi kera mede n caisui kelade gade nreu tetdi kera rang helo. Kedanemene nang kemie ga Ih mie zie, nah nang kebam ga Ih bam zie. N minadung de a mina zie, nah n Tinggwang de a Tinggwang zie. 17 Nang ketsai gade Ih tsai zie, nah cika ge acu kung zie. Ketsai de gwale magade keheibe ne acu peu n dade keuntsam dicai, peu RAMPAUBE de saja siasüt eh acu peu lulo."

18 Pecai Ruth pecu ngngwa tetbi kera pe lungning kedi ngau luge, Naomi pe dage magede rangsi tadi.

19 Cine penai Bethlehem nam ga gwang canglu kemaktane nbeuh jüja gwang. Nah cinzwa eh, penai Bethlelem ga gwang canglu herizi, namceu ga kebam pelane penai ziemne penui suiyi sütdi. Nah mipuidung rangdi, "Aide Naomi deni?"

20 Dede pa penui dage rangdi, "Acu Naomi lie qu so, acu Mara lie qulu, kedanemene Ngkiengtube Tinggwang acu tei kehereisüt gailu. 21 Ih au mahei eh tet mpet, dede made teu mene RAMPAUBE acu ngngwa cailigwang daibeu. RAMPAUBE acu tei keherei gai, nah Ngkiengtube Tinggwang a dage keherei langgai, daitei nnui acu Naomi lie qu laino?"

22 Iciu eh Naomi pe napei nau, Moabme pui Ruth de ngngwalwe Moab deu gade caili gwanglu. Nah penai barley luhlüt kerai tingdau Bethlehem ga gwang canglu.